Pasal 3
Musa Ki Wali Iram lo usi go
1
Yang! Musa, nemot go nlangin siomasi Midian go trang Yitro go kambing domba yay so susuing. Ku meno so, kambing domba so wawi go klong go, neguenpay ngga idi sono. Kiki Wali Meduim sono, nemot gemang pung. Yangga, meduim Horeb.
2
Ngga ey nemot no Woy Wali tamot suong gemang taling. Wongdiding ba sik sogo koynebleng kalik so. Ngga ey nemot lo ikum go: wongdiding ngga koynebleng lo blon go, no, koy logo kua kukuim.
3
Musa lo pu go, "Ngge suey, ngga sono pay-salu go dagu sik so suey go ya ikum-salu go tasam kangok go ngga. Sogo lo wongdiding go koy logo kua kuim?"
4
Woy Wali Iram ikum go, seni so Musa suey so ikum genang sogo so pepay, wongdiding koynebleng eygo ba sik so Ki Wali Iram lo don ey Musa sono gemang usi, "Musa, Musa!" Nemot lo wa go, "Wa, Ki Wali Iram."
5
Ngga ey Nemot lo gemang pu, "Dagu sono kua weng. Mot go masi sik sogo masisuk sok nalo-a. Seni so, mot ip go sip ngga kon kua goso mo, teguop go sip go."
6
Tandali gemang pupu, "Genam-a mot go aya go Ki Wali Iram, Ablaham, Isak, nggano, Yakob go Ki Wali Iram." Ngga ey, Musa nebuemnemu gemang kebet, suali tra go, nemot Ki Wali Iram mo ikum.
7
Ngga no, Woy Wali Iram gemang pu, "Genam go saulatang nan Mesir sogo ide kangok so lelek go genam mo i-ikum. Nggano, nemotnang lo u-usi go genam mo tup sang. Nemotnang go kebali yay sogo lo pupluok go, yang Genam mo senong, nemotnang lo ide ey lelek go.
8
Seni so, Genam mo li gabe sedue Mesir go ta ba sik sogo, nemotnang lek go pung genang so, nan ngga sik sogo nemotnang wawi go, pung go klong genang sogo, nan meno sip bata dega go sono. Ngga, nan seni kangok go min ip ey tom teguop golo tram go nan. Sedue Kanaan, sedue Het, sedue Amori, sedue Feris, sedue Hewi nggano, sedue Yebus lo suing go nan.
9
Ngeasui go sedue kabung Israel go uwadong go, Genam mo tup. Nggano, Genam mo ikum, nemotnang sedue Israel lo kangok so inya go.
10
Nggeasui go, klong-a, Firaun sono mot Genam lo gabe mot-ak situgu nan Mesir sik so Genam go blong wawi go pung genang so.
11
No, Ki Wali Iram sono Musa lo pu go, "Genam ngge nando? Genam-a Firaun sono mot-ak go koklong go, nggano, sedue kabung Israel nan Mesir sik sogo ya wawi go pung?"
12
Ngga ey, Nemot lo pu go, "Mot ey Genam-a mea koklong? Ngge mot nogo tasam gabe. Seni so, Genam lo mot mo mot-ak go: saula tang ngga mot lo nan Mesir sik sogo, wawi go pung go, meduim ngge no motnang weng go genam nogo tamea kong."
13
Ngga ey, Ki Wali Iram sono, Musa lo pu go, "No, genam sedue kabung Israel ey tegu gono nemotnang lo pu go, “Babu asi lo takokong go Ki Wali Iram lo genam mot-ak go motnang sono weng go. Nggano, nemotnang usi go genam no, “sogo kalik so yangga Mot go sui ya pen-nalu? sogo kalik so nemotnang nogo genam logo ya wa?"
14
Musa sono Ki Wali Iram lo pu go, "GENAM NGGE GENAM GABE." Tandali Nemot lo pu go, "Ngge kalik so sedue kabung Israel nggenemot no se pen-nalo, GENAM GABE lo genam motdak go motnang sono gabe weng."
15
Ngga ey Ki Wali Iram lo Musa no pu go, "Ngga kalik so sedue Israel nogo se pen, ‘Woy Wali Iram, motnang go babuasi Ablaham Isak nggano Yakob go Ki Wali Iram lo genam motdak go motnang sono gabe weng: ngga Genam go senang sui duono-duono uusi genang gemang.
16
Klong-a! Trang-trang, woy-woy Israel nase yaluim, nggano nemotnang no se pen: Woy Wali Iram, motnang go babuasi Ablaham, Isak nggano Yakob go Ki Wali Iram, genam no suong taling gono ngge kalik pen go, “Motnang nogo Genam dabui mo iwat gabe, nggano nan Mesir no motnang sono tetaling go ide.”
17
Nggatang so, Genam nebut mo pu, “Mesir nogo ide motnang no tetaling go sik sogo motnang Genam lo wawi go sedue Kanaan, sedue Het, sedue Amori, sedue Feris sedue Hewi nggano sedue Yebus lo suing go nan min ip ey tom eygo lo tram go sip sono.”
18
Nggano, nago no nemotnang mot go nebut tup go, mot lo trang-trang, woy-woy sedue Israel no se pu, “Klong-a Mesir go deguena sono. Nggano, nemot no motnang lo se pu-klenalo, "Woy Wali Iram, sedue Iblani go Ki Wali Iram, atnang ey mo tegu. Ngga tang sogo so, atnang namboy itak go neguenpay no ya klong tap masi walong kunangglik yam no, Woy Wali Iram atnang go Ki Wali Iram nogo taiti ngga no puit genang sogo so.”
19
No, Genam mo senong, Mesir go deguena lo motnang meakua itak go klong. No, tadonkangok golo plong go sogo so mea itak.
20
No, Genam lo Genam go ta blo sono mea iti. Nggano, tasam-tasam kangok golo nan Mesir mea but, nemotnang nesip no genam lo mea taling. Ngga blo lo, nemot lo itak go motnang mea pung go klong.
21
Nggano, sedue kabung Mesir saula tang ngge nogo dabui suey genang sogo Genam lo mea iwot-ak, ngga tang so, motnang pung go klong sogo nogo taulue so mea kua klong.
22
No, mianang lo nemot go anduanang yap idi sogo sik so se wadong. Nggano nemot go yap ba so susuing go kabung sik sogo, taut, demu samon, perak, amkanang, motnang go duo-yap sedue ey kabung eygo no kok genang sogo. Ngga kalik so motnang lo sedue kabung Mesir logo taut mea lek-sing."