Pasal 2
Musa tui go susuoy so iti go Itakgopung
1
Tang Lewi sik sogo sedue meno, kabung tang Lewi dali sik sogo gemang iti.
2
Nggano, duo iti go sedue denok gemang tui. Ikum-tun go, duo ngga teguop seni, banu nanglik so ngga ba no kok-tun go.
3
No, walong so nemot kok genang sogo yakua. Ngga tang sogo so, wala lo kala klik go iti-tun go, git ey aspal eygo lo sebut gono duo ngga, ngga ba no king gono, kala ngga busruom nesip no, Nil bu no gemang tui-natun.
4
Demanon trang sogo-a, ket no ip go nemu so gemang luik-tenatun: sogo kalik nemot nogo ya lemoy?
5
Ngga ey, bu wata so Firaun go denun Nil bu no gemang weng. Nemot no tebok go kabung-kabung-a, bu ketang lo gemang koklong. Nggano, bu sruom nesip sogo kala gemang ikum. Ngga ey, nemot go koybutasemu so gemang pu, "Klong go iti, ngga sogo?"
6
Kala ngga tenuing go, duo ngga u sogo gemang ikum-nenawon. Ngga tang sogo so, duo ngga nogo klum tra gono, gemang pu-tenatun, "Seni so ngge sedue Iblani go duo."
7
Ngga ey, nemot go aka lo klong go gemang usi Firaun go denun sono duo ngga sogo, "Genam lo mia meno Iblani kabung tuiam putri go duo yay suing genang sogo mea usi. Iblani kabung meno lo duo ngge yay suing sogo be?"
8
Firaun go denon lo pu go, "Ngga suey." Ngga ey kabung denok ngga klong go, duo ngga nemot go unen-a gemang usi.
9
Ngga ey, Firaun go denun lo pu go: "Duo ngge iti go klong go genam nogo so min nase kok. Mot nogo seguot duoy genam lo mea iti." Ngga ey, kabung ngga duo ngga iti go min gemang kok.
10
Duo ngga yam so kangok gono, Firaun go denun sono wawi go gemang klong. Nemot lo duo ngga nemot go danon so gemang iti. Nemot go sui, Musa.Musa: sui ngga go kluim Iblani nebut sogo, "dia sono lek go".so gemang temuit, nemotnang lo pu go, "Bu ba sik so genam lo mo lek."
Nemot go saula tang no Musa tebok go
11
Ngga ku nogo Musa mo kangok, nemot pung go nemot go sedue kabung ey gemang tegu. Nemotnang go kebali ide eygo ikum genang so. Nggano, sedue Mesir lo sedue Iblani nemot go saula tang sik sogo sedue meno i-inya go gemang ikum.
12
Nemot nemu nggesono-nggasono ikum go sedue kua. Sedue ngga kekayso but go, nggano nemot go temoy kaseglok ba no gemang tuet-nawon.
13
Ngga utep go nemot pung go gemang klong dali. Sedue Iblani namon sagui sogo gemang ikum-nawon. Nemot lo kuklue eygo sedue no gemang usi, "Sogo so mot go andua but-tegoy?"
14
No, nemot lo tenguo go, "Genam blo nogo nando lo wengkabui sogo mot taling? Genam but sogo so duing-to, sedue Mesir ngga but-yo go kebong go kalik? Musa suali tra go, nemot lo duing go: "ngge tasam ngganemot naklay mo senong gabe."
15
Ku Firaun tup go yangga tasam ngga, Musa but genang tap gemang uwet.No Musa Firaun go suongku sik sogo gemang kap e… nan Midian no gemang pung, ngga no nemot bumu meno dagu no gemang got-tenawon.
16
Yang nan Midian sogo trang ngga nemot go duo kaguit 7 yam so. Nemotnang bu gluik so gemang wen-lak nggano menay go tensip bu ey sre-sing go, nglangin go domba bu i-iti genang sogo so.
17
Ngga ey nemotnang so iyat go segue-sedue gemang weng-lak dali, ngga no Musa ip go nemotnang no gemang tebok nggano nemotnang go menay kambing domba nogo bu gemang iti.
18
Nemotnang klong go nglanin Rehuel no pung go nglangin lo usi go: "Nggeasui go motnang keda so mo pluep?"
19
Nemotnang lo wa go, "Sedue Mesir klaya duo lo atnag menay yay sogo tebok go, nemot lo bu mata-mata so gluik go atnag nogo sogo nggano kambing domba nogo sogo."
20
Nemot go denunnang no pu-nawon go: "Nemot nago so? Sogo so sedue ngga itak-kenato? Nemot usi go ten ya dam go se."
21
Musa yap ngga no suing sogo gemang keng-nawon, ngga no Rehuellah lo denun Zipora Musa no gemang itak.
22
Kabung ngga lo sedue denok klaya gemang tui-natun, nemot go sui Musa lo Gersom.Gersom: sui ngge Iblani nebut sogo "amble duo''so gemang temuit, "Genam amlesaula so nan meno no mo lemoy."
Musa motdak go
23
Ngga no deguena Mesir sogo gemang kebong. No sedue Israel maning susuang nemotnang kenok go sogo so, nggano nemotnang lo uusi go, kangok so uwadong go ngga, Ki Wali Iram go kama no gemang tup.
24
Ki Wali Iram lo tup go nemotnang lo uusi go, ngga no, Nemot go tegadi sono gemang duing Abraham eygo, Isak nggano Yakub eygo.
25
Ngga ey, Ki Wali Iram sedue Israel ngga ikum go gemang duing. Nggano Ki Wali Iram nemotnang ikum sedue Israel ngga gemang duing: Sam Senang meno lo pu go, "Nemot go saysuk nemotnang nogo gemang taling."nogo gemang ikum.