¹ Musa sono Woy Wali Iram lo pu go: "Demupap inim-a namon ey, kuduong sogo ey kerlam go se pong nalo. Ngga ey, kuduong sogo deupap mot lo mo kesuop go ngga temoy no klik go demutrui naklay, ngga temoy no Genam lo mea klik. ² Nggano, kukluk no wadikua, taut-nalo go, wadikua go, meduim Sinai sono se klak, meduim kalong blo no, Genam go suong ku no se ip-balo! ³ No, mot eygo kerlam sogo, klayanang go kerlam so, kua klak. Nggano, meduim ngganemot ketang logo klayduonang go kua ikum. Menay, klayanang go, meduim ngga ketang logo neguen kua dam-klong." ⁴ Ngga ey, demupap namon keduong sogo ey kerlam go Musa lo gemang pung-sing. Wadikua go, nemot buog gono, meduim Sinai sono gemang klak. Ngga ey, nemot sono Woy Wali Iram lo pu go kalik so, nggano, demupap namon ngga ey, ta no mlak go gemang klak ⁵ Ngga temu ey, utkenuim ba lo Woy Wali Iram gemang li. Nggano, Musa mit no ip go, Woy Wali Iram go sui gemang uusi. ⁶ Nemot go suongku lo, Woy Wali Iram koklong go, yay ey se susuing: "Woy Wali Iram, Woy Wali Iram, Ki Wali Iram Klum Iram, nggano, Guala nuik, Gigling nuik, Nemot go klum katu ey, nggano, Nemot go kengduduk seni ey, ⁷ Nemot go klum go sedue kabung miam dega ey, kuklue piam konkebamling Nemot lo kay go mea suep-sing. No, kuklue so pluok go sedue kabung, nemotnang go kuklue nogo, idekeba mea iti. Nglangin go, piamkonkebamling, danonnang ey mamdat-yap eygo no way mea iti. E… nemot go tang nanglik tete sogo ey namon-namon tete sogo eygo nogo mea iti." ⁸ Keda so, nan sono, Musa isegabuem unuik go, susubu so unuik go, ⁹ gemang pu: " Mot go suongku nogo taitiklum Genam mo iti, Woy Dem! Atnang nesip lo se koklong Woy Dem. Nemot-a, saula tang ngge, dabui-wengkabui demu kalik go saula tang. No, kay go se suep-sing kuklue, nggano, atnang go piam konkebamling. Atnang wawi go, Mot go tete so se lemoy." ¹⁰ gano, Nemot lo pu go: "Yang, tegadi meno Genam mea dok. Mot go saula ngge go suongku no mea semu. Genam lo tasam-tasam kangok go, kukunan blo nogo maning kua lemoy go, saula-saula nesip no mea semu. Saula-saula nesip so motnang susuing go, mea ikum, Woy Wali Iram go takebali, seni so, Genam lo mot nogo sogo-a ya semu, seni-seni so kangok dega. ¹¹ No, mot-a, nggeasui Genam lo pepen go ngge no, waysagi ey mlak go se susuing. Ikum, mot go suongku sik sogo, seduekabung Amori, Kanaan, Het, Feris, Hewi, nggano, seduekabung Yebus, Genam lo mea yat. ¹² Kunala temoy no se! Seduekabung nan mot koklong go, ngga sogo eygo tegadi mot logo kua dok. Motnang nesip no, motnang pui genang tegan so lemoy genaning. ¹³ No, nemotnang go ida no ta so kokong go demusung-a motnang lo way so se kesuop. Nemotnang go ida nogo so kong go demu, motnang lo se togut-sing. Nggano, blue eygo kudidemu demat king go ngga, motnang lo se tuo go truik-sing. ¹⁴ Yang, ida meno-meno nogo, motnang takuakong seni! Seni so, Woy Wali Iram ngga, nenele kangok, yangga, Ki Wali Iram nenele babu go. ¹⁵ Nan ngga so susuing go sedue kabung ey motnang tegadi kua dok seni! Nagono, nemotnang kamea-kame so keng go, nemotnang go ida nggano nemotnang go ida no taiti iti genaning. Yang, nemotnang deguo mea usi motnang sogo, nggano, nemotnang lo tong go menay keng go dam go. ¹⁶ Nagono, nemotnang go denunnang danonnang motnang go duo no tong-sing go, nnemotnang go ide no kamea kalik so mea keng, nemotnang go denunnang lo motnang go duo yap mlue go nemotnang go ide no kamea kalik so mea pupluk. ¹⁷ Ta lo pi go ida, motnang nogo so kua pi. ¹⁸ Loti lagi kua go dam genang walop ngga, suey so yay se suing, se pepla. Yang seni so, ku taidisonamon ba no, loti lagi kua go ngga se dam! Mot no, Genam lo pepen go kalik banu abib ba no taling go ku no se pepla. Seni so, banu abib ngga ba no, nan Mesir. ¹⁹ Ngga ey, kuduong so sani ba sik so tui go ngga naklay-naklay, Genam go tete gemang. Nggano, mot go menay kemsi, kuduong so tui go sapi domba ngga Genam go. ²⁰ No, keleday nok keduong so tui go-a, wayso domba-a mot lo se iti. Ngga kalik, mot lo kua iti go, nemot go blindon-a se pedueng! Mot go duo, trang so tui go, menay lo way so se iti dali. Nggano, taulue sogo, Genam sono go, sedue kua weng. ²¹ Ku taidisokalay ba no mot lo kebali se semu. No, ku taidisonamon tete sogo ngga, nimla genang ku gemang. Nggano, usu so semu go in nogo, nggano, wasma so iti go in nogo, nimla genang ku ngga mot yay se suing dali. ²² Minggu taidisonamon tete sogo walop, yangga, gandum buo go ku nogo walop, mot lo se semu dali. Yagui yam nogo wasma yaluim go, yagui inim nogo wallop ngga kua kay dali. ²³ Yagui klaya ba nogo da nangglik so, mot go sedue-sedue, Genam go suongku no se weng go ip-lak, mot go Woy Dem, Woy Wali Iram, Israel go Ki Wali Iram go suongku no. ²⁴ Seni so, saula-saula mot go suong sik sogo Genam lo mea yat. Nggano, mot go nan bata so mea lemoy. Nggano, klayduonang go logo, mot go nan sogo nemokum meakua. Nagono, mot koklong go nogo, suongku no weng go se ip. Woy Wali Iram, mot go Ki Wali Iram, da nangglik so yagui klaya ba nogo se weng go ip-lak. ²⁵ Nggano, Genam nogo sogo menay, taiti sogo lagi eygo taut ey kin ey iti go kua puit. Nggano, taitinang sogo menay tong go sik sogo, temu itak go, ku eygo kua blong. Ku Paskah nang sogo so tong go menay. ²⁶ Ngga ey, mot go tatamang sik sogo, didon teguop go-a, iti go se klong Woy Wali Iram, mot go Ki Wali Iram go yap ba sono. Kambing nok tong go, nemot go unen go min ip no, kua suik." ²⁷ Ngga ey, Musa sono Woy Wali Iram lo pu go: "Ki Wali nebut ngge naklay sam ba no nase klik! Seni so, Ki wali nebut ngge tang sogo so, Genam ey mot ey nggano Israel saula eygo tegadi mo dok gabe." ²⁸ Yang, ngga so kerlam so Woy Wali Iram ey suing go, kublong 40-kuklik 40 yam no, ten kua dam nggano kua bu kua drop. Nggano, demu ngga temoy no nemot lo klik go nebut tegadi naklay, yangga, Demutrui Tanamon gemang klik. ²⁹ Meduim Sinai sik so Musa li go nogo -- namon eygo demu pap Ki Wali Iram sik sogo demu trui ey Musa lo ta no gemang mlak – no, nemot kua senong, seni so, nemot go nebuemnamu blong eygo. Musa nemot, Woy Wali Iram ey nebut mo pen go nogo. ³⁰ Ku Harun ey sedue kabung Israel naklay ey, Musa ikum go, nemot go nebuemnemu blong ey, suali sogo so, nemotnang dagu sono go kua weng. ³¹ No, Musa lo nemotnang usi go, ngga ey Harun nggano, blung ngga wengkabui naklay nemot sono iwot gono nemotnang no Musa lo pu go. ³² Ngga ey, sedue kabung Israel naklay dagu sono gemang weng. Nggano, nemotnang no demutrui naklay, nemot sono meduim Sinai blo no, Woy Wali Iram lo pen go gemang pen. ³³ Musa nemotnang ey nebut yam so pen gono, nemot go nebuemnemu, amka lo gemang pok ³⁴ No, nagono Woy Wali Iram tegu sogo so Musa degut go, amka pok go ngga mea ple, e… nemot tandali mea pung. Nggano, nagono, nemot pung go nogo, sedue kabung Israel no nemot no mo pen go naklay nemot lo mea pen. ³⁵ Nagono, seduekabung Israel Musa go nebuemnemu ikum go, seni so, Musa go nebuemnemu blong ey. Yang, Musa lo nebuemnemu amka lo tandali pok go e… nemot Woy Wali Iram go suongku no ip so degut genang ku no mea pung.