Pasal 33
Kaseglokpay no, Woy Wali Iram lo yay suing sogo so Musa lo wadong go
1
Musa sono Woy Wali Iram lo pu go: "Klong-a, ngge sik sogo. Mot ey saula tang ngga, nan Mesir sik so wawi go, mot lo mo pung go. Tegadi so, Abalham, Ishak, nggano Yakub no, tanat ey At lo ngge kalik dok go nan sono: “Mot go duo sono, At lo nan ngga mea iti!”
2
Kiwali tamot klaya, Genam lo mea mot-ak, mot go nemuku lo koklong genang. Nggano, sedue Kanaan, sedue Amori, sedue Het, sedue Feris, sedue Hewi, nggano, sedue Yebus nemot lo yat genang --
3
Yangga nan meno, min ip ey tom eygo lo, maniso-manigo sengin ku nan sono. Yang, motnang ngge dabui-wengkabui demu kalik go saula tang, tap no motnang, Genam lo leguot-sing genaning so, motnang nesip logo, Genam meakua koklong."
4
Saula tang ngga, nebut don ey pu go ngge tup gono, nemotnang, genuing gemang suing. Klayanang go logo, amka srem teguop eygo kua kok.
5
Musa sono, Woy Wali Iram lo pu go: Sedue kabung Israel sono pen-a: Motnang ngge dabui-wengkabui demu kalik go tang. Motnang nesip lo, Genam koklong ku tebot so kua go, Genam lo motnang naklay mea leguot-sing. Nggatang sogo so, motnang go srem se tebuo-sing, nggano, Genam mea ikum, sogo-a motnang nogo At lo ya taling."
6
Sedue kabung Israel, meduim Horep sik so dali iti go srem-srem, ngga kalik so kua kok go.
7
Ngga ey, bala meno iti gono dia idi no Musa lo gemang betep. Bala susuing go sik sogo ket sono. Nggano, Tetegu Bala so sui gemang pu. Woy Wali Iram so uwet go sedue kabung, nemotgo-nemotgo so, bala susuing go sik sogo, pung go ket sono mea klong, tetegu genang sogo bala sono.
8
Nago no, bala ngga sono Musa pung go koklong go, saula tang ngga naklay wisi so, nemotgo-nemotgo bala yataput no mea ip-lak. Nemotnang go nemu ey-nemu ey, e... Bala Tetegu ba sono, Musa mea degut.
9
Nagono, bala ngga ba sono Musa degut go nogo, gum yap neguon kalik king go, nggano, bala ngga go yataput no mea king. Nggano, Musa sono Woy Wali Iram lo nebut gemang ya pepen.
10
Saula tang ngga naklay, ngga ikum gono, seni so, gum yap neguon kalik king go li go, bala ngga go yataput no gemang king. Yang, nemotnang buong-lak go, nggano, susubuwit so nemotgo-nemtgo bala suisuing go yataut no ba no unuik-sing.
11
Nggano, Musa sono Woy Wali Iram lo pepen, way-way so nebuem nemu tegu gono, andua-si ey go kalik gemang pen. Ngga ey, bala sono tandali iwot go Musa mea klong. No, nemot go tamot, Nun go danon Yosua-a, nguot sogo nogo, bala ngga ba no itak go, nemot kua klong.
12
Ngga ey, Woy Wali Iram sono Musa lo pu go: "Yang, Mot lo genam sono pu go, saulakuon ngge pu go nase ip go klong! No, genam nogo, Mot lo kua pen ne, nando-a, at eygo Mot lo ya mot-ak go koklong? Nemot-a, ngga kalik go, Mot lo pu go: “Genam mo sui mo senong, nggano, Genam go suongku nogo, mot-a Genam logo, taitiklum mo iti.”
13
Yang, nggeasui go, Mot go suongku nogo, genam nogo taitiklu ya iti go, Mot go tap-tap, genam nogo nase pen-sing. Ngga ey, Mot genam lo senong genang. Mot go suongku nogo, senang so taitiklum genam no iti genang. Mot go, tamot-tamot, seni so, saula tang ngge, Mot go blung."
14
Ngga ey, Nemot lo pu go: "Genam tang golo mot mea nguok, nggano, mot nogo walong-bata mea pen."
15
Musa sono Nemot lo pu go: "Mot tang golo atnang kua wawi go klong go, ngge sik sogo atnang yakua pu go klong-lak.
16
Nago sik so, ya senong. Seni so, Mot go suongku nogo taitiklum genam no mo iti, yangga, genam ey Mot go blung ngge nogo ey? Atnang ey kerlam so, Mot koklong go tang sogo so, mea ikum go senong, atang Mot go blung ngge ey, kukunan blo sogo saula-saula eygo, kua kerlam go so mea ikum?"
17
Musa sono Woy Wali Iram lo pu go: "Yang! Mot lo pen to go ngge, Genam lo mea pluok. Genam go suongku no, taitiklum mo iti go tang so, nggano, Genam lo mot mo senong dali."
18
No, nemot lo wa go: "Mot go blong, genam nogo, nase taling-kundo."
19
No, Nemot lo pu go: "Genam mea klong, Genam go blong naklay, mot go suong ku lo, ngga ey, Woy Wali Iram go sui, mot go suong temu no, mea pen-klong. Genam mea iti, nando no taitikluim iti so Genaam lo iwat go, yangga, nando-a, Genam lo klum go nogo-a mea."
20
Ngga ey, Nemot lo pu go: "Genam go suong ikum sogo, mot don eygo yakua suing. Seni so, sedue kabung wali so Genam go suong so ikum go, kua gabe."
21
Woy Wali Iram lo pu go: "No, Genam dagu sogo, sip meno gemang. Nagono, demu medui blo no motnang ip go;
22
nagono, Genam go blong pung go koklong go nogo, demu tabling ba sono mot Genam lo mea ikum. Nggano, Genam go ta lo mot mea teglue, e… Genam koklong go mea klong.
23
Ngga ey, Genam go ta, Genam lo mea lek. Ngga ey, Genam go tatondi no mot mea ikum, no, Genam go nebuemnemu-a meakua ikum."