Pasal 31
Bezaleel nggano Aholiab taling go
1
Musa sono Woy Wali Iram lo pu go:
2
"Ikum-a, suku Yehuda sik sogo Bezaleel, Uri go danon Hur lo tui go danon Genam lo mo taling,
3
nggano, Ki Wali Waglo lo nemot, Genam lo mo tram. Nemot nogo, senong kalong ey takebali pupluok genang pega, kebali-kebali naklay pluok genang nemot no mo tui,
4
kebali atuia naklay semu go, emas lo, perak, nggano tembaga lo sesemu genang naklay nemot no mo iti;
5
demu permata li gono, suey dato do semu genang; di sam pung genang kebali naklay.
6
Nggano, Genam lo mo taling nemot eygo Aholiab, Ahisamalh go danon, suku Dan sik sogo. Nemotnang go dabui ba nogo, Genam lo senong kalong ey takebali pupluok genang pega me iti. Mot no, Genam lo mo pen-sing go ngga, nemotnang lo naklay se semu:
7
yangga, Bala Tetegu genang, demu truinang so king go peti, ngengam dam nemot blo no tui go, nggano yap ngga ba sogo taut naklay:
8
yangga, media nemot go taut ey, emas murin sik so semu go kandil ey nemot go taut naklay ey, demusung taiti ukupan pupuit genang,
9
demusung, taiti koy no puit go ey, nemot go taut naklay ey, nggano, ta-masi bu so lu go sip nemot go kemle eygo
10
amka sipsuing, woy dega Harun go amka mo teguop go, danonnang go amka ey, woy kebali suing genang,
11
mlay bubluim go, nggano, kinemon eygo sik sogo ukupan, sip teguop go nogo nang sogo. Mot sono, Genam lo pen go kalik seni so, nemotnang lo naklay se semu."
Ku Sabat teguop genang sogo
12
Musa sono Woy Wali Iram lo pu go:
13
"Ngge kalik so, sedue Israel no se pen, no, Genam go ku-ku Sabat-a, yay motnang lo se suing! Seni so, ku ngga, motnang ey Genam eygo nogo so, tetaling go ku gemang. Duono-duono tetaling genang, ngga ey motnang se senong; seni so, Genam ngge, motnang so teguop go Woy Wali Iram.
14
Sabat ku yay motnang lo se suing, seni so, ngga motnang nogo . Ku ngga go teguop, nando lo teglok go, nemot ngga, but go mea kebong. Seni so, nando lo ku ngganemot no kebali semu go, seduekabung ngga saula tang ngga sik sogo, nase nabay-sing.
15
Yang, ku taidiklaya ba no kebali se semu, no, ku taidinanon-namon tete sogo ngga, ku Sabat, nimla genang ku klaya, Woy Wali Iram nogo ku. Nemot go sedue kabung, ku ngganemot nogo, nando lo kebali semu go, nemot but go mea kebong.
16
Yang, sedue kabung Israel Sabat ku yay se suing, walop Sabat senang so duono-duono se semu, senang kiki tegadi so se lemoy.
17
At ey sedue kabung Israel eygo ku Sabat pepla golo, senang so teteling genang. Seni so, ku taidiklaya ba no, Woy Wali Iram lo ut ey nan ey mo semu, nggano, ku taidinamon-namon tete no, dia got-Won go, nim mo la."
Demu pap namon demutrui ey klik go Musa sono iti go
18
Nggano, Woy Wali Iram, meduim Sinai no, Musa ey nebut yam so pen gono, demupap demu trui ey Ki Wali Iram tang go ta lo klik go gemang iti Musa sono.