Pasal 30
Taiti ukupan puit genang sogo demusung
1
"Taiti ukupan puit genang sogo demusung mot lo se semu. Ngga, di panada sik so se semu nalo;
2
Nemot go yam, kuibata hasta klay, masiwalong hasta kalaya dali. Ngga ey, nemot go deguek namon-namon ey se, no, blo sono go hasta namon ey se. Nemot go, matu demusung gemang go ey se kerlam.
3
Nggano, ngganemot mas murni lo se sebut-sing. Nemot go blo idi, nggano, teglo idi naklay, nemot go matunang ey. Nemot go, di naklay emas lo se teguot-sing.
4
Nggano, nemot go tatuk namon ey emas lo se semu-sing, demusung ngganemot go di temoy no ku idi no. Nemot go teglo namon no tatuk ngga se sebut. Tatuk namon ngganemot ba lo to kok go, lek go koklong genang. Ngga kalik go tang so, demusung lek go koklong genang.
5
Nemot go to lek genang sogo ngga, di panada sik so se semu nalo, nggano, emas lo se sebut-sing.
6
Demusung ngganemot, demutrui so king go peti go dam, tutup perdamaian, demutri blo sogo no se kong, mot ey Genam tetegu go sip no se kong.
7
Ngga blo nogo, kinemon eygo taiti ukupan, wadikua-wadikua Harun lo se puit-puit. Nagono, sagoy suey so blong genang sogo nogo, nemot lo se blon.
8
Ngga no, use-use go sagoy ngganemot puit sogo nogo, nemot lo ngga se boblon Woy Wali Iram go suongku no, duono-duonan senang so se boblon.
9
Demusung ngga blo nogo, ukupan meno-meno: koy no puit go taiti, taiti tendedam, kin ey pi go taiti, ngga blo nogo, motnang lo kua iti
10
Yagui klaya daklaya, nemot go matu blo no, kuklue piamkonkebamling suep genang sogo kin lo ngengam genang sogo Harun lo se pupluok. Yagui klaya daklaya yam so, ngengam genang sogo taiti, demusung ngganemot blo no duo no-duo no se pupluok! Yangga, teguop dato go, Woy Wali Iram nogo sogo."
Sedue kabung Israel sui klik sogo no iti genang taiti teguop
11
Musa sono Woy Wali Iram lo pu go:
12
"Nagono sedue kabung Israel tagu i sogo nogo, sui so kiklik go nogo, nemotnang nemotgo-nemotgo so, nemotnang go dabuilap sogo, ngengam genang sogo taiti Woy Wali Iram sono se iti! Nemotnang go sui so kiklik go no, nemotnang nogo dalu pung genaning.
13
Ngge-a, nemotgo-nemotgo so, se iti-sing sui klik sogo sedue kabung ngganemot logo: setengah syikal, sikal teguop goso se I, -- syikal ngge nemot go ide 20 gera --; Setengah syikal yangga, Woy Wali Iram nogo taiti teguop go.
14
Sui klik sogo sedue kabung ngganemot, yagui 20 sik so blo sono go-a se. Woy Wali Iram nogo taiti, nemotnang ngga lo se iti.
15
Taut mata sogo sedue lo, setenga sikal sik sogo miam ey kua iti, nggano, taut kua go sedue kabung logo, setengah sikal ku no kua iti. No, Woy Wali Iram nogo taiti ngga iti sogo nogo, ngengam keduik genang taiti, motnang go dabuilap naklay sogo so se iti.
16
Nggano, ngengam keduik genang duoy ngga, sedue Israel sik sogo mot lo se yaluim. Ngga ey, Yap Tetegu genang ba nogo dewinang sogo so se. Nemotnang go sui so kiklik go nogo, dalu pung genaning. Ngga lemoy go, Woy Wali Iram go suong ku nogo taling genang, sedue Israel senong genang. Nggano, motnang naklay go dabuilap sogo ngengam dok genang sogo taiti."
Ta-masi bu lu genang sip
17
Musa sono Woy Wali Iram lo pu go:
18
"Sip meno dali se semu-nalo. Nemot go kemle idi tembaga lo se semu, ngga, ta-masi bu lu genang sip. Nggano, Yap Tetegu genang mit no se kong, ngganemot ba no mot lo bu se sre
19
Yang, Harun, danonnang ey go ta-masi bu ngga ba sogo lo se lu.
20
Nago no, Yap Tetegu ba no degut sogo nogo, nemotnang go ta-masi bu se lu, nemotnang lo mlak go kebong genaning. Ngga kalik dali so, demusung sono nemotnang weng go dewi pu genang sogo, nggano, taiti Woy Wali Iram nogo koy no puit genang.
21
Nemotnang go, ta ey masi eygo bu se lu, nemotnang mlak go kebong genaning. Ngga nemotnang nogo demu so, se lemoy senang so mea gigit. Nemot ey, nemotnang go duono-duono ngga se pupluok."
Mlay urapan teguop go semu genang
22
Musa sono Woy Wali Iram lo pu go:
23
"Rempah-rempah kuoy go-a se iti, yangga: mur 500 sikal yam so, kayu manis temoy yam so 250 sikal, nggano, usumin suey go 250 sikal,
24
nggano, di teja 500 sikal, sikal teguop goso se i. Nggano, mlay zaitun hin klaya yam so.
25
Ngga naklay, mlay tegup goso se semu nalo go se lemoy, mlay teguop goso pi genang. Rempah-rempah suey dato so bluot go, rempah-rempah so buot go sedue lo bluot go kalik se bluot-nalo, yangga-a, mlay urapan teguop goso se lemoy.
26
Gganemot, Yap Tetegu go ey demutrui so king go peti ey se urapi-nalo.
27
Media ey, nemot go taut naklay ey se, nggano, kandil ey nemot go taut ey, nggano, demusung tati ukupan so pupuit go;
28
demusung taiti koy no puit go ey nemot go taut naklay ey, sip bu so lu go ey, nemot go kemle idi ey se urapi-nalo.
29
nemot no tuing go, teguop so mea lemoy.
30
Mot lo Harun danonnang ey se urapi dali, nggano, teguop-sing go Harun, danonnang ey golo, Genam nogo woy-woy so kebali pupuok genang.
31
Nggano, sedue kabng Israel nogo, ngge kalik so mot lo se pen: “ngge-a mlay teguop go, Genam nogo so se lemoy. motnang ey duono-duono goso pupluok genang.
32
Tebadali go sedue kabung nogo, mlay ngga kua pi. Nggano, mlay ngga nemot go kerlam golo bluot go, ngga kalik sogo mot logo kua semu, kerlam go logo kua semu dali: Yangga, mo teguop go mlay, nggano, mot nogo mlay teguop seni go.
33
Nando lo, mlay ngga kalik go, kerlam golo semu go, kua go sedue tebadali go saysuk no ut go, saula tang ngga sik sogo sedue ngga nase nabay-sing."
Taiti ukupan teguop go nogo
34
Musa sono Woy Wali Iram lo pu go: "Kinemon ey go-a ikak go, yangga: damar git, lokan suk, nggano, rasamala git, kinemon eygo, ngga ey kemenyan seni dega, nemotgo-nemotgo miam kerlam seguong.
35
Naklay ngge, iti go ukupannang so mot lo se semu. Rempah-rempah bluot go, rempah-rempah so buot go sedue lo bluot go kalik so, biap se tega, nemot seguong teguop seni so.
36
Taiti ukupan ngganemot sik sogo, temu mot lo se nenik go halus. Nggano, temu ngga sik sogo, se tui demu trui so king go peti suong ku no, Yap Tetegu go ba no. Mot ey Genam ey tetegu go sip no, ngga teguop seni so mot nogo se.
37
Nggano, ngga kalik go ukupan mot lo, ngga kalik so bluot genang sogo, ngga dali motnang go saysuk nogo sogo kua semu. Woy Wali Iram tete sogo, ngga mo teguop go mot nogo.
38
Nando lo, ngga kalik go mlay semu go, nemot go kinemot dop genang so, saula tang ngga sik sogo sedue ngga, nase nabay-sing."