¹ "Harun, danonnang ey teguop go, Genam go woy-woy so tuik go, Genam go woy-woy so suing genang, ngge kalik so, nemotnang nogo se semu-nalo: Sapi kemsi nguot iti go, domba nok teguop go kemsi ey iti go, ² nggano, lagi kua go loti iti, nggano, lagi kua go loti muong sogo mlay ey duik go, nggano, lagi kua go loti pap-pap sogo mlay ey ut go; gandum muk suey go sik so, ngga naklay se semu-nalo. ³ Ngga naklay, wakay klaya go ba no se king, nggano, wakay ngganemot ba no, taitinang so, se iti! Nggakalik dali so, sapi nguot ngga ey domba nguot namon ngga se iti dali. ⁴ Ngga ey, Harun, danonnang ey usi go, Tetegu go Bala ba sono usi go weng-lak gono nemotnang bu se lu-sing nalo. ⁵ Ngga ey, amka ngga mot lo iti go, Harum nogo amka kemeja mot lo iti go nemot sono se kok nalo. Yangga, gamis baju efod, baju efod ey dabuidon so kebet go ey, baju efod go kuibey, mot lo iti go nemot nogo se glung-sing; ⁶ Nemot go, wengkabui nogo serban, mot lo se tui. Nggano, serban ngga temoy no, jamang teguop lo se bluim. ⁷ Ngga ey, nemot go wengkabui blo no, mlay bluim gono, nemot blo nogo mot lo ta se tui. ⁸ Mot lo pu go, danonnang dagu sono se weng-lak, nggano, nemotnang sono amka ngga mot lo se kok-sing. ⁹ Nemotnang temoy nogo, kuibey mot lo se dok. Harun, danonnang eygo nogo, nggano, nemotnang go wekabui nogo daster ngga, mot lo se pok-sing dali. Woy-woy sogo kebali ngga, nemotnang lo ta mea mlak-sing. Ngge, senang so gigit genang sogo demutrui gabe. Ngganemot kalik so, Harun, danonnang eygo se tuik-sing nalo. ¹⁰ Ngga ey, Sapi kemsi ngga, Tetegu Bala seboy no, mot lo wawi go se klong! Nggano, sapi kemsi ngganemot go wengkabui blo no, Harun, danonnang eygo lo, ta se tui-sing. ¹¹ Sapi kemsi ngganemot, Tetegu Bala yataput no, Woy Wali Iram go suongku no, mot lo se tong. ¹² Sapi kemsi ngganemot go kin, seguay so mot lo iti gono, mot go taglang lo demusung go matu-matu blo no se bluim. Nggano, kin temu naklay ngga, iti go demusung ku idi no, se pi-sing nalo. ¹³ Ngga ey, teguan som nogo benay, dabui kimdun, wawitdon namon, nemot temoy no sebut go benay naklay, demusung blo no se puit-nalo. ¹⁴ No, sapi kemsi ngganemot go kedong, nemot go suk, nemot go kui, Bala dia nenguon no, koy no yam so se puit-sing. Ngga, kon suep genang sogo so puit go gemang. ¹⁵ Ngga ey, domba kemsi meno, klaya iti go, domba kemsi ngga go wengkabui blo no, Harun, danonnang eygo ta tatui gono. ¹⁶ Domba kemsi ngga, mot lo se tong. Nggano, nemot go kin mot lo iti go, demusung ketang lo se pi-sing nalo. ¹⁷ Domba kemsi ngga, nemotgo-nemotgo yam so, suey so mot lo se ibot-sing. Nemot go teguan ey, isegan eygo bu ulu gono iti go, nemot go temu-temu blo no, ta-sing gono, nemot go wengkabui blo no, mot lo se tui dali. ¹⁸ Ngga ey, domba kemsi ngga naklay, demusung blo no, naklay se puit-sing. Ngga, taiti koy no puit go tete, Woy Wali Iram nogo taiti, kinemon eygo gemang. Yangga, Woy Wali Iram nogo so, koy no puit go taiti ¹⁹ Ngga ey, domba kemsi meno mot lo iti go, Harun, danonnang eygo, domba kemsi go wengkabui blo no ta se tui. ²⁰ Nggano, domba kemsi ngga, mot lo se tong. Nemot go kin, seguay so mot lo iti go, Harun go kama, tasemlea idi temoy no seguayso se ut. Ngga ey, danonnang go kama tasemla idi no se ut dali, taunen tasemla idi nogo, nemotnang go masi unen tasemla idi nogo. Nggano, kin temung ngga, mot lo iti go, demusung ketang lo se pi-sing. ²¹ Demusung blo sogo, kin seguay so mot lo iti go, ngga sik sogo mlay ey pi genang sogo. Nggano, Harun ey nemot go amka eygo temoy sono mot lo se wit. Nggano, danonnang go amka nogo se wit-sing dali. Nemot teguop genang sogo, nemot ey nemot go amka eygo, nggano, danonnang go amka nemot dali. ²² Domba kemsi ngga sik sogo, nemot go benay-a, mot lo iti go. Nemot go, sat benay eygo, benay teguan som, dabui kimdun, wawitdon namon, nemot temoy no sebut go benay, nemot go kebum ta semla idi – yangga, ta bu so wit go, domba ta iti gemang -- ²³ Ngga ey, loti kluip klaya mot lo iti go, loti muong sogo mlay eygo, loti pepap sogo, wakay ragi kua go loti ba sik so, Woy Wali Iram go suongku sogo sik so. ²⁴ Naklay-naklay, Harun go tadabui blo sono, mot lo se tui, nggano danonnang go tadabui blo sono go se tui-sing dali. Nggano, ngga naklay, taiti Woy Wali Iram go suongku sono, taling genang taiti kalik, mot lo se taling. ²⁵ Ngga ey, nemotnang go ta sik sogo, mot lo ikak gono, demusung blo no se puit! Yangga, koynopuit go taiti, Woy Wali Iram go suongku nogo, kinemon eygo. Ngga koynopuit go taiti, Woy Wali Iram nogo. ²⁶ Ngga ey, domba kemsi, Harun no tabu so wit go, dabuidon mot lo iti go, Woy Wali Iram go suongku no, taling genang taiti kalik mot lo se taling. Nggano, ngganemot ngga, mot tete sogo gemang. ²⁷ Nggganemot kalik so, dabuidon taiti so taling go, ngga mot lo se teguop, nggano, kebum taiti teguop domba kemsi sik so iti go, Harun, danonnang eygo so tuik go gemang. ²⁸ Ngga ya, Harun, danonnang eygo tete sogo gemang, blung Isreel nogo demu no senang so tetaling genang sogo kalik so gemang. Ngga teguop go taiti gemang. Ngga taiti teguop seni go, blung Israel logo so se lemoy seni. Nemotnang sesuoy genang, taiti sik so iti go ngga, nggano, Woy Wali Iram nogo, taiti teguop seni go, nemotnang sogo genang. ²⁹ Harun nogo so, teguop go amka ngga, duono-duo no senang so se iitak. Nemotnang tatui go, ta bu wit gono nemotnang lo se kokok. ³⁰ Ku taidisonamon yam so, amka ngganemot way dali so suing genang, woy Harun go danonnang sik sogo lo se kok, Bala Tetegu genang ba sono degut genang sogo lo se kok, teguop sip ba no, dewi pu genang sogo so se kok. ³¹ Domba kemsi, taiti tuik ngga mot lo se iti, nemot go kedong mo teguop go sip ba no mot lo se semu. ³² Harun, danonnang ey, domba kemsi go kedong ngga, Tetegu Yap yataput sogo loti ey se dam! ³³ Ngga naklay, nemotnang lo se dam, nemotnang tuik sogo so, iti go ngengam genang sogo, mo teguop go. No, seduekabung demining go, kua dam. Seni so, taiti teguop seni go naklay ngga gemang. ³⁴ Menay kedong sik sogo, temu itak go, loti sik sogo, temu itak go wadikua go nogo ey pung go, koy ba no naklay itak go se puit, kua dam! Seni so, ngga taiti teguop seni go naklay. ³⁵ Yang, ngga kalik so mot lo semu go, Harun, danonnang eygo, mot sono Genam lo pu go kalik seni so, se semu. Ku taidiso namon ba no, nemotnang woy-wy sogo se tuik. ³⁶ Kuno-kuno sapi kemsi tong go, mot lo se semu kon suep genang taiti so se lemoy, genang taiti so, ngga se teguop-sing. Demusung ngga nemot eygo ngengam genang. Nemot. Mot lo tabubluim gono teguop genang. ³⁷ Ku taidisonamon yam so, demusung ngga, teguop genang sogo so, se pluok. Ngganemot, mot se teguop-sing, yang demusung ngga teguop go kon kua goso mea lemoy. Nemot go sedue kabung, demusung ngga no tuing go, teguop so mea lemoy."

Taiti wadikua go ey use go ey

³⁸ "Ngge naklay, demusung ngga blo no se pluok. Domba nok namon, yagui klaya yam nogo, kuno-kuno ngganemot se pupluok. ³⁹ Domba meno wadikua se semu, nggano domba meno dali use so se semu. ⁴⁰ Nggano, domba meno sepersepuluh efah tepung suey go ey, se semu mlay seperempat him ey. Nggano, korban kinpi go, seperempat him anggur ey se semu. ⁴¹ Domba meno, use woy yam sogo no se semu dali. Korban sajian ey, korban curahan eygo kalik so, wadikua mot lo se semu, kinemon eygo korban so. Woy Wali Iram nogo koy no puit go taiti so. ⁴² Korban koyno puit go, mot ey mot go duono-duono se pupluok. Tetegu Yap seboy no, Woy Wali Iram go suongku no. Nggano, Genam motnang ey go mea tegu, motnang nogo nebut, pen genang sogo. ⁴³ Nggano, sedue kabung Israel eygo, Genam mea tegu. Sip ngga Genam go blong lo mea teguop-sing. ⁴⁴ Tetegu Yap ey demusung ey, Genam mea teguop-sing. Nggano, Haru, danonnang ey Genam lo mea teguop-sing. Nemotnang lo, Genam nogo woy-woy so kebali pupuok genang. ⁴⁵ Genam mea susuing, sedue kabung Israel nesip no, nggano, Genam mea lemoy nemotnang go Ki Wali Iram so. ⁴⁶ Yang, nemotnang mea senong: Seni so, Genam ngge, Woy Wali Iram, nemotnang go Ki Wali Iram. Nemotnang so, nan Mesir sik so, wawi go pung go. Nemotnang nesip so, Genam susuing genang. Genam ngge, Woy Wali Iram, nemotnang go, Ki Wali Iram."