Pasal 28
Sedue woy-woy yangga Harun ey danonang eygo amka
1
"Mot go aka Harun ey danonang ey se usi, yangga, Nadap, Abihu, Eleazar nggano Itamar. Nemotnang ngga At nogo woy-woy so banom so se teguop-sing.
2
Woy Dega go amka Harun nogo so se semu. Nemot ikum go, takokong ey genang.
3
Amka sebut genang so senong At lo iti go sedue-sedue se yaluim-sing. Nemotnang no pu go Harun nogo amka nase semu. Genam nogo kebali pupluok genang sogo Woy Dega so nemot teguop genang.
4
Nemotnang no pu go, dabui no kebet genang, efod, jubah, kemeja bersulam, serban nggano kuibey se semu dali. Woy Dega go amka ngga, mot go aka Harun nogo so nemotnang lo se semu. Nggano, danonnang Genam nogo kebali woy-woy so sesemu genang se semu dali.
5
Amka ngga, dombadit wol buki suk sogo, ungu suk sogo nggano kin suk sogo, benang emas, nggano lenan susuot sogo lo se semu-sing.
6
Ngga ey efod temoy nogo srem ey se semu.
7
Yalu no efod glung genang sogo tegan namon, teglo idi no se sebut.
8
Kuibey klaya dan susuot sogo lo se semu, kerlam golo semu go sebut go se gulung klaya goso lemoy genang.
9
Nggaey, demu delima namon ey se iti. Demusamon (emas) sesemu senong go sedue wet go ikum go demu ngganemot temoy no klik genan Yakob go danonnang 12 yam sogo, menotnang go sui trang sik so ey sat no pung so se klik-sing.
10
Taidisoklaya go sui nemot go-nemot go demu temoy nogo se klk-sing.
11
Ngga ey, demu namon ngganemot lang bano emas lo semu go, lang ba no se glung.
12
Nggano taling genang so, demu efod yalu no se glung, tang Israel 12 suku ngga no taling genang. Ngga tang sogo so, nemotnang go sui Harun lo yalu no glung go dedegut genang. Ngga ey, Genam, Woy Wali Iram, nemotnang no senang so duduing genang.
13
Meno dali bingkai namon ngga sik sogo
14
se semu dali lante emas teguop sik sogo dan kalik so semu go ngga, bingkai emas ngga no glung genang sogo."
Dabuidon kebet genang
15
"Imam Dega go dabuidon no kebet genang se semu. Ki Wali Iram go duduing nemot senong genang sogo no, nemot lo glong genang sogo. Nemot go dan suk semu genang sogo, efod go suk dan kerlam golo efod kalik se klik dali.Serban ey dabuidon no kebet go ey
16
Nemot go tebuem nanglik ey, nggano danamon so se padu, nemot go yam kuibata masiwalong 22 cm so se.
17
Dabuidon kebet genang ngganemot temoy no, tala 4 yam so demu permata se sebut. Tala klaya tete sogo demu delima ngga, topas nggano baiduri sepah se.
18
Tala namon tete sogo no demu zamrud, demu nilam nggano intan.
19
Tala nangglik tete sogo no, demu akik nggano demu kecubung.
20
Tala namon-namon tete nogo, yakut nggano ratna cempaka. Demu permata 12 yam sogo ngganemot emas lo se dok-sing.
21
Demu permata ngganemot temoy nogo klay-klay nemot go-nemot go sui se klik sing, Yakob go danonnang go sui, tang-tang Israel taling genang sogo so se klik sing.
22
Dabuidon kebet genang sogo nogo lante namon ey demusamon dan teguop so kuoy golo se semu.
23
Demusamon lo tatuk namon ey se semu dali, nggaey dabuidon so kebet go seding namon blo idi no se glung.
24
Ngga ey, lante namon ngganemot iwontuk tegan semu go ba lo se kok sing.
25
Lante ngganemot go sering namon bingkai namon temoy no se dok. Dabuidon no kebet go ngganemot dok genang, efod go tegan dabui idi ey kluing genang.
26
Demosamon logo tatuk, namon ey semu dali gono, dabuidon so kebet go ngganemot no, dabui ba idi ngga ba no efod temoy no se kluing-sing.
27
Ngga ey, namon dali demu samon logo se semu, nggano efod go tegan yalu no glung genang namon ey se sebut. Nemot go sring sebut genang ku dato sono se, kuibey blo idi sik so susuot so se dok-sing.
28
Tatuk dabuidon no kebet go tegan biru ey se keduik, efod go tatuk ey dabuidon no kuibey blo so kebet go gigit genang, ngga ey ngganemot yakua kenong genang.
29
Teguop go sip ba no Harun degut go nogo, suku-suku Israel go sui dabui don no mo klik go ngganemot ey iti go se degut dali. Ngga ey, Genam go blong nogo, Genam, Woy Wali Iram, senang so duduing genang.
30
Urim ey Tumim ey se tui Urim ey Tumim ey: Ngga Ki Wali Iram go duduing senong genang sogo so Imam lo glung go. Suey so kua senong, sogo kalik so taut namon ngganemot mo sesemu.Dabuidon so kebet go ngganemot Harun Genam ey tegu sogo nogo nemot lo kok genang sogo. Ku Genam ey nemot tetegu go nogo, senang so dabuidon no kebet go ngganemot se glung. Ngga ey Genam go duduing blung Israel nogo, nemot lo duduing genang."
Sedue woy-woy nogo sogo amka meno
31
"Efod blo no kok genang sogo juba naklay ngga wol biru lo se semu.
32
Blindon nang sogo put nogo yakua tegek genang, pita ining golo se sebut.
33
Nemot go sring ku idi nogo, sam-sam ey se semu-sing, delima don suk sogo wol biru lo se semu. Ungu suk sogo nggano kin suk sogo, menotui menotui so kelentingan demu samon logo ey se sebut.
34
...
35
Harun lo kebali Imam so semu go nogo, juba ngga Harun lo se kok. teguop degu sono Genam sono nemot weng go nogo, nemot sip ngga itak go klong sogo nogo, kelintingan kluim ngganemot mea tup. Nemot ya kua kebong genang.
36
Demusamon teguop lo srem meno semu gono se klik: "Woy Wali Iram nogo so teguop go".
37
Serban temoy no tegan biru lo ngganemot se dok.
38
Harun go suongdon no, demusamon srem ngganemot se glung. Genam, Woy Wali Iram lo taiti iti genang. Genam nogo so blung Israel logo taiti iti go uweng go taiti iti genang. Nemot-a nemotnang go taiti iti genang sogo ngganemot nogo kuklue pluok go.
39
Lenan halus sik so Harun go kemeja se semu dali. Lenan halus sik sogo serban meno se semu dali nggano kuibey sebut dali.
40
Harun go danonnang nogo sogo kemeja, kuibey, serban se semu dali nemotnang nogo ta ey kokong genang.
41
Mot go sat Harun no amka ngganemot se kok-nalo, danonnang eygo no. Nemotnang ngga zaitun mlay lo se pi-sing. Ngga tang so, genam go kebali semu genang so nemotnang ngga se temuit. Nggano, Genam go kebali semu genang woy-woy so mea teguop-sing.
42
Ngga ey nemotnang nogo celana tebot kain lenan lo se semu. Nemot go walong kui sik so e.. kebum no se, nemu lo yakua ikum go saysuk kebet genang sogo.
43
Celana tebot ngga nemotnang lo se kokok, Genam go yap ba no degut sogo no ngga ey demusung mit no klong sogo nogo degu teguop ba no kebali imam so pupluok go nogo, nemotnang kebong genaning. Nemotnang go saysuk yakua ikum go ikum go tang sogo so kebong eygo. Demu ngga Harun ey nemot go tang naklay eygo nogo gemang ya lemoy."