Pasal 27
Taiti pupuit genang sogo demusung
1
"Di akasia sik so demusung se semu lo, masiwalong 2,2 meter nggano kubata 2,2 meter, demusung ngga kuibata masiwalong kerlam, no, bluo sono go yam 1,3 meter so.
2
Ngga ey nemot go tebuem-tebuem nogo matu namon-namon yam so se semu; matu-matu ngganemot demusung temoy no se semu nggano tembaga lo se sebut-sing.
3
Ngga ey, nemot go sip meno blang bata se semu dali sung sre genang sogo, nggano butaguoy, buot-wakay bu sot genang sogo, sruom nggano koynegu ta genang sip; taut ngga naklay tembaga sik so mot lo se semu.
4
Ngganemotnang sogo iwontuk mot lo se semu-sing, yangga kawat tembaga lo, nggano ngganemot temoy no iwontuk ngga glung genang nemot go sring namon-namon no.
5
Iwontuk glung genang sogo ngganemot demusung ku idi no se glung-sing; ku idi sik so se glung, ngganemot e… demusung temoy yam no se pung.
6
Ngga ey, demusung ngga lek genang sogo ta mot lo se semu dali, di akasia sik sogo to nggano tembaga lo se sebut-sing dali.
7
To ngganemot iwontuk ngga ba sono se kok nggano to ngganemot demusung go teglo namon no se gigit demusung ngga lek go koklong go nogo.
8
Demusung ngga nemot go put ey dipap sik so se klik, mot no menduim blo no taling go kalik so, ngga kalik so demudung ngga se klik lo."
Bala kabuit sogo nebut
9
"Kiki Bala ngganemot go kabuit se semu dali; bala kabuit ngganemot nang sogo sada idi lo amka walong go amka lenan susut sogo lo se semu nemot go benang ining go, teglo idi klaya go nogo sogo walong 44 meter so se ining.
10
Nemot go di 20 yam so se, nggano di ngganemot no sey genang sogo 20 yam so, tembaga sik so se semu, no, di no glung-sing genang sogo wamo nggano doksing genang sogo ngga perak sik so se semu.
11
Ngganemot kalik dali so biap idi nogo se, masiwalong idi nogo, amka walong go 44 meter se semu dali, nemot go di 20 yam so se nggano di ngganemot no sey genang sogo 20 yam so, tembaga sik so se semu, no di no glung-sing genang sogo wamo nggano doksing genang sogo ngga perak sik so se semu.
12
Nggano, kabuit kuibata idi nogo woysut idi nogo amka kangok go 22 meter se sebut dali, nemot go di tanamon yam sogo ey nggano tanamon dali di ku no sey genang.
13
Kabuit ngga go kuibata, yangga seboy temu woyklak idi amka kangok go 22 meter se sebut dali,
14
yangga, amka kangok go 6,6 meter teglo idi no yatap kangok go ngga idi no, nemot go di nangglik ey nggano di ku no sey genang nanglik dali so;
15
nggano nggano teglo namon tete sogo yataput kangok go ngganemot nogo amka 6,6 meter, nemot go di nangglik ey nggano di ku no sey genang nanglik dali so;
16
no yataput kangok go kabuit nogo sogo 9 meter yam so amka dinekuoi suk sogo nggano dinekuoy lep go suk sogo amka, kermisi suk sogo amka nggano benang lo ining go lenan susuot sogo -- sukmeno-suk meno so ining go -- nemot go di namon-namon yam sogo ey nggano di no sey genang sogo namon namon dali ey.
17
Yap kabuit ngganemot so teguot-sig go di ngganmot perak lo semu golo se keduik-sing, nggano nemot go wamo-wamo ngga perak sik so se semu nggano ngga ey, nemot sey genang sogo tembaga sik so se semu.
18
Kabuit ngganeot go walong 44 meter, kuibata 22 meter nggano nemot go bluo sono go 2,2 meter, benang lo ining go lenan susuot sogo, nggano sesey genang tembaga sik so se.
19
Ki Wali Balanang sogo taut naklay ngga, nggano di tagak genang sogo nggano kabuit di tegak genang sogo naklay: naklay ngga tembaga sik so se semu."
May ey pelita eygo
20
"Sedue israel naklay no mot lo se pu, nemotnang lo mot sono Zaitun mlay iti go weng genang zaitun mlay inim ngga pelita nang sogo, sedue lo pelita blon go senang so blon go gigit genang.
21
Tetegu genang Bala ba nogo amka kangok go seongku nogo demutrui so king go sip so nogo, Harun ey danonnang eygo lo se pupluok use sik so iti go e… wadikua go Woy Wali Iram go suongku nogo. Ngge demutrui lelemoy genang sogo gabe senang so duono-duono seduekabung Israel nogo sogo."