¹ "Bala se t ngga Musa ey Woy Wali Iram tegu genang sip nggano sedue Israel ey nemotnang maning kaseglok pay koklong go nogo. Bala ngga Woy Wali Iram go bala so gemang pu. Genam nogo so, amka tanamon yam so tong go lo bala ngga se klik, amka wol biapbu suk sogo lo se klik, dawa suk sogo nggano buom suk sogo. Amka ngganemot Kiwalitamot sam ey se klik. Kiwalitamot sam: ² Amka ngganemot go yam naklay se kerlam seguong, masiwalong 12 meter so, kuibata meter namon so. ³ Taidi yam sogo keduik-sing go klaya so se lemoy, nggano 5 taidi dali ngga kalik dali so se semu. ⁴ Nemot dok genang tang amka biru ngga go seding go se semu-sing, ⁵ nemotgo-nemotgo dok genang tang 50 yam so se semu-sing. ⁶ Nggano, emas sik sogo wamo 50 yam dali so se semu amka kangok go namon ngga glung genang sogo klaya so lemoy genang. ⁷ Bala ngga go yabla so kebet genang sogo amka 11 yam so kambing dit lo se klik. ⁸ Amka ngganemot go yam naklay se kerlam seguong, masiwalong 13 meter kuibata meter namon ey. ⁹ Taidi yam sogo dok-sing go klaya goso banom se lemoy, nggano 6 meno ngga kalik dali banom so se semu. Taidisonamon tete sogo sring ngga danamon so se padu seboy temu sono go kut genang. ¹⁰ Amka klaya tete sogo temoy nogo glung genang sogo wamo 50 yam so se glung-sing nggano namontete sogo amka nogo wamo glung genang 50 yam dali so se glung-sing dali. ¹¹ Glung genang sogo wamo 50 ngganemot perunggu sik so se semu nggano wamo ngganemot way-way so glung-sing go Bala go yabla klaya so lemoy genang. ¹² Amka temu walong sogo ngga Bala nasong temu kut genang sogo gemang. ¹³ Amka temu 50 sentimeter yam sogo ngga Bala kabuit no walong so itak go se glung-sing. ¹⁴ Ngga ey Bala kebet genang sogo namon ey se semu, meno domba kemsi suk sik sogo kinsuk so se ut nggano meno dali susuot sogo suk sik so se semu. ¹⁵ Nggano, Bala ngga go neguon nemudi so kong genang akasia sik so se semu. ¹⁶ Nemot go gayrang blo sonogo walong 4 meter nggano kuibata 66 sentimeter. ¹⁷ Gayrang klaya go nogo sebut genang di namon ey se suon, ngganemot lo gayrang ngganemot way-way sogo sebut-sing go klaya so lemoy genang. ¹⁸ Bala ngganemot go teglo sada idi sono go, gayrang ngga 20 yam so se semu, ¹⁹ nemot sey genang sogo 40 yam so perak lo se semu, gayrang klaya gono sey genang so go namon ey nemot go patuk namon nogo sogo. ²⁰ Gala go teglo biap idi sono go, gayrang ngga 20 yam so se semu ²¹ nemot sey genang sogo 40 yam so perak lo se semu, gayrang klaya gono sey genang so go namon ey. ²² Nggano, Bala nasong temu woysut idi nogo, gayrang 6 yam so se semu ²³ nggano tebuem-tebuem no gayrang namon ey se semu. ²⁴ Gayrang-gayrang ngganemot ku idi no masi temu no se kluing-sing, e… blo no se pung. Nemot go tebuem sebut genang sogo ngga kalik so se kluing-sing. ²⁵ Yang, naklay go gayrang 8 yam so sey genang sogo perak sik sogo 16 yam so, gayrang klaya gono sey genang so go namon ey. ²⁶ Temoytuo so tui genang sogo di 15 yam so akasia sik so se semu, Bala go teglo klaya idi nogo taidi yam so se semu, ²⁷ taidi dali teglo meno idi nogo se semu, nggano taidi dali so nasong temu woysut nogo so se. ²⁸ Neguontum nesip logo ngga go bluo yayrang nasip yam so se dok, Bala go sring sik so e… sring no se pung. ²⁹ Bala go gayrang ey neguontum eygo ngganemot emas lo se sebut-sing. Di ngganemot glung-sing genang sogo iwontuk emas sik so se semu-sing dali. ³⁰ Meduim ngga blo no Bala ngga mot no Genam lo atuia taling go kalik seni se klik lo. ³¹ Yataput no glung genang sogo amkla lenan susuot sogo lo se semu domba go dit wol sik so semu go kiki suk sogo, ungu suk sogo nggano kin suk sogo. Amka ngganemot temoy nogo sam Ki wali tamot-a se klik. ³² Yataput nogo amka ngganemot di akasia lo semu go di namon-namon temoy no se glung emas lo sebut-sing go temoy no emas sik sogo wamo glung genang sogo lo nggano perak lo semu go sey go bluo no se kong. ³³ Yataput ngganemot Bala go yabla sebut go ku no se kong. Amka ngganemot idi nogo Tegadi Peti demutrui namon so king go se kong dali. Teguop Degu ey Kiki Degu eygo sang amka ngganemot lo tui genang. ³⁴ Tegadi Peti go dam nemot blo no se kut. ³⁵ Kiki Degu go dia idi no biap idi no taitinang sogo sip se kong Kiki Degu biap idi sono, nggano pelita so kong go masi Bala ngga ba no sada idi no se kong. ³⁶ Ngga ey, amka kangok go Bala yataput nang sogo amka lenan susuot sogo lo se semu domba go dit wol sik so semu go kiki suk sogo, ungu suk sogo nggano kin suk sogo, nemot go srem ey se ining-sing. ³⁷ Amka kangok go ngganemot glung genang sogo di taidi yam so di akasia lo se semu dali emas lo se sebut-sing dali nggano emas lo semu go wamo lo se glung-sing go sebut. Di ngganemot kong genang sogo perunggu sik sogo se semu dali."