Pasal 20
Demutrui tanamon Woy Wali Iram lo iti go
1
Nggano Wali Demurui ngge gemang pen:
2
WOY WALI IRAM, mot go Ki Wali Iram, Genam ngge gabe! Nan Mesir koybutasemu sip sik sogo, taitak genang so motnang Genam lo wawi go mo pung.
3
Genam seguong nogo-a iway ta ey motnang logo se kokong. Ida meno no ta kua kong.
4
Didemu-a bumeno-bumeno so ta lo kua semu:
ut temoy sik so iti go,
nan blo sik so iti go,
nan ba sogo bu sik so iti go,
5
naklay ngga nogo ta kua kong, susu bu kua wit.
WOY WALI IRAM-a, mot go Ki Wali Iram,
Genam ngge-a dui ey gabe!
Genam ey ip genang, ida meno yakua.
Se senong: Genam so ikle go sikabung nogo
duono-duono kisebui taling go,
e… mlena nangglik, namon-namon tete nogo ey mea pung.
6
No, klum ey tupduk so At no keng go-a, kuno-woyno, tongyakuatong goso, Genam go gualaklum mea koklong.
7
WOY WALI IRAM, mot go Ki Wali Iram gemang!
Tebadali go ey, Nemot go sui kua pu.
Rlam so Nemot go sui pu go nogo
kisebui-a Nemot lo mea iti. Seni!
8
Ku Sabat so pepla go nogo, ku ngganemot takong ey se degut. Ngge mo teguop go ku gabe.Yang!
9
Ku taidisoklaya yam so, kebali pluok genang so gabe itak.
10
No, taidisonamon tete sogo nimla genang.Nemot tete sogo teguop so itak go ku gabe. Sikabung klayanang go logo kebali kua pluok:
mot tang go logo;mot go duoyap logo;mot go koybutasemu logo;mot go menay logo;
mot go yakena sogo glop saula meno logo,
kebali kua pluok.
11
Kua kay! Ku taidisoklaya ba nout, nan, bu eygo ngge Ki Wali Kumam lo semu go.Taitisonamon tete sogo ku no, nim gemang la-ngam. Ngga tang so, Sabat no nenem-yakay ku Nemot lo temuit go,Teguop goso ku ngge gabe itak.
12
Moy-ay nogo, suali ey ta se kokong.Ngga ey, nenem yakay ey WOY WALI IRAM mot go Ki Wali Iram lo iti go nan blo nogo,walong so motnang wali genang
13
Sedue kua but go kebong.
14
Kamea kua pupluok
15
Wom kua king.
16
Sikabung meno sogo nebut tebadali kua iwot.
17
Nemukum kua. Yangga, meno duo go yap sogo meno duo go senun sogo; meno duo go koybutasemu sogo; meno duo go menay popong go sogo; meno duo lo klak go koklong genang menay sogo; soso-sogo naklay sogo; motnang nemukum kua duing.
Seni!
WOY WALI IRAM ey suong tegu sogo Israel suali ey
18
Saula tang ngga kuidop ey kukluim ey gemang tup, kuidop way-wayso tutuot, yasuplaway nebut tuot go meduim nogo koyndop ey pung. Ngga ey saula tang ngga suali bubuong ey king go ket so ip go nemu-a bubung.
19
Nemotnang lo Musa no gemang pupu: "Mot-a genamnang nogo nemot se pen, atnang mea tup; no Ki Wali Iram-a atnang eygo nebut kua pen, atnang kebong genaning."
20
No Musa lo pu go saula tang sono: "Suali kua tra, seni so Ki Wali Iram mo weng motnang yatrang semu genang sogo so nggano motnang ba nogo suali Nemot nogo pung genang, Nemot nogo motnang logo kuklue pluok genaning."
21
Saula tang ngga ket so ip-lak go, no Musa klong go kebup kukuim sogo Ki Wali Iram gemang go sip sono.
Dewi pu genang demutrui semu go
22
Ngga ey Musa sono WOY WALI IRAM lo gemang pu: "Ngga kalik so sedue Israel nogo se pen: Motnang tang so mo ikum, seni so motnang ey Genam ut blo sik so nebut pen go.
23
Genam mit nogo ta lo semu go ide demu sik sogo, nggano samon sik sogo talo motnang nogo so kua semu.
24
Genam nogo sogo nan sik so demusung-a se kong nggano ngganemot blo no motnang go taiti ngga menay-a se puit nggano susuoy go sogo taiti, kambing domba nggano sapi lembu mot logo se puit. Ngga klay-klay sip genam lo taling go Genam nogo duduing genang tasam gabe, Motnang sono Genam weng go motnang nogo taitigualaklum mea iti.
25
No nago no Genam nogo demusung demu sik so kong genang sogo, pahat lo semu go demu lo kua kong, seni so ngga kalik go ngga motnang lo taut kon eygo lo genang semu, demusung ngga go deguop mo kua gemang.
26
Ngga ey Genam go demusung go tenglam sono blo sono mot kua klak, ngga tang so mot go nggasring ngga blo no teguom go ikum eygo."