¹ "Ngge nemotnang go nemuku no mot lo iti genang sogo demu-demu gabe. ² Nagono, Iblani klayduo koybutasemu so mot lo drang lo king go. Mot nogo so nemot kebali genang walong yagui taidisoklaya yam so se pluok. No, yagui taidisonamon tete no, sedue taitak go kalik pung go klong genang so pu go, nemot gogo sogo-sogo way dalinang sogo ya kua king goso se itak go klong. ³ Nemot-a banom weng go, nemot-a banom pung go se klong. Nemot senun eygo, nemot go senun ey pung go kerlam so se klong. ⁴ Nemot go tuiam lo nemot nogo senun mo iti go, kabung ngga duo tui-sing go seduedenok kabung denok? Kabung ngga ey danonnang eygo senang so tuiam goso se lemoy. Nggano koybutasemu sedue ngga-a banom pung go se klong. ⁵ No, koybutasemu ngga lo seni-seni so pu go, Genam go tuia nogo klum ey, at go kabung ey duo-yap eygo nogo klum ey. Genam taitak go pung genang sogo, genam moy so. ⁶ Nemot go tuiam ngga lo nemot kekayso wawi go Ki Wali Iram go suongku no se ip. Ngga no, nemot wawi go dedegut go yataput sono, kua go yatapu di sono. Nggano, nemot go tuiam lo kamasua se nedik, kua go kama putpung-a welu lo se pung. Nggano, koybutasemu ngga, nemot go tuiam nogo so kebali yagui-yagui nemot go wali naklay mea kebali. ⁷ Nago no, klayduo lo nemot go duo kabung denok koybutasemu so nay go, koybutasemu kabung denok ngga pung genang sogo, koybutasemu sedue pung genang sogo kalik so mea kua pung go klong. ⁸ Koybutasem kabung ngga nogo nemot go tuiam yakay kua go, nemot go tuiam ngga lo se itak go nemot sogo drang lo sedue meno lo se king. Kabung ngga, nemot go tuiam logo ya kua nay amle go ta sono go. Seni so, nemot go tuiam lo tegadi kabung ngga nogo mo paysing go nogo ⁹ No, nemot go tuiam ngga lo, nemot go duo sedue denok nogo so mo guik go, nemot go tuiam ngga lo nemot go denunnang kalik so se pupluok. ¹⁰ Nago no, nemot go tuiam lo kabung meno-a iti go, no, nemot nogo tendam-udrop, amka, saduikenok genang sogo yelung nemot nogo kua tong. ¹¹ Seni so, nemot go tuiam lo nangglik ngga nemot nogo kua pluok go, kabung ngga pu go itak go se pung go klong. No, drang sogo sogo nemot sik sogo tuiam logo yakua pu go iti.”

Sikabung dali go dabuilap sogo demutrui

¹² "Sedue meno nando lo but go kebong go, nemot nogo idekeba, way dali so nemot but go mea kebong. ¹³ No, ngga but go ngga ta lo kua but go kebong go. Ki Wali Iram go takebali nemot no lemoy gono but go. Genam lo sip klaya mea taling, nago sono mot se kap? ¹⁴ No, nagono sedue klaya duo lo dabuipiam ey wamoy mlue no sikabung dali no pluok go, ngga ey, nemot but go kebong go, sedue ngga sik Genam go demusung sik sogo kekayso mo lo se iti go, nemot but go se kebong. ¹⁵ Nando lo nglangi-a, unen-a but go kebong go, nemot ngga idekeba but go se kebong genang se iti. ¹⁶ Nando lo amblelante so lemoy go sedue dali kaykayso wawigo kap go, nemot ngga idekeba but go kebong genang se taling. Sedue ngga naning nemot go ta ba so gemang go, nemot lo duoy so mo nay go, no, nemot-a idekeba but go se kebong. ¹⁷ Nando lo unen so nglangin so piampugo, nemot nogo idekeba but go se kebong genang-a mea iti. ¹⁸ Nagono, sedue sagui teguot gono klayduo lo meno but demu lo but go, takemuk lo but go, ngga tang so nemot sadui srek go, ¹⁹ nemot so but go sedue ngga nogo idekeba kua iti. No, sedue but go ngganemot tandali ip go dia logo teguoli ey ya uwet go, no, sedue sadui sogo ngganemot nogo duoy se iti. Ngga tang sogo so, nemot go kebali kua go, nggano, nemot go sadui sogo duoy iti go, e… nemot se pali. ²⁰ Nagono, sedue klaya duo lo nemot go koybutasemu sedue-a, kabung-a, teguoli eygo but go kebong go. Ngga kalik go ay dali se but dali! ²¹ No, koybutasemu ngga maning kuklaya namon so wali go, kekayso way yakua usi. Sseni so, koybutasemu ngga nemot nemot tang go tang so. ²² Nagono, sedue saguipung gono, klayduo sik meno lo kekayso but go, kabung klayduo duonu eygo but go. Ngga tang so, kuombung go. No, kabung ngga kua kebong go, sedue ngga nogo idekeba nemot go kenin lo pu go drang se king kabung ngga nogo. Ngga no akim lo pu go tang so ngga se king. ²³ No, ngga kabung ngganemot ey kebong go, ngga nemot go seni, dabuilap way dabuilap dali lo se iti, ²⁴ nemu way nemu dali lo, wasrang way wasrang dali-a, ta way ta dali lo, masi way masi dali-a se iti, ²⁵ koylo buoy go way koylo buoy go, kuo way kuo-a, wuim sre go way wuim-a se sre dali. ²⁶ Nagono, sedue klaya duo lo nemot go koybutasemu sedue go kabung go nemu but go nemot go nemu ey waluk go, nemot go koybutasemu ngga ta nase itak go klong. Nemot go nemu mo waluk go way sogo. ²⁷ Ngga no, nemot lo bubut e… koybutasemu sedue, kabung go wasrang naklay luot go, nemot go koybutasemu ngga-a taseitak go klong. Nemot go wasrang mo luto go way sogo. ²⁸ Nagono, sapi lo sedue-a, kabung-a klaya luik go kebong go, sapi ngga demu lo srom go se kebong. Nggano, nemot go kedong kua dam. No, sapi ngga so popong go sedue nogo idekeba yakua taling. ²⁹ No, banim go sapi ngga lo sedue daklay-daklaya sedue so luk go nogo nemot so pong go nogo mo pen dali. No, nemot yay kua suing go nogo, sedue sapi ngga lo but go kenong go nogo, sapi ngga demu lo but go se kebong. No, nemo go nglangin nogo idekeba iti go se kebong dali. ³⁰ No, duoy lo wayso iti genang sogo so pu go, duoy ngganemot nemot no pu go kalik so se iti. Ngga, nemot go wali susuoy genang sogo drang gemang. ³¹ Denok seguai go sedue, kabung denok sapi lo mo luk go kebong go, idekeba ngganemot dali-a se taling dali. ³² No, sapi ngga lo koybutasemu klaya luk go kebong go, nemot so pong go sedue lo nemot go tuiam no duoy 30 kepeng perak se king. Nggano, nemot go sapi ngga demu lo but go se kebong dali. ³³ Nagono, sedue klaya duo buput so tutuet go kua kebet go, buput kua kebet gono sapi, keleday ngga ba no pui go, ³⁴ sedue buput ngga so tuet golo drangking se king, nemot go menay ngga way sogo duoy se king menay ngganemot so pong go sedue no, no, menay kebong go ngga nemot tete so se itak. ³⁵ Nagono sedue klaya duo go lembu lo sedue meno go lembu uluk go kebong go, lembu maning wali sogo ngga duoy so se iti. Nemot go drang se wasey, nggano mo kebong go ngga se wasey dali. ³⁶ No, lembu ngganemot banim sik so ngga kalik so sesemu go, nggano, nemot so pong go yay yakua susuing go, nemot go way sogo drang dui ey se king. No, menay mo kebong go ngga, nemot go so se lemoy.”