¹ Woy Wali Iram go Woy Wali Yap ey deguena go Istana ey yam so Salomo lo buong go naklay Salomo lo duing go kalik so buong go. ² Woy Wali Iram saysuk gemang taling, Salomo sono danamon tete sogo. Gibeon no Nemot go saysuk taling go kalik dali so. ³ Woy Wali Iram lo Salomo sono pu go: "Genam mo tup, mot lo dewi wadong go, mot lo Genam sono klak go, Woy Wali Yap mot lo buong go ngga Genam lo mo teguop-sing gemang, Genam go sui ngga so senang so gigit genang so. Ngga tang so, Genam go nemu ey Genam go dabui ey senang so ngga so mea gigi. ⁴ Genam go suong ku no Mot uwali go mot go aya Daud kalik so, dabui lo, seni ey, nggano Genam lo iti go demu no dabui lo keng go, ⁵ Genam lomot go sipsuing don mea king, blung Israel nogo, senang so mea gigit, Mot go aya Daud no tegadi Genam lo dok go kalik so. Genam lo ngge kalik so tegadi dok go: 'Mot go du no-duo no, senang so sipsuing ngge Blung Israel nogo mea gigit!' ⁶ Nago no, mot ey mot go duo-yap ey Genam sik sogo teguey go, Genam lo taling go demu no ta kua mlak go, Ida meno no ta klong go kokong go susubuwit go, ⁷ Blung Israel genam go suongku sik sogo mea nega-sing. Genam lo mo itak go nan ngge sik sogo. Nggano, Woy Wali Yap Genam go suinang so, Genam lo mo teguop-sing go ngge, Genam lo ket sono mea betep Genam go suongku sik sogo. Israel nebut wayang so mea saulasaula lo mea pepen. ⁸ Woy Wali yap ngge mea togut, sedue kabung ngge lo klong-weng go nemu mea ikum, iwoy suang go nebut mea pu: 'sogo sik so, Woy Wali Iram lo tasam ngge kalik go, nan ngge ey, Woy Wali Yap ngge eygo no mo lemoy?' ⁹ Temu lo mea pu dali ne: 'Nemotnang go Woy Wali Iram Ki Wali Iram, nemotang go asi babunang so, nan Mesir sik so wawi go pung go,nemotnang lo mo itak go, way so ida meno-meno no keng go, takokong, susubu ne uwit. Ngga tang sogo so, Woy Wali Iram lo idekeba ngge nemotnang blo no iti go gemang!" ¹⁰ Ngga kalik so Salomo lo Yap namon ngga gemang buong-nangam. Yangga, Woy Wali yap ey, memot go Istana eygo. Yagui 20 ba no buong go. ¹¹ Deguena Tirus, Hiram dem lo mo tebok Salo mo sono,di aras, di sanobar, nggano demusamon, nemot lo duing go yam so motebok. Deguena Salomo lo ku ngganemot no deguena Hiram nogo so, nan Galilea sogo yakena 2 yam so gemang itak. ¹² Ngga ey, Tirus sik so, Hiram gemang weng, Salomo lo nemot nogo so itak go yakena-yakena ikum sogo so. ¹³ nemot lo gemang usi: "Sogo tang so, yakena-yakena ngga-a genam nogo so ne itak, dem-sop? Sip ngga go sui nan Kabul so gemang pu e... ngeasui go no gebe pung. ¹⁴ Deguena Salomo nogo so, talenta demusamon logo 120 yam so Hiram lo gemang king. ¹⁵ Woy Wali Yap ey istana eygo buong genang so Salomo lo kebali go kebali sedue nggekalik so gabe. Nggano, Milo,nggano Yerusalem go tema, ngga ey Hasor, nggano Megido, nggano Gezer. ¹⁶ Banim nogo, Mesir go deguena lo plepung go Gezer gluik genang sogo so, ngga ey naklay ngga koy lo puit go dasing go. Sedue kabung Kanaan kota ngga so susuing go, tuk-sing gono, taitiso salomo go senunnang drang so gemang king. ¹⁷ Ngga ey, Gezer ey Bet-Horon degueng eygo don Salomo lo kok go, ¹⁸ ngga ey Baalat ey Tamar ey nan ngge sogo kasglok pa so gigit go ngga. ¹⁹ Nggano Salomo go yakana tennang tautnang so teta go sip naklay, yakena yakena kleta so ta go sip, plesedue kuda blo logo tala go sip, ngga naklay Salomo lo duing go sip no. Nemot lo duing go Yerusalem no buong dali genang sogo, meduim Lebanon blo no, nemot lo tamlak go nan naklay nogo. ²⁰ Sedue Amori, sedue Het, sedue Feris, sedue Hewi, nggano sedue Yebus, sik sogo seduekabung maning susuing go sik sogo, Ngga sedue kabung Israel ey kua i gemang. nemotnang ngga, ²¹ tang-tang maning ngga so susuing go, ngga lo idi logo. Nan ngge so susuing go, Blung Israel lo kua tuk-sing go tang gemang. blung Israel Salomo eygo lo plepung go ku nogo kua tuksing go tang, e... nggeasui go no gabe pung. ²² Sedue kabung Israel sik sogo Koygutasemu so Salomo logo kebali kua taling. Yang, nemotnang sik sogo naklay-naklay nemot go-nemot go so plesedue so, pegawai so, ple wengkabui kuda blo logo ey kleta logo eygo wengkabui so mo lemoy. ²³ Ngge Salomo go kebali wengkabui so taling go wengkabui-wengkabui gebe; 550 yam sogo lo pemlenta ta gemang mlak, kebali ngga pluok genang sogo. ²⁴ Piraon denun Yerusalem, Daud gu yakena sono weng gono, nemot nogo so buong go istana ba sono, nggano Salomo lo Milo gemang buong. ²⁵ Taitinang sogo menay yagui klaya ba nogo dananglik so gemang ta-sng, yangga; susuoy genang sogo taiti Woy Wali Iram go demusung blo no puit genang sogo. Taiti ngganemot nemot lo puit-dak go, Woy Wali Iram go suongkuno, nggano, Woy Wali Yap ngga yam so gemang semu-nawon. ²⁶ Deguena Salomo lo, bayi kangok go Ezion-Geber, Elot dagu sogo,biap Teberau nan Edom sogo ketang no. ²⁷ Hiram lo nemot go kebali sedue byi ngganemotnang lo king go gemang klong. Yangga biap blo yam so senung go sedue-sedue. Deguena Salomo go kebali sedue ey tebok genang so. ²⁸ Ofir no nemotnang pung gono, ngga sogo demusamon ngga sik sogo king go, 420 yam sogo talenta Salomo sono king go gemang weng.