¹ Ngga blo idi lo, sedue-sedue, woy-woy, trang-trang, sruom tegay Israel, Salomo lo usi-sing go gemang yaluim deguena Salomo go suongku no Yerusalem no. Woy Wali Iram go tegadi peti Daud go yakena Sion sik so lek genang sogo so. ² Ngga ey, blung Israel naklay yaluim go, deguena Salomo go suongku no. Ngga lemoy go, banu Etanim, ngga, walop ku 7 tete sogo no. ³ Ngga ey sedue-sedue Israel pluep-lak go, ngga ey woy-woy lo tegadi peti ngga lek go, ⁴ nemotnang lo lek go, Ki Wali Tegadi peti ngga, ey tetegu genang sogo tenda ey lek go, nggano, teguop go taut naklay tenda nga ba sogo ey, naklay woy-woy tang Lewi lo lek go gemang degut. ⁵ deguena Salomo ey blung Israel naklay weng-lak go ey nemot go seboy no gemang yaluim-sing. tegadi peti gu suongku no gemang yaluim-lak. Ngga no, kambing, domba, sapi eygo taiti so tong go gemang puit-sing. Menay tong go ngga, tagu kua i-sing, miam gega so. ⁶ Woy-woy Woy Wali tegadi peti ey nemot go sip sono, nasong sip sono, nemot go sip ba no gemang degut, Woy Wali yap ba sono, ngga teguop kon kua go sip, kiwalitamot go tabang ba sono. ⁷ Kiwalitamot ngganemotnang go tabang lo ngga kalik bata go tegadi peti ey nemot so kok go to eygo blo sono bata go gemang gigit. ⁸ nemot so kok go lak go di ngga walong dega, e... teguop gi sip sik sogo ey iikum, no, dia sik sogo-a yakua iukum. Sip ngga no gemang kong, e... nggeasui go ku no gemang. ⁹ Tegadi peti ngga ba nogo sogo-so go kua, no, Musa logo demutrui namon meduim Horep no Woy Wali Iram lo iti go Blung Israel nan Mesir sik so pung gono. ¹⁰ Woy-woy kon kua go sip sik so pung gono, gum lo weng go Woy Wali Yap kekay so gemang kebet. ¹¹ woy-woy ngga wisi sogo don eygo yakua pi go suing, takebali ngga ba nogo pluok genang sogo. Gum ngga ketok go tang sogo so. Yang Woy Wali Yap ngga Ki Wali Blong lo tram go nogo. ¹² Ngga ey, Salomo lo pu go: "WoyWali Iram lo pu go: Nemot go blong ketok go ba so Nemot senang so mea susuing. ¹³ Mot go yap mot suing genang sogo, genam lo mo buong tu. Senang so Mot susuing genang sogo." ¹⁴ Ngga ey deguena dabui iwot-ak go, blung Israel naklay blo nogo tabuwit genang sogo so. ¹⁵ Ngga ey Salomo lo pu go: " Woy Wali Iram, blung Israel go Ki Wali Iram nogo blong se iti! Seni so, Nemot go lom ba sik so at go aya Daud no pen go nebut, Nemottang go ta lo kebali ngga mo pluok gabe. ¹⁶ 'Yang Genam lo Genam go blung Israel wawi go nan Mesir sik so pung go nogo, Genam go Woy Wali yap klik genang sogo yakena yakena Israel sik Genam maning kua kuoy. No, Aenam go Blung Israel tamlak genang sogo so, Daud-a Genam lo mo kuoy.' ¹⁷ Nggano, genam go aya Daud lo mo duing, Woy Wali Iram, Israel go Ki Wali Iram nogo so Woy Yap klik genang sogo so. ¹⁸ Ngga ey, Woy Wali Iram lo, Daud genam go aya sono gemang pu: "Mot go dabui lo duing go, Genam go sui nogo so Woy Wali yap klik genang sogo so, seni so mot go dudui ngga suey dato seni. ¹⁹ No, Woy Wali yap ngga, mot lo meakua klik. No, mot go duo tang golo, nemot lo Woy Wali Yap Ganam go sui iway iti genang sogo ngga, mea klik-yon.' ²⁰ Woy Wali Iram tang golo tegadi pu go ngga, Nemot tang go lo mo lemoy gabe. Genam mo ip, ata go aya Daud way dali so, Blung Israel go deguena go sip suing blo no mo suing, Woy Wali Iram lo tegadi dok go kalik. Woy Wali Yap blung Israel go Ki Wali Iram go sui iway iti genang so mo buong tu gabe. ²¹ Tegadi peti tui genang sogo sip, ngga bano geman lo mo semu. Tegadi peti ngga ba no, Woy Wali Iram go tegadi imot go asibabu ey dok go gemang king go gigit, nemotnang nan Mesir sik so wawi go pung gono dok go tegadi." ²² Woy Walo Iram go demusung suongku no, blung Israel naklay go suong no Salomo ip gono, Nemot go ta blo sono, ut sono iti go, ²³ gemang pentenawon: "Oh! Woy Wali Iram, blung Israel go Ki Wali Iram! Mot kalik go ida meno kukunan blo sogo, ut ba sogo kua gabe. Mottang go lo, Mot go tegadi Mot go tamot-tamot Mot go suong ku no wali gono dok-sing go dabui lo mo mlak. ²⁴ Mot tang golo genam go aya Daud yay mo suing, Nggano, Mot go lom ba sik so pung go nemot nemot lo mo keng, e... ngeasui go kebali ngge gabe lemoy. ²⁵ Oh Woy Wali Iram, blung Israel go Ki Wali Iram! Mot tang go lo Mot go tamot Daud genam go aya no dok go tegadi yay se suing. Mot lo tegadi so dok go: "duo no-duo no tong kua tong go so deguena so blung Israel tameamlak. No, nemotnang-a senang so Mot go suongku no se uwali, motang go Genam go suongku no wali go kalik so. ²⁶ Oh, blung Israel go Ki Wali Aya! Nggeasui go, Mot go tegadi ngga don ey mea gigit. Mot go tamot Daud, genam go aya no dok go tegadi ngganemot. ²⁷ Yang seni so, Kukunan blo no Ki Wali Iram senang so mea susuing. Seni so, ut blo so go, ut blo dega sogo Mot yakua suing, ngga kalik dali so, genam lo klik go Woy wali yap ngge ba nogo. ²⁸ Iwot-dak-a sang, Mot go tamot lo keklak go dewi ngge sono sang! Nggano, genam lo uwadong go ngge sono sang, oh Woy Wali Iram, genam go Ki Wali Iram sang! Genam lo uwadong go ngge sono se tup sang. Ngga ey, Mot go tamot lo Mot go suongku sono keklak go dewi ngge sono, nggeasui go sang! ²⁹ Kuklik kublong, Woy Wali Yap ngge sono Mot go nemu senang so se bubung, Mot tang golo mo pen nga go sip ngge sono. Mot lo pu go: Genam go sui senang so, ngga so mea gigit. Mot go tamot lo dewi sip ngge no pupu go ngge nase tup-kundo sang. ³⁰ Mot go tamot ey Mot go blung Israel eygo lo keklak go sip ngge sik sogo, se tup-kundo. Mot lo mot go sip, Ki Wali yakena sik so se tup-kundo. ngga ey atnang go kuklue piam se kay go suep-sing sang. ³¹ Nago no, duo meno lo nemot go andua sono kuklue piam semu go, nemot tang go saysuk piam genang sogo ta ey se pegat. Ngga no nemot weng go, Mot go demusung kon kua go suong ku no ³² Mot tang golo mea tup ³³ Nago no Mot go Blung Israel kukulue piam pluok go tang so plesi lo don pedueng go, Nggano, Mot go sui sono tandali iwot-dak go dabui lo keng go, dewi Mot Woy Wali yap ngge ba no weng go keklak go, ³⁴ Ki wali yakena ba sik so Mot lo nemotnang go dewi mea tup. Ngga ey, Mot go blung Israel go kuklue pia pluok go Mot lo kay go mea suep-aing, nggano, nemotnang tandali nemotnang go asibabu no nan Mot lo itak go sono wawi go tandali mea weng. ³⁵ Nago no nemotnang go kuklue mot sono pluok go tang sogo so, ut Mot lo kedik go sa kua pu go, ngga ey sip ngge ba no Mot go sui sono dewi pu go, nemotnang go kuklue piam sik sogo iwot-dak go, nemotnang no Mot lo iseng taling go sik sogo, ³⁶ Mot lo nemotnang go dewi mea tup, ngga ey Mot go koybutasemu go kuklue piam Mot lo kay go mea suep-sing. Seni so Mot lo nguok go tap seni eygo tap, tap suey go, nemotnang lo tap ngga no se keng. Ngga ey, nemotnang go nan blo sono go sa Mot lo mea pu go say. Nemotang go nan, asi babu no Mot lo itak go nan, duono-duo no itak go nan ngge blo sono go sa mea pu. ³⁷ Nago no nan ngge blo nogo kluongku ten kua go nogo, nagono kudalu kong go nogo, kusadui, sadui-sadui pung go nogo, usu yam so medopnang lo dam go nogo, plesi lo nan ngge blo nogo ide taling go nogo, piam-piam menobu-menobu so weng go nogo, ³⁸ ngga ey, Mot go blung Israel klaya duo lo, nemotnang naklay lo dewi Mot sono keklak go, - nemotnang naklay dabui ba yam so lasu go tang so - Woy Wali Yap ngge ba sono, Mot sono ta blo sono iti gono kelak go dewi, ³⁹ Ki Wali Yakena ba so Mot susuing go, Mot lo nase tup. Nemotnang go dabui Mot lo mo senong go tang so, Mot lo nemotnang go kuklue piam ngga mea suep-sing. Yang, Mot seguong logo so seduekabung klay-klay go dabui ba mo senong. ⁴⁰ Mot sonogo nemotnang suali ey takong genang. Nemotnang Mot lo asi babu no tegadi ey itak go nan ngge blo no wali go nogo. Mot nogo suali ey ta kokong genang. ⁴¹ Ngga no, saula meno, Mot go blung Israel kua, Mot go sui tang sogo so weng go ngga, ⁴² Mot go sui kangok dega go tup go, Mot go don dega tup go, weng go Mot go Woy Wali Yap ngge ba no dewi pu so weng go, ⁴³ Mot tang go lo, Mot suisuing go Ki Wali yakena ba sik so mea tup. Nemotnang lo mot sono keklak go ngga, Mot tang golo mea tup, nemotnang go dewi. Ngga tang so, saula-saula kukunan blo sogo naklay Mot go sui senong genang. Ngga ey, Mot go blung Israel kalik so, Mot no nemotnang keng dali genang. Nggano senung genang, seni so, Woy Wali yap genam lo buong go ngge ba no Mot go sui iway gabe iiti. ⁴⁴ Nagono Mot go Blung, Mot lo taling gi sip sono plesi ey plepung so koklong go nogo, ngga ey,WoyWali Iram sono dewi klak go, Mot go Woy Wali yap Mot go sui iway pu genang so at lo buong go ngge sono dabui iwot go dewi klak go, ⁴⁵ Nemotnang lo keklak go dewi ngga Mot tang go lo se tup, Ki Wali Yakena sip kon kua go, seni ey nemudi so go sik so se tup. ⁴⁶ Seni so, -sedue kabung kuklue piam kua semu go kua gabe- nago no nemotnang lo kuklue piam mo pluok go, ngga tang so Mot go sagui tang so, plesi go ta sono Mot lo nemotnan iti go, plesi lo nemotnang tategan dok go klong go, plesi go nan ket sogo no, dagu sogo no tega go, ⁴⁷ No, nemotnang kunala iwot-dak go, dabui ba lo saula nemo go sip no, Mot sono klum dewi Mot sono wadong go, Ngge kalik so pu go: ' Genamnang kuklue piam taybat Mot sono mo pluok sang!' ⁴⁸ Nggano, tandali mot sono iwot-dak go, dabui lo naklay iwot go, keng go, nemotnang so tega go nan no, ngga ey Mot sono dewi ba lo wadong go, Mot lo iti go nan ngge sono iwot go dewi wadong go Mot sono, Mot lo kuoy go Yakena ngge Woy Wali Yap ey buong go nan sono dabui iti go, Mot lo nemotnang go dewi se tup sang! ⁴⁹ Nemotnang go dewi ngga nase tup sang! Mot go sip Ki Wali Yakena sik so se tup sang! ⁵⁰ Mot go Blung Mot sono kuklue mo pluok go ngge go kuklue kai go se suep-sing sang. Nemotnang lo kuklue pluok go ngga naklay se suep-sing. Nemotnang so dok go saula go nemu damoy so, nemotnang nogo, Mot sik sogo klum se taling sang. Nemotnang nogo Mot go klum taling genang ⁵¹ Yang, nemotnang ngga, Mot tete so kuoy go blung, nan Mesir sik so, kebali ide eygo ba sik so Mottang glo lo wawi go mo pung go gemang. ⁵² Motnang golo, nemotnang go uwadong go sono go mea ikum. Mot go tamot ey Mot go blung eygo lo Mot sono keklak go dewi sono go Mot lo mea ikum sang. ⁵³ Yang, Mottang golo Mot tang go blung so nemotnang, kukunan sogo saula-saula sik so mo kuoy go. Nan Mesir sik so babu asinang, wawi go pung gono mo kuoy,, oh Woy Wali Iram, Israel go Ki Wali Iram!" ⁵⁴ Woy Wali Iram nogo dewi ngga naklay yam so Salomo lo klak gono, nemot wisi so ip go, Woy Wali Iram go demusung sono iwot gono, nemot masi unuik go ut sono ta sra go, ⁵⁵ Ngga ey ip go, Blung Israel nogo taitiklum tabu gemang wit. Nggekalik don ey gemang pu-nawon: ⁵⁶ "WoyWali Iram go sui iwayse iti! Nemot lo blung Israel naklay nogo so, nimla genang sogo sip mo iti. Nemot tang golo pen go kalik so. Nemot lo pen go nebut klayanang go kua lemoy go kua gabe. Nemot go tamot Musa go lom lo pen go kalik so. ⁵⁷ Woy Wali Iram lo, imot nogo, babu asinang no semu go kalik so mea semu dali. Nemot lo imot yakua itak, ngga ey imot Nemot logo yakua betep. ⁵⁸ Nemot lo imot go dabui Nemot sono mea lek, Nemot go tap-tap naklay lo kuklong genang sogo. Ngga ey Nemot go demutrui naklay no keng genang sogo. Imot go babu asi no Nemot lo pen go kalik so. ⁵⁹ Nebut pen ngga-a genam lo Woy Wali Iram, Ki Wali Iram go suongku no gabe pen-asitugu. Kublo sogo, kuklik ba nogo, Nemot lo Nemot go tamottamot, blung Israel no go nemudi so mea tetali. Senang so kuno kuno mea twtaling. ⁶⁰ Saula-saula kukunan blo sogo naklay senong genang, seni so, Woy Wali Iram ngga, Ki Wali Iram gabe,meno-meno kua gabe. ⁶¹ Motnang go dabui naklay, Woy Wali Iram, Ki Wali Iram seguong sono se glok. Ngga ey, Nemot go demu trui no pen go kalik so se uwali nggeasui lemoy go kalik so se wali." ⁶² Nggano, deguena ey, blung Israel naklay eygo lo kerlam so taiti puit genang sogo menay Woy Wali Iram go suongku no gemang tong-sing. ⁶³ Woy Wali Iram nogo so Salomo lo tonggosing go sapi, 22 ribu yam so, nggano kambing-domba 120ribu yamso. Deguena ey, blung Israel naklay eygo lo, Woy Wali Yap ngga,tabuwit go gemang tenuing-nenawon. ⁶⁴ Ku ngganemot dali no, deguena lo Woy Wali yap seboy sogo sip dabui ba sogo gemang teguop-sing nawon. Yang, taitinang sogo menay pupuit go, dam genang so go taiti, susuoy genang sogo taiti go benay, demusung taiti puit genang sogo sip ngga so gemang go tang sogo so ku ngganemot dali no gemang teguop-sing nawon. ⁶⁵ Nggano, ku ngganemot dali no Salomo lo Blung Israel naklay ey walop gemang pla. Nemot eygo blung naklay ey, yangga, blung miam dega go, Hamat sik so weng go, e... bu Mesir no yam, naklay Woy Wali Iram, Israeal go Ki Wali Iram go suongku no pluep-lak go. ku 7 yam no, ngga ey, ku 7 dali tebok go. Ngganemot nogo ku 14 yam no gemang pung. ⁶⁶ Ku 8 tete sogo no, nemot lo saula ngga itak go gemang klong-lak. Nemotnang lo deguena tatui go no, tenda ba sonoyakay ey gemang klong-lak. Way Wali Iram lo tasuey Daud Nemot go tamot ey Nemot go blung Israel eygo no puok go tang soso so.