¹ Deguena kabung, Syeba sik sogo, Salomo ey Woy Wali Iram eygo nogo nebut tu go. Nggano Salomo go senong kalong eygo ngga tekateki lo yatrang genang so gemang weng. ² Nemot nemogo ple sedue tala daley kangok go ey gemang wenglak Yerusalem sono. Nemot go menay unta miam eygo blo no rempah-rempah ey king go gemang weng-lak. Nggano taut permata mata dega so king go gemang weng-lak. Pung gono, Salomo sono weng go gemang ip-lak. Ngga ey nemot go dabui ba sogo duduing gemang pen Salomo sono. ³ Ngga ey Salomo lo nemot go usi naklay gemang pen sing suey so. Deguena lo kua pen go kua. ⁴ Ngga sik so, deguena kabung Syeba sik sogo ngga, deguena Salomo go senongkalong ey Salomo lo Woy Wali Yap ey buong go ikum go gemang senong. ⁵ nemot go ten dam sip sogo ten ey, nemotnang suing go dedam genang ey, nemot go kebali sedue lo ten iiti go, ten so iti go, bu so iti go, nemotnang go amka kok go, taiti so Woy Wali Iram sono pupuit go. Nemot go dabui ey naklay kukui go nemu-a bubung. Nebut kua tuot. ⁶ Ngga ey, deguena sono gemang pu-tenatun: "Yang seni seni solo, genam lo genam go nan no tup go nebut. Mot tang go sogo ey mot go senong kalong ey go sogo nebut! seni so lo." ⁷ No, nemotnang go nebut nogo genam kua keng, e... genam weng go, genam tang so nemu lo ikum nogo gabe keng tu. Genam nogo naklay maning kua pen go, no, mot go senong kalong eygo naklay kangok dega seni, genam lo tup go kalik so kua. ⁸ Mot go koybutasemu, mot go kebali sedue mot no kebali so kuno-kuno sesmu go, mot go senong kalong-a tutup go naklay, seni so yakay kangok. ⁹ Woy Woy Wali Iram, Ki Wali Iram go sui iway gabe iiti-bitugu! Nemot logo tang so, Nemot lo mot mo taling, Israel nogo sip suing mot no mo iti. Woy Wali Iram go klum blung Israel nogo senang so mea gigit. Nemot lo mot mo taling Israel go deguena so, nemudi sogo, seni eygo pupluok genang sogo so!" ¹⁰ Ngga ey, deguena nogo so, talenta emas 120 so, rempa-rempa miam dega seni so, ngga ey permata-permata duoy blo dega sogo,. Rempa rempa ngga kalik miam dega sogo tandali go meno logo yakua iti. Deguena kabung Syeba sik sogo lo deguena Salomo no iti go kalik go. ¹¹ Nggano, Hiram go bayi kangok-kangok golo Ofir sik sogo di cendana miam dega so king go, permata-permata miam dega ey, nggano permata-permata miam dega ey, duoy blo dega go ey king go Gofir sik so gemang weng. ¹² Di cendana ngga Woy Wali Yap ey, deguena go yap eygo so gemang semu, nggano kecapi, gambus, usam so kokluo go nogo se gemang semu dali, di cendana ngga kalik go, tandali go kua pung go so, e... ngeasui go ku no gabe pung. ¹³ Nggano, deguena Salomo lo, deguena kabung Syeba sik sogo no, nemot lo duing go nemukum go naklay gemang iti dali. Yangga nemot lo wadong go naklay gemang itak dali, deguena go klum tang sogo so. Nggano, deguena kabung nan Syema sik sigi tandali nemot go nan nogemang klong. Nemot go plesedue ey, nemot go pegawai naklay ey. Deguena Salomo go taut miam dega so gemang lemoy. ¹⁴ Salomo sono demusamon iiti go yagui klaya ba nogo nemot go ide 22.977 talenta emas. ¹⁵ ngga,taut so nay go sedue logo ey kua i gi gemang. ¹⁶ Deguena Salomo lo taming kangok-kangok go, 200 yam so demusamon lo gemang pi-sing. ¹⁷ Nggano taming seguay go 300 yam so, semusamon nedik golo gemang semu dali. Nggano, mina nanglik eygo lo, taming seguay go klaya gemang semu dali. Ngga ey, ngga naklay, deguena lo istana Libanon duen no gemang ta-sing." ¹⁸ Ngga ey,, nemot go sipsuing kangok go deguena lo gaja sabung lo semu gono demusamon lo gemang sebutsing. ¹⁹ Nemot go sipsuing dega ngganemot go tenglam 6 da so mea klak. Sipuing ngganemot go taton idi nogo, blo nogo muong-muong so. Nemot go ta tui genang sogo dega nemotgonemotgo idi nogo, Ngga ey, Singa namon ey nemot go tegui genang nogemang kong dsli. ²⁰ Tenglam keklak go ds 6 blo nogo, singa 12 yam so way-way so gemang iwot-sing. Ngga kalik go, sip meno saula-saula go sipsuing nogo kua semu klayanang go. ²¹ Deguena Salomo go taut naklay demosamon lo semu go, bu drop genang sogo, taut, tendam genang sogo taut, nemot go yap duen Lebanon sogo nogo, naklay demusamon lo semu go. Perak sik so semu go kua. Yang ku deguena Salomo nogo, perak ngga seni kua go kalik. ²² Yang, deguena Salomo nemot go bayi kangok go miam ey gemang. Tarsis sogo, biap klaya go Hiram ey klaya so melaoy go. Yang yagui nanglik bano Tarsi sik sogo bayi klong-weng go, debusamon, perak, nggano gaja sabung, wi merak so king go uweng go. ²³ Taut ey senong kalong eygo deguena Salomo logo naklay kangok dega. Deguenan deguena temu kukunan blo sogo temu eygo yakua i. ²⁴ Kukunan blo sogo seduekabung naklay lo deguena Salomo no tegu genang so uusey, nemot go senongkalong ey go tup genang sogo so, ngga ey Ki Wali Iram lo nemot go dabui ba no tetaling go nebut tup genang sogo so. ²⁵ Nemotnang sik sogo lo, taitinang sogo taiti iti go gemang uweng-lak. yangga; perak lo semu go taut, demosamon lo semu go taut, amka teguop go, don ple, remparempa, menay kuda, nggano bagal. Yagui no-yagui no ngga kalik so gemang lelemoy. ²⁶ Salomo lo kleta gemang yaluim-sing, ngga no plesedue kuda blolo koklonh go, ngganemot nogo, nemot go kleta 1400 yam so gemang yaluim-sing. Nggano, sedue kuda ey go 12 ribu yam so, yakenayakena Yerusalem ba no suing-sing go. Deguena yay so yakena Yerusalem ba no susuing go. ²⁷ Yerusalem no, demukalik so perak sik so Raja lo gemang pi. Ngga ey, do aras meduim blo lo nemot lo di arah kalik so gemang kuali-sing. ²⁸ Salomo go kuda ngga Mesir sik so kuk go weng go, deguena go nay so idok go sedue lo, miam ey drang lo king go weng go. ²⁹ Mesir sik so kleta iti go pung go, nemot go drang, 600 sikal perak, klaya go. Nggano, kuda klaya go, 150 sikal perak yam no. Ngga kalik so naklay ngga deguena lo drang lo king go, deguena Het, nggano, deguena Aeam ey golo drang ngga iti go.