¹ Deguena Salomo lo saula meno kabung miam dega so dabui mo iti. Piraun go duenun, nggano, Moap kabung, Amon kabung, Edom kabung, Sidon kabung, nggano Het kabung. ² Seni so, Saula-saula ta ng ngga sogo, Woy Wali Iram lo blung Israel nogo mo pen: "Nemotnang ey go ta kua keduik! Nggano, nemotnang lo motnang eygo takua keduik dali! Nemotnang lo motnang go dabui nemotnang go ida-ida meno sono rlo genaning! No Salomo go dabui nemotnang no iti go tang so. ³ nemot go senunang deguena-eguena go denunnang 700 yam so, nggano koybutasemu sik sogo 300 yam so. Ngganemot nogo nemot go dabui lekok go saula meno go ida sono ne lekok. ⁴ Salomo yam so sedue so lemoy go nogo, senunnang ngganemot lo nemot go dabui iwotdak go ida meno-meno sono gemang iwot. Way Wali Iram, Ki Wali Iram sono dabui logo nglangin Daud kalik suey so kua keng. ⁵ Ida Asiytoret, sedue Sidon go ida no Salomo keng go, nggano Milkom sedue Amon go ida sukkua go. ⁶ ngga tang sogo so, Salomo lo Woy Wali Iram nogo kuklue pia go taybat mo pluok-ngam, Woy Wali Iram sonogo, nemot lo Woy Wali Iram nogo dabui naklay lo kua keng. Nemot go nglangin Daud logo kalik so kua keng. ⁷ Ku ngganemot nogo, Salomo lo meduim blono sedue Moap go ida piam go, Kamos no takong genang sip gemang semu. Yakena Yerusalem go woyklak idi no. Ngga no ida Molokh ida kuaseni go, sedue Amon ey go nogo so. ⁸ Ngga kalik dali so nemot go senunnang naklay nogo gemang klik-sing. Ngga wy nemotnang go ida nogo sogo menay gemang tong-sing dali. ⁹ Ngga ey, Salomo nogo dabui piam koy Salomo nogo Woy Wali Iram, Israel go Ki Wali Aya lo gemang taling. Nemot no danamon so saysuk mo taling go nogo. ¹⁰ Ngganemot sogo Woy Wali Iram lo mo pu: "Ida meno-meno no kua keng. No, nemot lo kua keng ne, Woy Wali Iram lo pen go nogo. ¹¹ Ngga ey, Woy Wali Iram lo Salomo no pu go: " Ngga kalik so mo lemoy to go, Genam go tegadi ey demu ey mot no iti go ngga kua keng go tang so, mot go sipsuing ngge Genam lo mea sret-sing, mot sik sogo. nggano, mot go koybutasemu go ta sono mea iti. ¹² No, nggeasui go namboy Genam lo yakua semu srelu gabe. Mot go aya Daud go kekeng duk tang sogo so. Mot go duo go ta no Genam lo ngga mea sret lu. ¹³ Nemot-a ngga kalik go, naklay mea kua sret-sing. Suku klaya mot go duo no Genam lo mea itak, Genam go tamot Dajd tang sogo so. Ngga ey yakena Yerusalem tang sogo so, Genam lo mo kuoy go" Salomo go plesi so. ¹⁴ Nggano, Israel nogo plesi Woy Wali Iram lo gemang sengrlok, Salomo ey ple tui genang so, yangga, Hadad, sedue Edom. Nemot ngga,Edom go deguena sik sogo danon. ¹⁵ Daud lo deguena Edom but go don pedueng go dali way gemang lemoy.Ple wengkabui Yoap klonggo, sedue ple bano kebung go tuet genang sogo no,sedue Edom naklay but go gemang kebong-sing. ¹⁶ Ngga so go, Yoap ey blung Israel ey banu 6 yam so gemang suing. Nggano, sedue Edom sedue seguong-a naklay yam so gemang tuk-sing. ¹⁷ Hadad ngga sedue kabung Edom ey kap go nemot go nglangin go kebali sedue-a itak go kay go, Mesir no namboy suing genang so, Hadad ngga maning denok sogo no. ¹⁸ Midian sik so Pean sono, nemotnang ip go gemang klong, Sedue temu Peran sik sogo ey wawi go gemang klonglak. Mesir no nemotnang pluep gono, Piraon , Piraon Mesir go deguena no klong go gemang tegu. Piraun lo nemotnang nogo yap gemang itak, te iti genang sogo tegadi gemang do, nggano, nan tebot gemang itak dali. ¹⁹ Firaun damoy sogo, Hadad nogo suey so gemang taling, ngga ey Firaun lo kabung meno gemang itak Hadad nogo senunnang so, yangga Firaun tang go senun go sat, permaisuri Tahpenes. ²⁰ kabung sat Thpenes ngga lo duo sedue denok klaya gemang tui, sui Genubat, Tehpenes lo babu go, Firaun go Yap ba no, Firaun go duo-yap nasip no. Genubat Firaun go yap ba so susuing, Firaun go danonang nesip so. ²¹ Hadad Mesir sogo no tup go; Daud kebong go, asibabunang ey mo yaluim go nebbut, ngano, daud go plesedue wengkabui Yoap mo kebong dali. Nggano, Firaun no pu go, "genam itak go at go yakena no ya klong!" ²² Ngga ey, Firaun lo usi go; ' genam sik sogo sogo sogo mot go wali nogo kua nemot? Ngga tang so, mot go nan no klong sogo so duen-togoy?'' Nemot lo way so pu go, genam sogo sogo kua nemot kua. no, genam mot lo itak klong so be!' ²³ Wo Wali Iram lo Salomo no go plesi meno gemang senglok dali, yangga, Rezon, Elyada go danon. nemot go tuiam Hadadezar , Zoba go deguena no tui go duo. ²⁴ nemot lo sedue-sedue nemot mit no yaluim gono, gerombolan wengkabui so lemoy go. Daud lo nemotnang tuk genang sogo nogo, nemotnang ngga Damsyik sono klong-lak go, nggano gemang susuing. Ngga ey, nemotnang lo deguena so gemang iti Damsik no. ²⁵ Nemot ngga Israel go plesi so gemang lemoy, Salo mo uwali go ku naklay nogo. ²⁶ Nebat go danon Yerobeam, Efraim tang sik sogo duo Zereda nemot go unen go sui Zerua, nggano lo deguena nogo sagui gemang pung dali. ²⁷ Nemot lo deguena sono plesagui semu go ngga, Salomo lo demu tema Mili no buong go ngga, nemot go nglangin Daud semu lo semu go sang kota Daut ey wik go tang sogo so. ²⁸ Yerobeam ngga, kunala kalong ey go sedue denok, Salomo lo ikum go, denok ngga kebali kangok go denok. Yusup logo duo-yap naklay lo pupuok go kebali yay suing genang so, Salomo lo nemot gemang taling. ²⁹ Ku meno no, Yerobeam Yerusalem sik sogo pung gono, nabi Ahia Silo sik sogo sedue, amka inim lo kebet go nemot mit no gemang pung. Nemot namon seguong-a usu daboy sogo. ³⁰ Ngga ey, Ahia lo nemot go amka demening go ngga tegek go, idi namon ey gemang lemoy. ³¹ Abia lo Yerobiam no gemang pu:: "Tanamon yam so sran go ngga mot lo itia! Woy Wali Iram Israel go Ki Wali Iram lo ngge kalik so pu go, Kladian ngge Genam lo Salomo go ta sik sogo mea sran-sing, ngga ey, suku 10 yam so mot go ta sono mea itak. ³² Suku klay-a nemot no mea sitak go gigit, Genam go tamot Daud ey kota Yerusalem genam lo saula Israel sik so Genam lo mo kuoy go tang sogo so. ³³ Seni so, Nemot lo Genam mo itak, ngga ey, ida meno Asytoret, sedue Sidon go ida, Kamos sedue Moap go ida, nggano Milkom sedue Amon go ida no susubu mo wit, ta mo kong, Nemot lo Genam go tap no kua keng, Genam lo iwat go seni eygo-a kua keng go pupluo. Genam lo pu go taling go demu nogo nglangin Daud kalik so kua keng-duk. ³⁴ Kladian ngga naklay nemot go ta sik sogo naklay Genam lo kua iti gabe. Nuey-a, nemot deguena so Israel no sing go e.. nemot go wali naklay se suing. Genam go tamot Daut genam lo kuoy go, nemot lo suey so Genam go demu trui no dabui lo keng saniom go tang sogo so. ³⁵ Nemot go sipsuing ngga nemot go danon go ta sik sogo Genam lo mea iti. suku tanamon dali mot go ta sono mea itak. ³⁶ Nemot go danon no suku klaya-a mea itak, ngga ey Tamot Daud go duo-yap, senang so mea gigi, Genam go suongku no Yerusalem genam go suinang sogo so, Genam lo mo kuoy go kota ngga so. ³⁷ Ngga no, mot-a genam lo gabe iti, mot lo mot go duduing no tamalk genang sogo so. Israel nogo deguena se suing genang. ³⁸ Nago no, Genam lo taling go demu trui no suey so mot lo tamlak go koklong go, nggano nemudi so seni ey go tap Genam lo taling gono suey so Genam go nemukuno keng go, Genam go tamot Daud logo kalik pupluok go, Genam lo mot go duo-yap don ey mea iti Daud nogo kalik so. Genam lo tamot Daud no iti go kalik blung Israel mot go ta ba sono mea iti. ³⁹ Ngga tang sogo so, Daud go duo-yap genam lo ku sono mea nik, no, senang sogo nang so kua." Salomo kebong go, ⁴⁰ Ngga ey Yerobeam but go kebong genang so, Salomo lo gemang usey. No, Yerobeam-a nan Mesir sono kap go gemang son. Deguena Mesir Sinak sono. Nenot nan Mesir so susuing go, e... salomo kebong gono gemang weng. ⁴¹ Salomo lo itak go, nemot lo buong go, nemot go senong duduing kalong eygo ngga naklay, sam Salomo go wali ba no naklay mo klik gemang. ⁴² Salomo lo Yerusalem no ta mlak go yagui 40 yam so. ⁴³ Ngga ey Salomo kebong go, asibabunang ey Yerusalem no, nglangin go kota no gemang tuet. Danon Rehabeam lo deguena Israel nogo gemang suing, nglangin wayso.