1 Israel saula Mesir sik so pung go sik so i go yaguisa empat ratus delapan puluh no, yagui empat tete banu Ziw yangga banu namon tete Salomo deguena so Israel no mo tuik go no, Woy Wali Yap Teguop gemang buong. 2 Deguena Salomo lo, Woy Wali Iram nogo so Woy Wali Yap buong go. Yap ngga, nemot go, masiwalong enampuluh hasta, kuibata dua puluh hasta, walong blo sono go tiga puluh hasta yam no. 3 Woy Yap Teguop ngga go seboy no klik go Salyap, masi walong dua puluh hasta Woy Yap go kuibata ey kerlam. Nggano, kuibata sepuluh hasta, Woy Yap Teguop go seboy sono iwot. 4 Nggano, Woy Yap Teguop ngga go dualiput pung-sing go gemang sebut-sing dali. 5 Ngga ey, Woy Yap Teguop ngga go degu-degu tong-sing go. Nemot go dia sip bata go nogo, ku da-blo da so ngga naklay klik-sing go, 6 Ku da nogo kuibata lima hasta so, nesip da nogo kuibata enam hasta yam no, nggano, blo da nanglik tete sogo kuibata tuju hasta yam no. Ngga ey, nemot go "ceruk-ceruk" Woy Yap Teguop ngga naklay nogo gemang glung-sing, ding dia idi naklay temoy nogo, gemang glung-sing. Ngga tang so, Woy Yap Teguop ngga go ding put kua tebo-sing. 7 Woy Wali Yap Taguop ngga klik sogo nogo, nemot go demunang dali dali mo semu-sing, nemot so kiklik go ku nogo, sogo sogo kluim, tengang kluim nang taut kebali so sesemu go kluim nang kua tup, 8 Ku da idi nogo yataput, Woy Yap Teguop go nesip dabui no gemang tong. Blo sono go tenglam nesip tap no gemang kong, blo sono klak genang. Nggano, nesip da sik so, nangglik da sono go klak genang. 9 Woy Wali Yap Teguop ngga buong go, siaras pap lo klawasong gemang gang-sing dali. 10 Degu tebok go Woy Wali Yap Teguop ngganemot yam so kluing-sing gono, yangga, nemot go walong blo sono go yam lima hasta yam so, Woy Wali Yap Teguop ngga yam so gemang kuing-sing, di aras seguong lo. 11 Nggano, Woy Wali Iram go nebut ngge kalik so Salomo sono gemang pung: " 12 Woy Yap Teguop ngga so mot buong tegoy go ngga, nago no, Genam lo mo taling go demu trui ey demu-demu naklay eygo, suey so dabui lo tupduk so, kengduk so pluok tegoy go, ngge sono-ngga sono mot kua long go. Mot go aya Daud no tegadi dok go naklay ngga, mot sono Genam lo mea lemoy seni! 13 Yangga, sedue kabung Israel nesip so Genam mea susuing. Ngga ey, Genam go blung Israel banom go meakua itak." 14 Woy Yap Teguop ngga yam so Salomo lo buong go. 15 Woy Yap Teguop ngga, dabui ba idi ding, di Aras pap lo gemang tebok-sing. Waklap blo sikso iti go e... klawasong no pung. No, waklap-a, di Sanobar lo gemang sey-sing. 16 Nggano, namot go nasong sono, duapulu hasta so, Woy Yap Teguop ngga go taton sono Degu Teguop Dega* dipap Aras seguong lo gemang klik. Ku sik so iti go e... klawasong no pu go, ngga, di Aras seguong lo klik go. Ngga, Degu Teguop Dega* go. 17 Nemot go yam, empat pulu hasta yam no. Sip bata go ngga, Woy Yap Teguop ngga seboy sogo. 18 Woy Yap Teguop ngga dabui ba idi di Aras lo king go. Di ngga, nemot go babu, labu seni yam no nemot go un bata go nogo kalik. Ngga naklay, di Aras seguong lo klik go, demo klayanang go kua ikum. (Degu Teguop Dega* = kamar maha kudus) 19 Woy Yap Teguop ngganemot ba no, nasong temu sogo sip ngga ba no, Woy Wali Iram go Tegadi Peti* gemang kong. 20 Nasong sogo sip ngganemot go yam, duapulu hasta yam no. Sip ngga naklay emas murni lo gemang sebut-sing. Ngga ey, di Aas lo demusu gemang klik dali. (Tegadi Peti* = Peti Perjanjian) 21 Dabui ba idi, Woy Yap Teguop ngga emas murni lo, Salomo lo ut go gemang sebut-sing. Nasong temu sogo sip ba nogo, lante miam dega so gemang glung-sing. Lante ngga, emas murni lo ut go gemang sebut-sing dali. 22 Woy Yap Teguop ngga, emas murni lo ngga kalik naklay ut go gemang sebut-sing. Nemot go nasong sogo degu, emas murni lo naklay ut-sing go gemang sebut dali. 23 Ngga ey, mlaydi* sik so, kiwalitamot* namon ey nasong sogo sip ngga no gemang klik. Nemot go walong blo sono go, sepuluh hasta. 24 Kiwalitamot* meno go tabang go walong, lima hasta yam no. Sering sik so i go e... tabang go sering meno no. 25 Kiwalitamot* namon tete sogo walong kerlam, sepuluh hasta dali no, nemotnamon go yam kerlam. Nggaey, nemot go saysuk go babu kerlam. 26 Kiwalitamot* go walong blo sono go, sepuluh hasta. Namot namon walong, kerlam. (mlaydi* = kayu minyak) (kiwalitamot* = kerup) 27 Ngga ey, degu ngga nesip no kiwalitamot namon ngga gemang kong. Nemot go tabang bata-sing go, ding sono gemang tuing. Ngga ey, meno go tabang ding meno sono gemang tuing dali. Nggano, way-way so nemot namon go tabang sring blo nogo way-way so degu nesip no gemang tegu-sing. 28 Kiwalitamot namon ngga, emas lo ut go gemang sebut-sing. 29 Woy Yap Teguop ngga naklay go ding temoy no go sam, kiwalitamot ey di Kurma ey, diun mo bata go ey gemang klik-sing. Dabui ba idi nogo, dia idi nogo naklay ngga kalik gemang klik-sing. 30 Woy Yap Teguop ngga go waklap naklay emas lo ut go gemang sebut-sing, dabui ba ey dia idi ey, naklay emas lo gemang sebut-sing. 31 Nasong sogo degu ngga sono degut genang sogo yataput, mlaydi sik sogo di lo Yataput gemang semu. Balak ngganemot kango segi lima sogo. 32 Yataput mlaydi lo semu go ngga blo nogo sam, kiwalitamot, dikurma, diun bata go sam gemang klik. Sam ngga naklay, emas lo ut go gemang sebut-sing. 33 Sip bata go sono degut genang yataput, ngga kalik dali mlaydi sik sogo balak segi empat lo semu go gemang kong. 34 Nggano ey, disanobar lo yataput namon dali gemang semu. Yataput namon ngga, idi sik sogo mea padu, ngga ey idi sik sogo mea padu dali. 35 Yataput namon ngga temoy nogo sam, kiwalitamot, dikurma, diun bata go klik-sing gono, sam ngga emas lo ut go sebut-sing. 36 Nggano, bauk idi-aidi* nang sogo, demu lo gemang klik. Dabui ba idi lo tala nangglik ey, demu pahat goloklik go. Ngga ey, tala klaya dali, diaras lo gemang klik. (bauk idi-aidi* = pelataran) 37 Woy Yap Teguop ngga nemot go demu kutrui keduong so kong go yagui namon-namon tete no. Yangga, banu Ziw ba no. 38 Banu Bul ba nogo. yangga, banu delapan tete no. Nemot go taut naklay, dali-dali yam so mo ta go ku no. Yang, Woy Yap Teguop ngga, yagui taidisonamon ba no gemang buong.