¹ Hiram, deguena Tirus lo, tamot-tamot mot-dak go Salomo sono gemang weng. Nemot tup go; nglangin Daud way so deguena sogo, Salomo-a mo tuik Seni so, Daud tamlak go naklay nogo, Hiram, deguena Daud eygo, andua so ta mo keduik. ² Ngga blo idi lo, Hiram sono Salomo lo tamot mot-dak go, ngge kalik gemang pen: ³ "Mot mo senong, genam go aya Daud lo ,Woy Wali Iram, Ki Wali Iram go sui iway pu genang sogo Yap maning kua buong. Nemot go plesi lo nemot sono plepupung go tang sogo so. E... plesi naklay, Woy Wali Iram lo nemot go masi ba no naklay gabe unuik-sing. ⁴ No, ngengam yakay ple kua go ku, genam sono Woy Wali Iram lo mo iti. Ngga ey, plesi kua, ide diding wong kalong kua. ⁵ Yang seni so, Woy Wali Iram, Ki Wali Iram go sui iway pu genang Yap, buong so mo duing-tu gabe. Genam go aya Daud no tegadi so Woy Wali Iram genam go Ki Wali Iram lo ngge kalik dok go kalik: "Mot go duo mot way so Genam lo taling go, mot go sipsuing blo no suing go. Genam go sui iway lek genang sogo Yap nemot lo mea buong-yon!" ⁶ Ngga tang sogo so, sedue pu go di aras meduim Lebanon sik sogo nase tuo-sing! Genam go kebali sedue, mot go kebali sedue ey kerlam so mea klong. Nggano, mot go kebali sedue go seguot duoy, kata so mot lo pu go, genam lo mea iti. Ngga, mot tang go mo senong. Genam go kebali sedue sik sogo, ditutuo suey so mlay go kua. ⁷ Salomo lo pen go nebut ngga, Hiram tup go, nemot go dabui yakay dega ey. Nggano, gemang pu: "Nggeasui go ku no, Woy Wali Iram go sui-a, iway gabe iti! Seni so, kunala senong kalong eygo duo-a Daud nogo mo iti. Blung kangok go ngge, nemot lo tamlak genang so!" ⁸ Nggano, Salomo sono sedue mot-dak go klong go gemang pen: "Mot lo pen go nebut ngga, genam mo tup! Mot lo duing go kalik, di Aras ey di Sanobar eygo ngga, naklay genam lo mea kebali. ⁹ Genam go kebali sedue lo meduim Lebanon sik so biap sono lek go mea li. Biap blo lo kebleng kalik so mot lo genam no taling go sip sono mea lek-sing. Nggano, mea plet-sing. Ngga sik so, ngganemot mot lo king genang. No, genam go yap tenglam naklay nogo ten-a mot lo se iti." ¹⁰ Nggano, Salomo sono, di Aras ey di Sanobar ey Salo mo lo pu go kalik so, mata so, Hiram lo king go gemang weng. ¹¹ Ngga ey, Hiram sono, Salomo lo gandum dua puluh ribu ton(kor)* so, mlay dua puluh ton(kor)* so, nggano, mlay temu nedik go tete Hiram go yaptenglam nogo tendam genang so, yagui no-yagui no Hiram sono, Salomo lo king go gemang koklong. ¹² Salomo sono Woy Wali Iram lo senong kalong eygo, Nemot lo tegadi so dok go kalik gemang iti. Nggano, Hiram ey nemot ey tegadi dok go gengam yakay ta gemang keduik. (*kor = ton ) ¹³ Don ey go kebali sedue nan Israel sik sogo naklay deguena Salomo lo gemang usi-sing. ¹⁴ Nemot lo pu go, nemotnang Libanon meduim sono gemang klong-lak. Banu no banu no sedue sepuluh ribu yam so koklong. Meduim Libanon so, banu namon so nemotnang suing gono banu namon dali nemotnang go yap so mea suing. Ide eygo kebali ngga Adoniram lo wengkabui gemang suing. ¹⁵ Salomo go kebali sedue, tuju puluh ribu yam so. Ngga ey, meduim so pahat lo pupung go sedue, delapan puluh ribu yam so. ¹⁶ Ngga ey, kebali-kebali ngganemot go wengkabui tiga ribu tiga ratus yam sogo lo blung kebali so sesemu go blung nemu gemang luluik. ¹⁷ Deguena lo pu go, demu kangok kangok go duoy blo dega sogo plo-sing go, yap ngganemot kutrui ta genang sogo so. ¹⁸ Nggano, Salomo go kebali sedue ey Hiram go kebali sedue ey, nggano sedue Gaba eygo lo di ey demu ey pahat lo pung-sing go dali-dali gemang ta-sing, Woy Wali Yap buong genang so.