¹ Salomo lo saula Israel naklay tamlak go. ² Ngge, nemot go sruom tegay, woy-woy gabe: Zadok go danon Azarya, Woy so gemang suing; ³ Sisa go danon namon Elihoref ey Ahia ey *neneboy go sedue so gemang suing, Ahilut go danon Yosafat Bemey* so gemang suing, ⁴ nggano, Yoyada go danon Benaya, Plewengkabui so gemang suing suing, Zodak ey Abyatar eygo woy-woy* so geman suing. (*neneyboy go sedue = panitra) (*Bemey = bendahara negara) (*woy, woy-woy = imam, imam-imam) ⁵ Nggano, Natan go danon Azarya wengkabui-wengkabui daerah yaysuing genang so gemang suing; Natan go danon meno Zabut deguena nogo woy ey andua eygo so gemang suing; ⁶ nggano, yap "istana" yay suing genang so, Abisar lo gemang suing; Abda go danon Adoniram lo kebali ide eygo wengkabui so gemang suing. ⁷ Deguena Salomo ey, nemot go yap eygo nogo ten so iyaluim go, wengkabui-wengkabui duabelas yam so. Ngga naklay, blung Israel lo, naklay klay-klay go idekeba,. Banu no-banu no, yagui klaya go ba nogo mea yaluim. ⁸ Ngge, nemotnang go sui-sui gabe: Efraim meduim nogo yaluim genang ngga, Ben-Hur lo; ⁹ "Markas" nogo ngga, Ben-Deker lo Saalbim nogo Bet-Semes nogo ngga Elon-Ben-Hanan nogo; ¹⁰ Ben-Heseed; nan Arubot nogo; Nan Hefer ey nan Sokho naklay eygo nogo. ¹¹ Ben-Abinadab nan meduim Dor nogo, Salomo denon Tafat nemot go senun. ¹² Ahilud go duo Baana, Taanakh ey, Megido eygo nan Bet-Saan idi, Sartan Yizreel ku idi no. Bet-Saan sik so e... Abel-Mehola, e... Yokmeam idi sono. ¹³ Ben-Geber, Ramot-Gilead no, e... Hawot-Yair no. Yair ngga Menasye danon Gilead sogo. Nan ngga, Basan sogo Aegob, nemot lo tamlak go. Nan ngga sogo, yakena kangok-kangok go demutema lo teguot go yakena yataput tembaga lo semu enampuluh yam so. ¹⁴ Ido go danon Ahinadap Mahanaim sogo. ¹⁵ Naftali no Ahimaas, Abimaas nemot lo Salomo go denun Basmat gemang iti dali senun so. ¹⁶ Husai danon Baana, Asyer ey Alpt eygo no tamlak. ¹⁷ Paruah danon Yosafat lo Isakhar no tamlak. ¹⁸ Ela go danon Simei Benyamin no. ¹⁹ Uri danon Geber nan Gilead no. Gilead ngga nan Sihon deguena Amori ey deguena Basan Og eygo idi no tamlak. Geber ngga-a nan ngga nogo Israel sik sogo wengkabui klayduo, nemot-a gemang. ²⁰ Sedue kabung Yahudi ey Israel ey ke go miam dega so. Biap kaseglok kalik, tagu yakua i. Ngganemot nogo, yakay ba lo ten dedam bu dederop. ²¹ Salomo go sipsuing blongdon naklay nogo, nemot don seguong so. Yangga, bu Efrat sik so iti go, e... sedue Pilistin go nan no. Ngga ey, e.... nan Mesir go sang blo no pung. Salomo sono, blasteng nemotnang lo iti go uweng, Salomo maning wali go ku nogo. ²² Ku ngganemot nogo, Salomo nogo sogo tendam banu klaya go ba nogo, tepung teguop tiga pulu *kor yam so,. Tepung temu dali enam puluh kor yam so. ²³ Nggano, sapi babu go sepuluh, nggano, sapi temu duapuluh so. Ngga ey, domba seratus so, menay temu, kambing, rusa, kijang, popong go tagu yakua i. (*kur = ukuran berat seperti ton) ²⁴ Bu Efrat ngga idi nogo nggakalik so, nemot lo ta mlak go. Efrat sik so iti go e... Gaza no. Nggano, Efrat bu sogo deguena-deguena nemot go nan naklay sogo, yakay seguong so. ²⁵ Yang, sedue kabung Yehuda ey Israel eygo naklay, yakay ba lo uwali. Nemot go-nemot go anggul usu ey diara eygo ba lo yakay ey susuing-lak, Dan sik so iti go, e... Bersyeba no. Salomo lo tamlak go ku naklay nogo. yakay seguong so. ²⁶ Salomo go kleta so lelek go kuda betui, empat puluh ribu yam so. Nggano, kuda blo lo koklong go plesedue, duabelas ribu yam so. ²⁷ Deguena Salomo ey nemot ey media klaya gono ten dedam go sedue eygo nogo ten, nan-nan ngga go wengkabui-wengkabui lo, gemang iyaluim. Banu no banu nogo, seguay sogo nang, yakua tong. ²⁸ Nemot go kuda naklay nogo neguen, kuda so keklak go sedue sono king go klong-lak.

²⁹ Kunala iguong plet go dega-a, Salomo sono, Ki Wali Iram lo gemang iti. Nemot no iti go kunala ngga, miam dega seni so, biap ketang logo biap kaseglok kalik, tagu yakua i. ³⁰ Salomo go, kunala iguong senongkalong naklay kangok so yelung ey pupung. Woyklak sogo kunala sedue, Mesir go kunala sedue eygo kua kerlam. ³¹ Nggano, Etan sik sogo,Ezrahi sik sogo, Herman sik sogo, Kalkol sik sogo, Darda sik sogo eygo kua kerlam. Nggano, Mahol go duo-yap eygo, Salomo-a naklay blo dega so. Salomo go sui-a, blo sono nemot eygo sedue lo blo sono pen.