¹ Ngga blo idi logo ngge gemang lemoy. Sedue Yizrrel Nebot go anggul usu Yizrril so gemang. Nan Israel Samaria go deguena Ahab go istana ketang so. ² Ahab lo Nebot sono ngge kalik so gemang pu: "Mot go anggul usu genam no itak-a genam go ulum usu semu genag so, ngga genam go yap dagu sogo. Nemot way sogo, mot nogo anggul usu suey go-a mot no mea itak. Kua go, mot lo yang go, duoy-a way so mea iti!" ³ Ahab sono Nabot lo wa go: "At go asibabu logo pusaka mot sono iti genang sogo kunala, Woy Wali Iram lo genam sik sogo ket sono mea betep!" ⁴ Ngga ey dabui sesat ey dabuipiam ey, Ahab istana ba sono gemang dugut, Nebot sedue Yezrrel ngga lo nemot no pen go nebut: "Asibabu logo taut pusaka genam nogo sogo mot no ya kua iti!" ngga tang sogo so. Nemot sip srek blo lo srek go, susu unuik go, nemot go tendam sogo moy so. ⁵ Ngga ey, senun Izebel degut go, nemot mit no suing gono gemang pu-natun: "Sogo sik so, mot go dabui nat to go mot go ten kua dam ne?" ⁶ Senun sono pu-nawon go: "Genam lo Nabot sedue Yizeel no mo pen nggelakik so: 'Mot go anggul usu ngga genam no iti, genam lo duoy lo mea king, kua go anggul usu suey go-a way dali so mot sono mea itak!' No, nemot lo way so pu go: "Anggul usu ngga genam lo mot nogo ya kua itak!" ⁷ Senun Izebel lo way so pu go: "Nggeasui go, mot ngge Israel go deguena lo! Buong go, mot go ten dam-a. Nggano, mot go dabui yakay se pung. Nabot, sedue Yizreel ngga go anggul usu ngga, genam lo mot sono mea itak!" ⁸ 8Nggano, Ahab go sui no sam meterai eygo blo no klik go, nggano sam ngge sedue-sedue woy-woy Nabot ey yakena klay go sono gemang wasey-sing. ⁹ Sam ngga ngge kalik so gemang klik: "Genuing tenday suing genang sogo se pu! Ngga ey, Nabot sip seboy sogo no se suing! Blong-a taton no se suing. ¹⁰ Nggano, sedue don eygo namon nemot mit no se suing. Nggano, ngge kalik so se pen: 'Mot lo deguena ey, Ki Wali Iram ey go piam pu go!' Nggano, dia sono wawi go klong go, demu lo sruom go se kebong." ¹¹ Ngga ey, nemot go yakena klaya go sedue kabung lo ngga kalik so gemang semu. Yangga, sedue-sedue ey, woy-woy ey yakena klaya go ngga so susuing go go gemang pluok ngga kalik so. Nemotnang no, Izebel lo pu go kalik so gemang pluok. Sam ba no klik go nemotnang sono iti go kalik so gemang semu. ¹² Nemotnang lo ngga kalik so pu-sing go, nggaey, nabot-a blung nesip no suong ku no pu go gemang suing. ¹³ Ngga ey, sedue don ey go weng go Nabot mit no gemang suing dali. Ngga ey, nemotnang lo Nabot sogo nebut gemang pen ngge kalik so: "Nabot lo Ki Wali Iram ey deguena eygo piam mo pu!" Nggano, nemotnang lo Nabot wawi go klong go yakena dia idi no demu lo suom go gemang kebong. ¹⁴ Nggano, Izebel sono sedue pu go klong go, gemang pen: "Nabot demu lo suom go mo kebong!" ¹⁵ Nabot demu lo sruom go kebong go nebut Izebel tup-natun gono, Ahab sono, Izebel lo gemang pu: "Bong go, Nabot sedue Yizreel logo anggul usu na se iti. Duoy lo iti genang sogo mo wayang go. Seni so, Nabot mo kebong go." ¹⁶ Nabot mo kebong go nebut tup gono, nemot ip go Nabot sedue Yizreel logo anggul usu ngga no klang go, usu ngga gemang iti-nawon nemot go so. ¹⁷ Nggano, Woy Wali Iram go nebut Elia sono pung go, ngge kalik so: ¹⁸ "Buong go Ahab Israel go deguena Samaria sogo sono se klong! Se senong, nemot Nabot logo anggul usu no gemang klong. Nemot go so guik genang so. ¹⁹ Nemo no ngge kalik so se pen-analo: "Woy Wali Iram go nebut ngge kalik so gabe: 'Nabot go kin uduo lo iblon go sip ngga dali no, mot go kin uduo lo mea iblon dali!" ²⁰ Ngga ey, Elia no, Ahab no pu go: "At go plesi, sogo so, mot genam eygo tegu to?" Elia lo way so pu go: "Genam mot ey tegu go, Motnang so, mot go saysuk mo nay-sing. Mot lo taybat Woy Wali Iram go suong ku nogo mo pluok go tang sogo gabe." ²¹ Se senong, mot blo nogo, koywong piam diding-a Genam lo mea weng. Mot go duo sedue deno, naklay mot go mlena naklay Ahab go yakena nogo mea suep-sing, sipsuing ku sogo, sipsuing blo sogo naklay Israel sik sogo mea suep-sing. ²² Mot go yaptenglam Yerobeam go yaptenglam, nebat go dano, nggano Baesa Ahia danon go yaptenglam, kalik Genam lo mea lemoy! Mot lo Genam go dabui piam mo semu go nogo. Ngga tang so, sedue Israel kuklue mo semu go nogo. ²³ Nggano, Izebel sogo, ngge kalik so Woy Wali Iram lo gemang pu: "Izreel go yakena tema dia idi no, uduo lo Izebel mea dam-sing!' ²⁴ Ahab go yaptenglam sik sogo kebong go, uduo lo mea dam, ngge ey duen no kebong go, wi pling go uwet golo mea dam-sing!" ²⁵ Yang, Ahab kalik go sedue nemot go senun lo go nebut no tup go tang sogo so, nemot go saysuk Woy Wali Iram go duduing paysing genang sogo so nemot tang go saysuik nay-sing go kua gabe. ²⁶ Nemot tang go wali naklay suk kua seni, ida naklay no keng go, sedue Amori lo pupluok go kalik so. Sedue Irael sik so, Woy Wali Iram lo mo ka-sing go ida. ²⁷ Nebut ngga Ahab lo tup gono, nemot go amka tegek go, genuing amka-a kok go, genuing tenday gemang suing. nemot genuing amka ey srek nggano, masi yakot so koklong. ²⁸ Nggano, Elia sedue Tesbe sono, Woy Wali Iram go nebut gemang pung ngge kalik so: ²⁹ "Se iku! Seni so, Genam go suongku no Ahab go saysuk mo unuik, Genam go suongkuno nemot mo unuik go tang so, nggeasui go ku nogo, ide keba meakua weng. Nemot go danon go ku no Genam lo nemot go yaptenglam nogo piam mea weng!"