1 Yagui nangglik yam so, Aram ey Israel eygo ple kua pung go. 2 No, yagui nanglik tete no, Yehuda go deguena Yosafat, Israel go deguena sono gemang klong. 3 Ngga no, Israel go deguena lo nemot go kebali sedue no gemang pen: "Motnang mo senong? Ramot Gilead ngga imot go sip gemang! No, imot-a yakot so susuing ne, No, deguena Aram go ta sik sogo iti sogo se!" 4 Ngga blo idi lo, Yosafat sono nemot lo gemang pu: "Mot kerlam so genam ey ya klong? Ramot Gilead ple pung sogo. Ngga ey, Israel go deguena so, Yosafat lo pu go: "Nggakalik go suey lo! At go blung, ey mot go blung ey, at go kuda ey mot go kuda ey naklay mea klong-lak." 5 Tandali deguena Israel sono, Yesafat lo gemang pu: "Imot, Woy Wali Iram sik aogo nebut banim no ya senong! 6 Nggano, deguena Israel lo nabi-nabi yaluim-sing gono, nemotnang go mia 400 yam so. Nemotnang sono nemot lo gemang usi: "Ramot Gileat plepung sogo, ya klong, ya keneng?" Nemotnang lo way so pu go: "se klong! Woy Walo Iram lo deguena go ta ba sono nemotnang mea itak." 7 Nggaey, Yesafat lo usi go: "Woy Wali Iram go nabi ngge sogo gemang? Woy Wali Iram go duduing nemot sik so senong genang!" 8 Yosafat sono, Israel go deguena lo pu go: "Sedue klaya duo dali maning gemang. Nemot sik so, Woy Wali Iram go duduing mea senong, no, genam nemot nogo dabui piam dega ey. Nemot logo, genam blo nogo suey go-a kua pepen, no, piam go-a ne pupu. Nemot ngga, Yimla go danon, Mikha." Ngga ey, Yosafat lo pu go: "Deguena logo, ngga kalik so kua pu!" 9 Sedue klaya meno duo-a, Israel go deguena lo usi go no, weng gono gemang pu: "Keda so, Yimla go danon, Mikha wawi go se weng!" 10 Nggano, Israel go deguena ey, Yehuda go deguena Yosafat ey, nemot go-nemot go srem ey kok go, nemot go nemot go sip suing blo no, yakena Samaria go yataput nebut so pu go sip no suing go, nabi-nabi lo Woy Wali Iram go nebut gemang pen. 11 Nggano, Kanaan go danon Zedekia besi matu so semu golo gemang pu, "Woy Wali Iram go nebut ngge kalik so gabe: 'Matu ngge lo, Aram saula mot lo uluk-sing go nemotnang yam so mea kua!'" 12 Nabi-nabi ngga naklay lo ngga kalik dali gemang pen. Nggekalik gabe: "Ramot Gileat sono mot se klong, Mot lo don ey mea suing!. Deguena go ta ba sono, nemotnang Woy Wali Iram lo mea itak." 13 Mikha usi so mot-dak go sedue lo pu go, "Se senong, nggeasui go nabi-nabi go lom ba sik so nebut suey go-a deguena sogo mo pen. Nggeasui go, nebut suey go dali-a, yansi lemoy genang sogo se pen-sando!" 14 Ngga ey, way so Mikha lo pu go: "Woy Wali Iram kiki sogo sui no gabe pu, sogo kalik so genam no mo pen go ngga-a, gabe pen-situgu!" 15 Nemot klong go deguena go suong ku no, deguena lo Mikha no gemang usi: "Mikha, atnang Ramot Giliad no plepung sogo ya klong, ya kua klong?" Nggano, Mikha lo pu go: "Klong-a! Mot don ey mea suing. Woy Wali Iram lo deguena go ta ba sono, nemotnang naklay mea itak!" 16 Deguena lo nabi Mikha no pu go: "Da kata yam so at logo ya pu? Woy Wali Iram lo seni so pen go nebut, seni sogo-a mot lo taeynat go. genam sono mot logo ya pen?" 17 Ngga ey, Mikha lo pu go: "Genam mo ikum, menay so popong go wengkabui kua go kalik, wengkabui kua go kalik kumeduim lo sedue Israel mo suep-lak! Nemotnang so Woy Wali Iram lo pu go: "Nemotnang ngge, wengkabui kua go sedue kalik nuey-a! Itak go, susuoy so nemotgo-nemot go yap sono se klong-lak!" 20 18 Ngga blo idi lo, deguena Israel lo Yosafat no gemang pu: "Genam lo mot no mo pen, nemot logo genam nogo nebut suey go kua pen, no, koy diding eygo nebut-a gemang pepen." 19 Nggano, Mikha lo way so pu go: "Ngga tang sogo so, Woy Wali Iram go nebut no se tup: Genam lo mo ikum, seni so, Woy Wali Iram Nemot go sipsuing blo no suing go, nemot go plesedue tala Nemot mit no ip-lak go, tasemla idi nogo ey takalik idi nogo ey mo ip-lak.v20Ngano, Woy Wali Iram lo pu go: "Nando lo Ahab mlue go ya klong, plepung genang sogo? Ramon Gilead nogo? Meno duo lo ngge kalik so pu go, meno duo lo ngga kalik so pu. 21 Ngga ey, Woy Wali Iram go suongku no kuasep meno ip go gemang pu: 'Genam lo klong go, nemot mea mlue.' 22 Ngga ey, kuasep ngganemot sono, Woy Wali Iram lo usi go: "Sogo kali golo ya mlue?" Nggaey, kuasep ngga lo pu go: "genam pung go, wamoy mlue sogo kuasep so lemoy go, nabi naklay go lom ba no mae degut klong go mea mlue, ngga mea lemoy." 23 Yang, mot go nabi ngga naklay go lom ba no, kuasep wamoy mlue eygo ngga, Woy Wali Iram lo mo king-sing gemang. Koy wong diding-a mot blo sono go weng genang so, Woy Wali Iram lo mo pu!" 24 Nggano, Kanaan go danon Zedekia, Mikha pang sogo so ip go koklong, gemang pu: "Nago so mo, Ki Wali Waglo genam no degut go, mot sogo nebut ya pen?" 25 Ngga ey, way so Mikha lo pu go: "Nggeasui go ku no, mot se senong! Degu meno sik so degu meno sono mot kekap go, son genang sogo so. ngga no mot nase senong!" 26 Nggaey, Israel go deguena lo pu go: "Mikha mlak go Yakena wengkabui Amon ey deguena go danon Yoas sono tandali iti! 27 Nggano, ngge kalik so se pu: "Deguena lo ngge kalik so gebe pu: 'sedue ngge boy ba no nase betep, nemot nogo ten, loti ey bu eygo seguay so se iti, e... susuoy so tandali genam mea pung!" 28 Mikha lo way so pu go: "Seni so, mot susuoy so tandali pung go, Woy Wali Iram go nebut genam logo mea kua pepen!" Nggano, nemot lo tandali pu go: "blung naklay, Ramot-Giliad nogo ple gemang pung. 29 Ngga ey, Israel go deguena ey, Yehuda go deguena Yosafat ey Ramod-Giead sono plepung so gemang klong. 30 Nggano, Israel go deguena lo Yosafat no pu go: "Genam-a ple srem-a kok go ple ba sono degut so gabe, mot-a deguena go srem ey se kok." Nggano, Israel go deguena plepung amka-a kok go, ple ba sono gemang degut. 31 Amon go deguena lo, nemot go plesedue wengkabui 32 yam sogo ey kleta eygo plesedue eygo no ngge mo pu: "Sedue seguay go babu go ey ple kua pung! No, Israeal go deguena seguong-a ple se pung!" 32 Ngga kalik so gemang lemoy, plesedue wengkabui kleta ey golo, Yosafat ikum go, nemotnang lo gemang pu: "Suey so se senong, ngga Israel go deguena?" Nemotnang koklong go, no, Yosafat lo bega go, 33 Plewengkabu kleta eygo ikum go, ngga Israel go deguena kua ba. Nemotnang tandali iwotak go gemang klomg nemot sik sogo. 34 No, sedue meno lo tebadali ple tuk go, koklong go, Israel go deguena no ple nga gemang but. Nemot go amka zirah go sring wayway so kluing go ba lo. Nggano, nemot Israel go deguena go leta so mlak go sedue no gemang pu: "Teguey-a, genam tandali iwot go klong so, genam ple mo degut go so!" 35 Ku ngganemot nogo, ple kangok so gemang pung, ngga ey, deguena Israel ta lo mlak go, nemot go kleta ba no gemang klong, sedue Aram eygo e.. nemot gemang kebong. Nemot go kin ngang go, kleta ba no gemang tram. 36 Woy yam so susut gono, wak ngge kalik so klung go gemang tup: "Nemot go-nemot go yakena sono, nemot go nemot go yakena sono se!" 37 Deguena mo kebong!" Nggano, Samaria sono, nemotnang gemang klong-lak. 38 Samaria bu ketang no, kleta bu so nemotnang ulu gono, kame kabung ngga so bu so wata gono, nemot go kin uduo lo gemang iblon. Woy Wali Iram lo mo pen go kalik so gemang lemoy seni. 39 Ahab lo pluok go naklay nogo nebutpen naklay, istana gading klik go nogo nebutpen naklay, yakena-yakena nemot lo buong go naklay nogo, nebutpn sam bano mo klik gemang. 40 Ngga ey, klay gono, asi babunang ey mu no gemang tuet. Nggano, danon Ahazia lo deguena so gemang suing, nemot way so. Yosafat go tamlak go ku yam go. 41 Nggano, Asa go danon Yosafat lo Yehuda no deguena so tamlak, yagui 4 tete Ahad lo Israel tamlak go ku no. 42 Yosafat deguena so tamlak go nogo yagui 35 yam no, nemot lo deguena so Yerusalem no suing go. Yagui 25 yam so nemot Yerusalem no deguena so tamlak go. Nemot go unen go sui, Azuba, Silhi go denun. 43 Nemot go wali, nglagin Asa logo masisip dali no gemang keng. Woy Wali Iram lo iwat go-a pupluok. No, meduim blo logo demusung ket sono kua tegut-sing. Ngganemot nogo sedue kabung ngga blo nogo menay ey klong go ne pupuit-lak. 44 Israel go deguena eygo, Yosafat go wali ngengam so. 45 Yosafat go wali nogo nebut pen, nemot lo plepung go, wali ngga naklay samba no mo klik-sing gemang. 46 Kamea-kamea so pupluok go taybat temang nglangin Asa logo itak go ngga, nan ngga sik sogo gemang suep-sing. 47 Ku ngganemot nogo Edom go deguena kua. Woy meno-a edom nogo wengkabui so gemang lemoy. Yosafat go kapal. 48 Tarsis sik sogo kapal-kapal Yosafat lo semu go, Ofir sono klong go emas king so. Ngga ey, kapal waluk go tang sogo so Ezion-Geber no tandali go kua klong, 49 Ku ngganemot nogo, Ahad danon Azaria lo Yosafat sono gemang pu: "Nuey-a genam go kebali sedue ey, mot go kebali sedue eygo-a mot go kapal ngga lo mea klong!" No, Yosafat logo kua yang-nangam. 50 Nggaey, Yosafat kebong go, asibabunang ey mu no gemang tuet. Asibabunang ey, Daud go yakenan no nemot gemang tuet dali. Nggaey, danon Yoram lo deguena so nglangin way so tagemang mlak Israel nogo. Ahazia deguena so suing go. 51 Ahab go danon Ahazia lo Israel tamlak go, Samaria nogo. Yagui 17 tete Yehuda go deguena so Yosafat suing gono, Ahazia lo Samaria tamlak go, Yagui namon yam dato so. 52 Tabybat piam go-a Woy Wali Iram go suongku nogo nemot lo pupluok. Nglangin go wali piam go masisip dali ey unen go wali piam gono keng go. Nebat go danon Yerobeam go wali no keng go. Ngga tang so, Israel sedue kabung kuklue piam konkebamling mo pluok. 53 Ida Baal sono, nemot lo takokong. Nggatang sogo so, Woy Wali Iram, Israel go Ki Wali Iram nogo, dabui sadui mo pung. Naklay-naklay ngga, nemot go nglangin lo semu go kuklue piamkonkebamling ey mo kerlam.