¹ Aram go deguena, Benhadad lo nemot go plesedue naklay yaluim-sing go. Deguena 32 yam so nemot ey tebak go, nemotnang go kuda naklay, kleta naklay, Samaria sono ple klong go pung genang so dali ta-sing. ² Ngga ey, nemot go tamot mot-ak go Ahab Israel go deguena yakena sono gemang klong. Ngge kalik so, Benhadad lo gemang pu: ³ "Mot go, drang, emasperak, kabung teguop-teguop, denok teguop go naklay ngga genam go gemang!" ⁴ Ngga ey, Israel go deguena lo way so pu go: "deguena, mot go nebut kalik so, genam ey, genam logo sogosogo naklay ngge mot go gabe" ⁵ Ngga no, nemot go tamot naklay ngga tandali klong go gemang pen: "Benhadad lo ngge kalik so gabe pu-bawon: 'Yang seni so lo, genam lo tamot pu go mo klong, mot no pen genang sogo: perak, emas, kabung, denok teguop-teguop go naklay ngga genam go ta sono se itak-sing!" ⁶ No, utep go woy ngge yam dali no, genam go tamot-tamot motak go klong go mot go yap-yap mea plo-sing. Nemotnang lo ikak go ngge, dia lo ikak go mea weng!" ⁷ Ngga ey, sedue-sedue nan ngga sogo naklay usi gono, gemang pu: "Se senong! Sedue ngge lo atuia piam go me semu. Nggano, nemot go tamot mot-ak go genam no mo pen: mot go kabungnang, denok, teguop-teguop go, emas ey, perak ey naklay ngga nemot go. Ngga ey genam logo kua tenguo-sreyu gabe." ⁸ Ngga ey, sedue-sedue ey, sedue kabung naklay lo nemot sono pu go: "Nemot go nebut no kua tup go keng!" ⁹ Ngga tang sogo so, nemot lo Benhadad go tamotnang no pu go: "Genam go tuiam dega no se pen ngge kalik so: 'Banim no mot lo pen go ngga genam mo tup, no, nggeasui ngga kalik so ya kua luok gabe!" Nggano, nemot go tamotnang ngga klong go, nemot no tandali gemang pen. ¹⁰ Ngga blo idi lo, Benhadad lo tamot mot-ak go gemang pen: "Ngga kalik so, genam nogo, idanang logo genam sono go mea semu, naklay kangok dega so mea semu, genam ey keng go blung lo Samaria go sungkuim da ba no mea imuk-sing!" ¹¹ Deguena Israel lo pu go: "Se klong go pen! Nemotnang maning demening ple lek go lo dabui ta kua tegue! Ple mo ta go kalik so. ¹² Nebut ngga tup go no, Benhadad bu so deguena-deguena ey bala ba so dedrop golo nemot go kebali sedue no gemang pu: "Tala so se ip-sing!" Yakana ngga sono, plepung genang so, tala so nemotnang gemang ip-sing. ¹³ Nggano, kekay so Ahab Israel go deguena ngga sono nabi meno weng go gemang pu: "Woy Wali Iram lo ngge kalik so pen go: Plesedue daley kangok go ngga, mot mo ikum? Mot se senong! Nggeasui go ku no, nemotnang naklay, mot go ta ba sono nemotnang Genam lo mea itak! Ngga ey, mot senong genang: Genam ngge-a Woy Wali Iram gabe!" ¹⁴ Nggano, Ahab lo usi go: "Nando ey ne?" Ngga ey nabi ngga lo pu go: "Woy Wal Iram go nebut ngge kalik so gabe: denok nguot ey, woywoy nakena-nakena sik sogo ey." Nggano, tandali uasi go: "ple tang nandolo ya tong ne?" Way so nabi lo pu go: "Mot lo pletang mea tong!" ¹⁵ Ngga ey, denok nguot yakena-yakena yam so tagu i-sing go, 230 yam so. Ngga ey, blung naklay tagu i-sing go, yangga, blung Israel naklay tagu i go, 7000 yam so. ¹⁶ Ngga ey, nemotnang ip go ple gemang pung, wabedong go ku bala ba so Benhadad bu so maning dedrop gono, nemot ey nemot no tebok go deguena 32 yam sogo ngga eygo. ¹⁷ Denok nguot yakena-yakena yam so kuoy-sing golo banim temu no degut go ple gemang pung. Nggano, Benhadad lo pu go sedue no gemang pen. "Samaria sik sogo, sedue lo ple pung weng go!" ¹⁸ Nemotnang lo way so usi go: "Nemotnang weng go duduing plepung so, ngengam genang so? Nemot-a wali-wali so se mlak-sing!" ¹⁹ Ngga ey, nemotnang yakena ba sik sogo pluep-lak go, ngga, anok nguot yakana-yakan yam sogo, wenglabui-wengkabui, nggano nemotnang no keng go plesedue ey. ²⁰ Nemot go-nemot go so, plesi tuk-sing gono, sedue-sedue Aram ngga sedue Israel lo truik-sing. No, Benhadad sedue Aram go deguena-a, nemot go kleta koda no klak go susuoy so gemang kap. ²¹ Israel go deguena ple so koklong go, sedue Aram go yakena-yakena ey wengkabui-wengkabui ey tuk-sing go, plesi go don gemang pedueng-sng. ²² Ngga ey, nabi ngga, deguena Israel sono weng go gemang pen: "Yakena no klong go, dabui do se kok! Sesenong, ngga ey se duing, sogo-a mot logo ya semu? seni so, yagui santegun go no, Aram go deguena lo tandali mot sono go ple mea weng go pung! ²³ Deguena Aram go kebali sedue lo nemot no pu go: "Nemotnang go Ki Wali Iram ngga, kumeduim sik sogo, ida gemang! Ngga tang sogo so nemotnang don ey gemang suing, imotnang sik sogo. No, kumeduim kua go sip no imot ey nemotnang ple pung go, imot-a don ey mea ip nemotang sik sogo!" ²⁴ Ngge kalik go plenta-a se semu: Deguena ngga nemot go-nemot go sipsuing sik sogo nase pecat. Ngga ey, nemotnang way sogo, bupati-bupati nase taling-sing! ²⁵ Nggano, mot go ple sedue miap dega so, banim go ple sedue mo leguot go kalik se taling. Kuda ey, kleta ey, banim go kalik dali se yaluim-sing. Nggano, nemotnang ey nan bata gono ple se tui! Ngga, imotnang-a don ey mea suing, memotnang don mea kua." Nemotnang go nebut ngga tup gono, ngga kalik dali so gemang keng go pluok-nawon. ²⁶ Yagui suing gono, Benhadad lo sedue Aram nemu wet-nawon gono, Afek sono gemang klong, sedue Israel ey plepung genang so. ²⁷ Sedue Israel nemot dali, nemotnang go ple sedue tagu igono, nemotnang go plenang sogo taut dali ikak gono plepung genang so Aram sono ip go gemang klong. Nemotnang go suongku no bala gemang klik-sing, suong namon-a way-way so tui, kambing sagui sogo kalik so. Sedue Aram lo sip ngga yam so kenok. ²⁸ Nggano, Ki Wali Iram go tamot weng go, blung Israel no gemang Pu: "Woy Wali Iram go nebut ngga kalik so gabe: ku ngganemot nogo sedue Aram lo pu go, 'nemotnang go ida ngga kumeduim sik sogo ida, ku bata go sik sogo ida kua' nemotnang go plesedue daley kangok dega go ngga, Genam lo motnang go ta ba sono mea itak-sing! Ngga sik so, motnang senong genang; Genam-a Woy Wali Iram gabe!" ²⁹ Sedue kabung ngga way-way so suong namon-a tui go ku 7 yam so namotgo-nemot go bala ba so suing go plepung genang sogo so. Nggano, ku 7 teteno ple tang tui go, sedue Israel lo, sedue Aram go plesedue masi lo koklong go, 100 ribu yam so kekay so tuk go leguot-sing. ngga ku klya tete no tuk-sing go. ³⁰ Maning wali-wali sogo, suali so Afek sono kota sono gemang kuek-lak. No, kota ngga go demutema togut golo sedue temu 27ribu yam sogo ngga nedik go gemang kebong. Benhadad tang go kap go kota ba sono degut go, degu mano sik so, degu meno no degut klong. ³¹ Nggano, nemot yay sogo sedue lo nemot sono pu go: "Sesenong, atnang tup go, Israel go deguena ngga dabui suey go deguena gemang. Weng-a, amka kuibey so dok gono, wengkabui no sung ut go klong go nemot ey ya tegu go, nago no nemot klum go deguena wali-wali so mea wawi nemot lo. ³² Sedue-sedue ngga lo duing go ngga tataling genang sogo gemang. Ngga ey keda-kedaso tamlak gono gemang pu: "Mot go koybutasemu Benhadad lo pu go: "genam wali-wali so ya itak sang?" Ahad lo pu go: "Dem sop ngga maning wali-wali sogemang?" ³³ Sedue-sedue ngga lo duing go, ngga mo taling gemang, ngga mlak gono nemotnang lo pu go: "Yang, mot go dem Benhadad se!" Klong-a, klong go nemot wawi-a! Ngga ey, Benhadad pung go, kleta ba no klak go klong. ³⁴ Ahab sono Benhadad lo gemang pu: "At go aya lo, mot go aya sik so gluik go yakena-yakena tandali mot sono mea itak. Damsik nogo pasar kangok go, ata go aya lo Samaria no klik go kalik so meaa klik." Nggano, Ahab lo pu go: "Mot ey go tega di me dok, mot itak go klong genang sogo" Nggano, tegadi nemot ey dok geno, itak go Benhadad gemang klong. Ahab sogo nebut nabi lo pen go. ³⁵ Nggano, nabinabi sik sogo meno lo gemang pu nemot go meno duo sono, Woy wali Iram lo pu go sogo so: "Genam nggeasui but-a!" No, sedue ngga lo gemang tenguo, but genang sogo. ³⁶ Nabi ngga lo pu go: "Nggeasui go, Woy Wali Iram no mot kua tup go tang so, mot se senong, mot koklong gono singa klaya lo mot mea mlak!" Ngga ey, sedue ngga koklong gono, singa lo tap no gemang glok. ³⁷ Nggano, sedue meno ey nabi ngga tegu gono gemang pu: Nggeasui genam but!" Sedue ngga lo nemot but go demun gemang suey. ³⁸ Nabi ngga klong go, tap so, deguena so gemang bubung. Nemu no, kuo so dok go amka lo dok gono bemang bubung. ³⁹ Deguena koklong gono, nemot lo deguena sono ngge kalik so gemang eli-nawon: "Genam mot go tamot ngge plepung so ple nesip sono koklong go, sedue meno, ple daley itak go, sedue meno wawi go weng go, 'sedue ngge kua keng,. Namot no pen go nebut, nemot mo nega go, mot go dabuilap-a way dali so mea. kua go, drang talenta klay-a mot lo se king! ⁴⁰ No, mot go koybutasemu ngge, ngga idi sono-ngga idi sono pluok go, sedue ngga ne nega." Nggano, Israel go deguena lo nemot sono pu go: "Ngga kalik so lo mot go idekeba mottang so taling go!" ⁴¹ Ngga ey, nemot go nemo sik sogo, kuo so dok go amka ngga plet go, ngga ey, deguena gemang senong no nabi meno lo ba. ⁴² Nabi ngga lo nemot sono gemang pu: "Woy Wali Iram lo ngge kalik so bage pen: "Mot lo mot go ta ba sik so, sedu mo tenguo go ngga iatak go tang sogo so, mot go dabuilap-a nemot go dabui-lap way so mea iti!" ⁴³ Ngga ey, Israel go deguena, dabui ide ey dabui piam ey istana Samaria sono tandali gemang klong.