¹ Naklay-naklay, Elia lo pluok go ngga, Izebel sono, Ahad lo gemang pen. Yangga, nabi-nabi naklay, tengang lo blindon tong-sing go nebut. ² Ngga ey, Elia sono, sedue pu go Izebel lo, gemang klong Elia sono klong go, ngge kalik pu genang so: "Ngge kalik go, genam go ida lo atnogo ide mea iti: seni-seni, nago no utep go, mot go dabui-lak, nemotnang kalik so kua lemoy go. ³ Ngga ey, Elia suali tra go, ip go son genang so gemang klong. Bersyeba Yehuda go nansang no pung gono, nemot go koybutasemu, nggano, gemang itak-nawon. ⁴ Nemot tang go, kaseglok pay sono klong go, kuklaya yam so tapmasi walong so gemang klong. Nggano pung gono, di arah nuik meno ba no suing go, Gemang wadong, nemot go dabuilap iti go kebong genang so. Gemang pu: "Nggeasui go, nemot lo, oh, Woy Wali Iram, genam go dabuilap-a teuik go kebong-ya! Genam ngge, asi babunang go suey ey kua kerlam be. ⁵ Ngga ey, di arah ngganemot nui ba lo gemang to-nawon. Ngga ey, Ki Wali Tamot lo weng go, nemot no tuing gono gemang pu: "Boung-a, ten dam-a!" ⁶ nggano, nemot lo ikum go, wengkabui temu sogo, loti duik go ey bu kenting ey, ngga ey, ten dam go bu drop gono ku lo gemang srek-nawon. ⁷ Ki Wali tamot tandali danamon tete sogo weng go, Elia no tuing gono gemang pu-nawon: "Buong go, ten dam-a! Mot go tap masi maning ket dega sogo." ⁸ ngga ey, ten dam bu budrop genang so Elia gemang bong go ip. Tendam ngga dam golo don kok gono, nemot gemang klong, ku 40 ba no. Kuklik 40, kublong 40. Koklong go, e... Ki Wali Iram go meduim no gemag pung, yangga, Horep menduim ⁹ Nggano pung gono, demuput ba sono nemot degut go, ngga ba lo gemang srek. Ngga ey, Woy Wali Iram go nebut Elia nogo gemang weng, ngge kalik so: ""Mot ngge sogo, sogo tang so?" ¹⁰ Elia lo wa go: "Genam, Woy Wali Iram, Ki Wali Kumam nogo kebali so, seguot kangok so pung-tutu go se! Blong Israel lo, Nemot logo tegadi itak go, Mot go demusung togut-sing go, Mot go nabi nabi tengang lo tongsing go, genam seguong-a maning wali sogo gabe. Nemotnang lo genam go dabuiap iti genang so gebe tutruik. ¹¹ Nemot lo pu go: "Buong go ip-a, Woy Wali Iram go suongkuno, meduim ngge blo no!" Ngga ey, Woy Wali Iram, nebut kluim kangok go ba lo weng go gemang ikum. Ngga lo, demu meduim-meduimWoyWali Iram go suongkuno gemang tegek-sing, Nemot-a nebit ngga ba sogo, Woy Wali Iram kua. Nebit kangok go iti go blo idi lo, kuysu kango go gemang lek. Nemot-a kuysu ngga ba sogo, Woy Wali Iram kua. ¹² Kuysu laek go blo lo, koy gemang li, koy yam gono, nebit seguay so uluing go kluim gemang tup. ¹³ Ngga Elia tup gono, nebuemnemu amka lo pok gono, nggaa ey pung go demuput tap degut no gemang ip-nawon. Ngga ey, nemot sono pu go nebut gemang tup-nawon: "Mot ngge so, sogo so got-tegoy, Elia?" ¹⁴ Elia lo way so wa go: "Woy Wali Iram, Ki Wali Kumam nogo so kangok so genam gabe usey-tugu!, yang, Mot go tegadi dok go, sedue kabung Israel lo paysing go mo itak. Nemotnang lo Mot go demusung mo plo-sing, nggaey Mot go nabi-nabi, nemotnang lo tengang lo mo but go kebong-sing! Genam-a maning wali so gabe, ngga ey, genam dabuilap teguik go kebong genang so, nemotnang gemang uusey." ¹⁵ Nemot sono, Woy Wali Iram lo pu go: "Tandali mot go tap sono, Damsik kasglok pai sono. Nggano pung go, Hazael Aram nogo deguena so tatui go nase temuit go lemoy. ¹⁶ Nggaey, Nimai go mamtaton Yehu, Israey nogo deguena so se temuit. Nggano, Safat Abel-Mehola sik sogo sedue go danon Elisa-a, genam way dali so, nabi so se temuit-nalo. ¹⁷ Yang, Hazael go ple sik sogo nan do susuoy go, Yehu lo but go mea kebong. Nggano, Yehu sik sogo nando susuoy go, Elisa lo but go mea kebong. ¹⁸ Sedue kabung Israel wali so At lo itak genang sogo, 7000 yam so mea. Yangga, nemotnang go sigabuem ida Baal no go kua unuik go nebuemkuong kua tebok go sedue kabung-a." Elisa nabi so lemoy. ¹⁹ Ngga ey, nga sik sogo, nemot klong go, Elisa ey gemang tegu. Safat go danon Elisa, lembu 12 pasang eygo lo nan so kukuk go, nemot lembu 12 pasang blo so gemang go. Ngga ey, Elia nemot mit no ip gono, nemot go jua-a Elisa sono gemang betepnawon. ²⁰ Nemot go lembu-naklay itak go, kekay so kap go Elia sono gemang duk go klong. Ngga ey, nemot lo pu go: "At go mia ey aya eygo nebuemkuong tebok gono, mot sono genam mea keng!" Nggano, Elia lo way so pu go: "Klong-a, yap no klong ya! No, mot sono genam lo pluok tu go-a se duduing, kua kay!" ²¹ Elia sik sogo nemot iwot-ak gono, nemot go pasangan lembu ngga wawi-sing gono, menay ngga tong-sing gono, kedong blang ba no suik gono, nemot go sedue kabung no wasey-sing go nemotnang lo gemang dam. Ngga ey, nemot taut go Elia no keng genang so gemang keng go klong. Elia nogo koybutasemu so gemang lemoy.