¹ Ngga ey, ku walong kualuik gono, Woy Wali Iram go nebut, Elia sono gemang weng, yagui nangglik tete sogo ba no. ngge kalik so: "Klong-a! Mot go saysuk Ahab no nase taling. ngga no, kukunan blo sono go sa Genam lo mea pu." ² Nggano, Elia gemang klong, nemot go saysuk Ahab no tali genang so. Ku ngganemot nogo, nan Samaria nogo kluongku, tenkuagoku kangok dega so gemang lemoy. ³ Istana go wengkabui, Obadia Ahab lo gemang usi. Yang, Obadia ngga, Woy Wali Iram nogo suali ey takokong go sedue. ⁴ Woy Wali Iram go nabi-nabi, Izebel lo tuk go nogo, Obadia lo sedue 50, 50 yam so wawi go ngga ba no demuput ba no gemang son-sing. Ngga ey, nemotnang nogo tendam budrop gemang usey. ⁵ Obadia sono Ahab lo gemang pu: Nan ngge buput-buput naklay sono mot se klong go ikum, Imot go menay kudanang begalnang nogo neguen ya tegu? Menay ngga ya kua ibot genang!" ⁶ Nggano, nemotnang lo nan ngga gemang wasey-nenawon, buput uwet genang sogo so. Ahab lo banom tap idi sono klong, ngga ey Obadia banom dali tap idi sono klong dali. ⁷ Obadia tap sogo no, Elia ey nemot gemang tegu. Senongnawon gogo, nemot unuik go gemang usi: "Mot ngge genam gu tuiam Elia lo?" ⁸ Elia lo way so pu go 'Yang! Klong go mot go tuam no se pen; Elia ngga so ngga go!." ⁹ Obadia lo way so pu go: "Sogo kalik go kuklue-a genam lo pluok go sogo so, Genam mot lo pu go Ahab no genam klong go, but go ya kebong?" ¹⁰ Seni so, Mot go Woy Wali Iram, Ki Wali Iram go sui no, saula tang deguena klayanang go kua, mot wet genang so tamot mot-dak go klong go. Yang, nemotnang lo wa go, mot kua gabe. Saula tang ngganemot lo tanat go mea pu: "Ngga sogo, nemot kua tegu go se!" ¹¹ Nggano, nggeasui mot lo pu go: "Klong-a, mot go tuam no se pen; Elia ngge so ngge go!' ¹² Ngga kalik go, ya lemoy? Genam klong gono, Woy Wali Waglo lo sip meno, genam kua senong go sono wawi go mot mea klong. Ahab sono klong go genam lo pen gono, wet go, mot kua ikum go, genam-a mang ne ya but go kebong. No, genam mot go koybutasemu ngge, maning seguay go sik so, suali Wy Wali iram no taey gabe kokong. ¹³ Izebel lo, Woy Wali Iram go nabi-nabi tuksing gono, genam lo puok go tasam ngga mot logo yakua pen? Yangga, Woy Wali Iram go nabi 100 yam so ngga ba no at lo kok go. 50-50 yam so at lo wasey go, 50 dali demuluk ba no kok go, nemotnang nogo tendam budrop genam lo gemang usey. ¹⁴ Nggeasui mot lo ne pu-tegoy: Klong go mot go tuiam no nase pen: "Elia, ngge so be!" Nemot lo genam but go mea kebong seni. ¹⁵ Way so elia lo pu go: "Woy Wali Iram, ut-nan so Kiki sogo, Nemot no genam lo kebali pupuok go sui no, gabe pupu: Nggeasui go ku no, nemot no genam go saysuk mea taling!" ¹⁶ Ngga ey, Ahab tegu so, Obadia gemang klong, pen genang sogo so. Ngga ey, Ahab klong go, Elia ey gemang tegu. ¹⁷ Ahab lo Elia ikum gono, Elia sono Ahab lo gemang pu: "Mot ngge nemot gabe, Israel nogo piam so semu go sedue?" ¹⁸ Elia lo way so wa go: "Israel genam lo piam kua semu, no, mot ey mot go yeptenglam eygo lo, Woy Wali Iram go demutrui itak go, ngga ey, ida meno Baal no keng golo. ¹⁹ Ngga tang sogo so, blung Israel naklay usi go meduim Karmel sono se pluep-lak. Ngga ey, 450 yam sogo ide Baal go nabi- nabi eygo Izebel logo ten so dedam go se yaluim-sing, menduim Karmel sono!" ²⁰ Ngga ey, lo pu go sedue Israel ey ida Baal go nabi-nabi ey, naklay meduim Karmel sono gemang yalui-sing. ²¹ Ngga ey, blung Israel naklay dagu sono Elia klong gono gemang putenawon: "Ku kata yam so, motnang go dabui, tutruo ey ya pung, Woy Wali Iram ngga, motnang go Ki Wali Iram gemang go, Nemot seguong no, motnang se keng! No, ida Baal mo, nemot no se keng!" No, sogo-sogo Blong isreel lo go kua wa. ²² Ngga ey, blung ngge no, Elia lo pu go: "Genam seguong-a Woy Wali iram go nabi sogo gebe got-situgu. no ide Baal go nabi-nabi naklay go, 450 yam so. ²³ Sapi kemsi namon ey ngge no se dok! Itak go, nemotnang lo meno tong go koydi blo no ikak go se ta! No, koy kua puit! Ngga ey, sapi kemsi meno genam lo tong go mea ta dali. Dikoy blo no ta go, ngga no koy yakua puit dali. ²⁴ Ngga ey, mot go ide go sui no se usi, ngga ey genam lo at go Woy Wali Iram, Ki Wali Iram go sui no mea usi. Nemot lo koy lo mea wakunion." Seduekabung naklay lo pu go: "Nggakalik sogo suey lo!" ²⁵ Ngga ey, ida Baal go nabinabi ngga sono Elia lo gemang pu: "Sapi klaya kuoy go, tong go banim se semu, motnang miam dega go tang so. Ngga ey, mot go ide go sui no se wadong, koy blon genang sogo be!" ²⁶ Ngga ey, sapi meno nemotnang lo iti go, tong go dali gemang semu-sing, nemotnang go ide Baal go sui gemang uusi-lak! Nemotnang lo pu go: "Baal, atnang lo wadong go tup-a!" No, nemotnang nogo, sogo-sogo nebut-nang kua tuot. Nemotnang lo demusung semu go ketang lo tetegle-lak go, sogo sogo kua lemoy. ²⁷ Woy nesip no pung gono, nemotnang so Elia lo, wayang go gemang pupu: "Kangok so se usi! Nemot ngga ida lo! Nggesui go nemot kunala so maning duduing? Kebali so maning sesemu? maning masi-masi so uwet? maning usene so sesrek maning kua buong?" ²⁸ Nemotnang lo nebut kangok so gemang uwadong-lak. Ngga ey, nemotnang go saysuk, tengang lo gemang rlot-sing. Nemotnang go demu kalik so, e... nemotnang go saysuik sik sogo kin ey gemang pupluik-lak. ²⁹ Yam so woy se rlong, nemotnang naklay, puplu so kuaseni gogo se degut-sing. Nemotnang go menay puit genang sogo, sogo-sogo kluim kua tuot. Wali sogo sogosogo tasamnang kua taling. ³⁰ Ngga ey, blung ngga naklay sono Elia lo pu go: "Genam mit sono se weng-lak!" Ngga ey, blung ngga naklay Elia mit sono gemang yaluim-sing. Ngga ey,WoyWali Iram go demusung mo togut go ngga tandali suey go. ³¹ Ngga ey, demu 12, blung Israel Yakob go tang yam so yaluim go, nemot sono Woy Wali Iram go nebut ngge kalik so mo weng go: "Mot go sui, Israel so mea pu!" ³² Nemot lo demu ngganemot sik so Woy Wali Iram nogo demusung gemang klik-nawon. Ngga ey, butap namon ey gemang tuet dali demusung ngganemot ketang logo. ³³ Elia lo, koydi yam so ta gono, menay ibut go ngga blo no ta gono, gemang pu-tenawon: "Sro 4 yam sogo ngga bu sre go damoy ey se tram, ngga ey menay di blo no ta go ngga blo sono bu ngga se sot-sing!" ³⁴ Nemot lo pu go: ngga kalik go danamon so se semu!" Ngga ey, nemotnang lo tandali gemang sot dali. Ngga ey, tandali gemang pu: "Ngga kalik dali so, danangglik tete sogo se sot dali!" ³⁵ Ngga ey, demusung ketang logo butap ba logo bu yelung ey gemang pipi. Butap ngga ba bu lo yam so tram. ³⁶ Menay ngga puit sogo no, nabi Elia weng go gemang pu: "Oh, Woy Wali Iram, Ablam go, Ishak go, Israel go Ki Wali Iram! Nggesui go, itak go nemotnang se senong, 'seni so Mot ngga, Israel go, KiWali Iram, ngga ey, genam ngge, Mot go tamot gabe! Seni so, Mot go nebut tang sogo so, ngge naklay genam lo mo puok gabe. ³⁷ Mot lo tup go se wa-kundo, oh, Woy Wali Iram. Saula tang ngge senong genang, seni so, Mot ngga-a, Woy Wali Iram Ki Wali Iram gabe. Ngga ey, nemotnang go dabui tandali mot sono mea iwot-dak go keng!" ³⁸ Ngga ey, Woy Wali Iram go koy li golo, menay naklay dasing go yam so kuim. Ngga ey, koy di, demu, nggano, bu naklay yam so koy nebleng lo yam so dam-sing. ³⁹ Sedue kabung naklay ngga ikum go, unuik go e... nan no nebuem gemang klling. Ngga ey, gemang pu: "Woy Wali Iram ngga Ki Wali Iram, Nemot seguong-a Ki Wali Iram gabe!" ⁴⁰ Ngga ey, Elia lo pu go: "Ida Baal go nabi-nabi ngga se mlak-sing! Klayanang go kua itak!" Memotnang lo mlak-sing gono, butuo Kison sono Elia lo wawi go geman klong. Ngga no, nemotnang blindon gemang ibot-sing. Ngga blo lo tandali sa gemang pu. ⁴¹ Nggano, Ahab sono Elia lo gemang pu: "Klong-a, ten sededam, bu se dedrop! Ngge kukluim but go sakluim tup-tugu go!" ⁴² Nggano, ten da budrop so Ahab gemang klong. Ngga ey, meduing karmel blo dega sono Elia-a gemang klak. Ngga ey, susubuwit so unuik go, segabuem unuik go nebuemnamu nan no gemang tuing. ⁴³ Nemot go koybutasemu sono gemang we-nawon: "ngge blo sono klak-bando gono, biap idi sono ikum-salo!" Nemot klak gono gemang pu: "Sogo-sogo kua go!" Nggano, tandali Elia lo pu go: "Tndali klong go ikum-a!" Ngga kalik sogo da 7 yam so gemang lemoy. ⁴⁴ Da 7 tete sogo lemoy gono, nemot go koybutasemu ngga lo pu go: "Ngga biapidi no gum seguay go, tadabui bata kalik gemang ikum go!" Elia lo pu go: "Klong go Ahab no nase pen: "Mot go kleta dali semu go, nggano, se li! Sa lo tap tong genaning!" ⁴⁵ Ngga ey, ku walong kua luik gono, ut ngga nogo sa ey gum eygo lo kukuim gono, nebit kangok go ey sawatui kekay so gemang pu. Ahad nemot go kleta no klak go Yizreel sono gemang klong. ⁴⁶ Woy Wali Iram go don, Elia blo nogo gemang lemoy. Elia nemot go kuibey dok gono, nemot kekap go Ahada mesip sono gemang itak, e... Yizreel no banim gemang pung.