¹ Nggano, Tiebe sik sogo sedue Elia saula meno sedue Tasbe-Gilead lo Ahad sono pu go: "Israel go Woy Wali Iram, Ki Wali Iram go sui no, genam lo takong go sui no, genam go suongkuno, yagui-yagui ngge ba nogo kebup ey sa ey mea kua pu, genam go lom lo pu dali gono mea pu!" ² Nggano, Woy Wali Iram go nemut nemot no gemang pung, ngge kalik so: ³ "Ngge sik sogo, mot nase klong! Woyklak sono klong go, bu kerit butuo no se son. Bu Yordan go woyklak idi so go bu. ⁴ Ngga no, ku ngganemot nogo, bu ngga no bu se drop-tebalo. Wi gagak Genam lo pu go, mot nogo ten mea iti go ngga sono mea klong." ⁵ Ngga ey, Elia gemang klong, Woy Wali Iram lo pu gu ngga keng genang so. Nemot klong go, bu kerit betuo, bu Yordan woyklak idi sogo no. ⁶ Wi gagak lo wadikua- use Roti ey menay kedong ey nemot sono iti go gemang uweng, bukerit ngganemot sono. ⁷ Ngga lemoy go, e... bugemang pang, nan ngga nogo sa kua pu go nogo. ⁸ Ngga ey, Waoy Wali Iram go nebut gemang pung, Ealia sono ngge laki so: ⁹ "Mot buong go se klong, Sarfat, Sidon idi sogo no. Ngga so se susuing. Mot se senong, Genam lo pu go, kabung nalo kenin kebong go klay, nemot lo mot nogo ten mea iti go dedam." ¹⁰ Ngga ey, Elia taut go Sarfat sono gemang klong. Yakana ngga go yataput no pung gono, kabung meno kenin kebong go gemang ikum, koy so susuguoy go. Nggano Elia lo gemang pu: "Genam no mot go busip ba sik sogo iti go seguay so ya drop go se!" ¹¹ Kabung ngg klong go bu iti sogo so, Elia lo tandali nggekalik so gemang pu nemot sono: "Nggano mot go ta sik sogo roti temu se iti dali, genam sono!" ¹² Way so kabung ngga lo pu go: "Mot go Woy Wali Iram, Mot lo takokong go Ki Wali Iram go sui no gabe pen-situgu: Genam go roti kua go, ngge tepung tempayan ba sogo ngge ey buli-buli ba sogo mlay ngge dato-a be. Se senong, genam koy iyaluim go ngge nemot dui genang sogo so gabe. Klong go, nemout duik go at go duo nogo so, ngga dam gono atnamon mea kebong. ¹³ Ngga ey, nemot sono Elia lo gemang pu "Suali kua tra, klong go genam lo pu go kalik so se semu! No, roti muong sogo-a banim semu go genam nogo-a, ngga ey mot go duo nogo tete se semu dali!" ¹⁴ Seni so, Woy Wali Iram, Israel go Ki Wali Iram lo pen go; mot go tepung tempaya ba sogo ngga mea kua kua. Nggano, buli-buli ba sogo mlay ngga yakua li, e... Woy Wali Iram lo kukunan blo sono sa pu genang ku no mea pung." ¹⁵ Ngga ey, kabung ngga klong gono, Elia lo pen go kalik so gemang semu-natun. Nemot ey, kabung ngga ey nemot go yap ba no dam go ten e... ku no ku no. ¹⁶ tempayan ba sogo tepung kua kua, Buli-buli ba sogo mlay kua kua dali. Woy Wali Iram lo, Elia go lom lo pen go kalik so. ¹⁷ Ngga lemoy go blo idi lo, kabung ngga go, denun yap ba sogo, sadui gemang tra. Sadui ngga kua go nogo, nebuemnebit ey se nega. ¹⁸ Elia sono kabung ngga lo gemang we-tenatun:"Sogo kalik golo, mot genam mit no weng go, genam go duo kebong genang so? Mot Woy Wali Iram go kebali sedue!" ¹⁹ Nggano, Elia lo nemot sono pu go: "Mot go duo-a genam sogo iti!" Danok ngga kabung ngga go ta ba sik so iti go, degu blo sogo no iti go klak gogo, nemot go sipsrek bu lo gemang weu. ²⁰ Nemot lo Woy Wali Iram sono gemang wadong, "Oh! Woy Wali Iram genam go Ki wali Iram. seni so, genam kabung ngge lo mo wawi nemot go yap ba no. Mot lo kusadu-a iti go, denun ey mo kebong ne. ²¹ Ngga ey nemot go saysuk duo ngga go saysuk blo lo srek go danangglik so, ngga ey Woy Wali Iram sono gemang pu: "Oh, Woy Wali Iram, Ki Wali Iram, duo ngge go dabuilap tandali saysuk ba sono nase kok." ²² Woy Wali Iram lo Elia go dewi ngga tup go, duo ngga go dabuilap tandali nemot go saysuk ba sono gemang degut, ngga ey, tandali nemot gemang nglong. ²³ Duo ngga Elia lo iti go, degu blo sogo sik so li go, tandali unen go ta sono gemang iti. Elia lo pu go: Ikum-a, mot go duo mo wali. ²⁴ Ngga ey, kabung ngga lo Elia sono pu go: "Nggeasui genam mo senong, mot ngge KI Wali Iram go kebali sedue, Ngga ey mot lo pepen go Woy Wali Iram go nebut ngga seni eygo nebut."