¹ Baesa nogo nebut Woy Wali Iram logo, Hanani go danon Yehua no ngge kalik so gemang pung: ² "Genam lo sung blo sik so iti go, deguena so Genam go blung Israel no taling go, No, mot lo, Yerobea go masisip no keng go, ngga tang so blung Israel kuklue piam go mo pluok, ngge tang so Genam go dabui sadui mo pung, nemotnang go kuklue piam tang sogo so. ³ Seni so, Baesa go yaptenglam Genam lo mea suep-lak. Nebat go danon Yerobeam go yaptenglam kalik so Genam lo mea semu. ⁴ Baesa go yaptenglam sik sogo, kota no kebong go, uduo lo mea dam, duen no kebong go ngga wi pling go uwet go lo mea dam!" ⁵ Baesa lo pluok go kebali nangklay, nemot nogo nebutpen, plepung go nogo nebutpen ngga naklay sam bano mo klik gemang. ⁶ Ngga ey nemot gemang kebong. Kerlam so Baesa babuasinang ey Trza no gemang tuet. Ngga ey, danon Ela lo nglangin way so deguena so gemang sui. ⁷ Ngga ey, Hanani go danon nabi Yehu, Woy Wali Iram go nebut, Baesa ey nemot go yaptenglam naklay nogo gemang pen: Nemot go tasam piam go Woy Walo Iram go suong ku no puok go tang sogo so, Nemot go dabui sadui pung go, Nemot blo nogo, Yerobeam go yaptenglam nogo kalik dali so mea lemoy. Nemot lo Yerobeam but go kebong go kalik dali so. Ngga ey Ela lo Israel go deguena so gemang suing. ⁸ Asa Yehuda no deguena so suing go, yagui 40 tete no, Baesa go danon Eala deguena so aisrael no ta gemang mlak, Trza no yagui namon yam so. ⁹ Nemot go plesedue wengkabui lo nebut degut go, Ela but genang so gemang taduing. Tirza so Ela bu drop golo mawo go, Arza Istana wengkabu Tirza go yap ba no. ¹⁰ Zimbri degut go, Ela but go gemang kebong. Ngga lemoy go, Asa deguena so Yehuda no suing go, yagui 27 tete no. Ngga ey, way so Zimbri lo deguena so Israel no tagemang mlak. ¹¹ Deguena so lemoy go, sipsuing blo no suing go, Nemot lo Baesa go yaptenglam naklay gemang tuk-sing. Sedue klayanang go kota nogo itak go kua wali. Nemot go yaptenglam ey nemot go andua-andua eygo kua itak. ¹² Zimbri lo Baesa go yaptenglam naklay suep go ngga, nabi Yehu go lom ba lo Woy Walo Iram go nebut pen go kalik so mo lemoy gemang. ¹³ Baesa ey danon Ela eygo kuklue piam go tang so, sedue Israel lo kuklue piam mo pluok, ngga lo, Woy Wali Iram, Israel go Ki Wali Iram go dabui sadui mo pung, nemotnang go kuklue piam seni kua go nggaemot tang so. ¹⁴ Ela lo semu go naklay, ngga seni so sam ba no mo klik gemang. Nemot go wali nogo nebutpen naklay. ¹⁵ Asa lo Yehuda no tamlak go yagui 27 tete no, Zimbri lo Israel no deguena so Tirza no ku 7 yam dato so. Ku ngganemot nogo, nemot go blung Gebeton ey plepung sogo so, tenda ba so sedue Filistin go nan no gemang wok mo teguot. ¹⁶ Nggano, blung tenda ba sogo lo sedue lo pu go nebut gemang tup. "Zimbri lo nebut degut go, ngga ey, deguena but go mo kebong." Ngga ey, blung Israel naklay lo, Plewengkabui Omri-a Israel go deguena so gemang tuik ku ngganemot no, tenda ba no. ¹⁷ Gibeon sik so, Omri ey blung Israel naklay ey ip go gemang klong-lak, Tirza wok teguot go ple pung genang so. ¹⁸ Zimbri ikum go, kota ngge wok moteguot ba, nemot deguena go yap put ba sono degut go, deguena go yap ngga, ngga ba sik so koy lo gemang puit-dak. Ngga, nemot ey gemang kebong. ¹⁹ Ngga, kulue piam miam dega so nemotnang lo Woy Wali Iram go suong ku no pupluok go ey mo kerlam. Nggano, Yerobeam go taybat pupluok go no keng go nogo. Ngga tang so, sedue Israel kuklue pluok dali go nogo. ²⁰ Zibri lo itak go nebutpen naklay, nemot go takebali, wali naklay seni so sam ba no mo klik gemang. Omri Israel go deguena so gemang suing. ²¹ Ku ngganemot sik so blung Israel namoey tegek go, nemotnang sik sogo temu Ginat go danon Tibni deguena so tuik gono keng, temu dali Omri no keng. ²² Omri no keng go blung don kangok, Ginat go danon Tibni no keng don kua. Nggano, Tibni kebong go Omri lo deguena gemang suing. ²³ Asa Yehuda no deguena so suing go yagui 31 tete no, Omri Israel no deguena suing go, yagui 12 yam no. Omri lo Israel tamlak go yagui 12 yam so. Tirza nogo yagui 6 yam no gemang suing. ²⁴ Ngga ey, Semer go ta sik so, meduim Samaria nemot perak talenta namon lo king go, Meduim ngga blo no yakena buong gono, sui Samaria so gemang temuit. Ngga Semer go sui no keng go. Semer, nemot go meduim tang so. ²⁵ Omri lo pupuok go, Way Wali Iram go nemuku nogo piam go-a pupluok. Naklay piam seni banim go sedue lo pluok go ey kua kerlam. ²⁶ Nemot lo Nabat go danon Yerobeam lo pluok-akam go wali masipip no gemang keng. Nemot lo kuklue piam pluok go tang so, blung Israel kuklue mo pluok dali. Ngga tang so, Woy Wali Iram, Israel go Ki Wali Iram go dabui sadui mo pung, nemotnang go piam senikua go ngga lo. ²⁷ Omri lo puok go naklay, nemot lo ple pung go, tasam puok go naklay, sam ba no yam so mo klik gemang. ²⁸ Nggano, Omri kebong go, babuasinang ey Samaria no gemang tuet. Danon Ahab lo Israel nogo deguena, nglangin way so gemang suing. Ahad Israel nogo deguena. ²⁹ Deguena Asa Yehuda tamlak go, yagui 38 tete no, Omri go danon Ahad deguena so Israel nogo tagemang mlak, Samaria no, yagui 22 yam so. ³⁰ Omri go danon Ahad logo, tasam piam go-a Woy Wali Iram go nemuku no puok-akam. Naklay, kangok dega, nemot go kuklue, sedue banim go ey kua kerlam. ³¹ Nabat go danon Yerobeam lo pluok go taybat, kuklue piam ba lo wali go, nemot kua yam. No, nemot li Etbal go denun, Izebel ne iti dali senun so. Ngga ey, nemot keng go, ida Baal no susubu ne wit. ³² Nemot lo Nemot lo ida Baal go yap ba no Ida Baal nogo so demusuing gemang klik, Samaria nogo. ³³ Ahad lo, demu lo Asyera kalik go duosana-sana gemang semu dali. Nggatang so Woy Wali Iram, blung Israel go dabui sadui mo pung dali. Naklay kangok dega, banim go sedue lo pluok go ey kua kerlam. ³⁴ Nemot lo tamlak go ku no, Betel sik sogo sedue, Hiel lo Yerikho tandali gemang buong. Nemot go danon trang sogo Abiram go wengkabui blo no gemang buong. Nggano, nemot go danon sat Sugop go wengkabui blo no, nemot go yataput gemang sebut. Ngga naklay, Woy Wali Iram lo, nemot go nabi Yesua , Nun go danon lo pen go nebut ey mo kerlam.