¹ Ku ngganemot nogo, Yerobeam go danon Abia sadui so sesrek. ² emot go senun sono Abia lo gemang pu: "Nggeasui go, mot amka kok go, srem semu go dali se suing, nemotnang lo mot senong go pu genaning! ngge, Yerobeam go senu gabe. Silo no mot klong go, ngga sogo nabi Abia gemang. genam deguena so saula nge no lemoy genang sogo, nemot lo pu go gemang. ³ Mot go ta ba no roti naklay, kismis muk duik go, namseguon git sip ba no sre go, naklay ikak go se klong nemot ey se tegu, Nemot lo mea pen, so-a ya lemoy denok ngge nogo." ⁴ Yerobeam senun lo ngga kalik so gemang semu-natun. Silo sono klong genang so nemot gemang tautnatu. Klong go, Ahia go yap no degut go, Ahiya nemu mo pung go nogo, mo sedue se so lemoy go nogo. ⁵ No, Ahia nogo Woy Wali Iram lo mo pen go nogo, "Se senong, Yerobeam go senun mea weng mot no nemot go denun ngga sadui sogo nebut usi genang sogo. Nemot no ngge kalik so se pen lo, kabung ngga weng go degut go nenep sogo sedue kabung kalik so nemot logo mea pluok." ⁶ Nggano, Ahia lo yataput no dedegut go masikluim tup gono, nemot lo gemang pu; "Yerobeam go senun, degut-a! Sogo tang so, mot ngga kalik nenep sogo sedue kabung kaliksone semu to? Genam no pu go , mot sono don ey pen genang sogo so. ⁷ Klong go Yerobeam no se pen: "Woy Wali Iram, Israel go Ki Wali Iram lo ngga kalik so gabe pen: "Banim no, Genam lo mot blung nesip no itak, nggano deguena so Blung Israel no temuit go, ⁸ ngga ey, Daud go yaptenglam sik sogo kladian tegek go, mot go ta no iti go. No, genam go tamot Daud kalik so mo kua kengduk ne. Genam go demutrui no nemot dabui lo mo keng duk go kalik so. Nemot lo seni eygo, genam lo iwat go-a mo pluok-sanakam. ⁹ Tasam piam dega go, mot lo mo pluok, ida meno-meno no mo keng go demu lo ide mo pi-sing. Banim go sedue-sedue ey kua kerlam go taibat mot lo mo pluok, ngga tang sogo so genam go dabui sadui mo tra. Ngga ey, mot lo mot go nemuku sik sogo, Genam betep go srong-a mo kong. ¹⁰ Ngga tang so, Yerobeam go yaptenglam blo nogo kusadui-a Genam lo mea tetaling. Yerobeam go yap tenglam sik sogo, sedue denok Genam lo mea nega-sing. Sip suing blo sogo, sipsuing ku sogo, blung Israel sik sogo, genam lo mea nega-sing. Yerobeam go yaptenglam, naklay yam so mea kerlok-sing, kui kerlok go kalik. ¹¹ Yerobeam go tang sik sogo sedue kota no kebong go, uduo lo mea dam. Duen no kebong go, wi plinggo uwet golo mea dam-sing. Ngga kalik so, Woy Wali Iram lo mo pen go nogo. ¹² Mot buong go mot go yap sono nase klong! Mot go masi yakena no guali go no, mot go duo ngga mea kebong. ¹³ Isrel naklay lo u mea kluo, nggey mu no mea tuet. Seni so, nemot-a klaya, Yerobeam go yaptenglam sik sogo, suey so simu nogo mea tuet. Seni so, nemot sik sogo tasam gemang, Woy Wali Iram, Israel go Ki Wali nogo ey iwat go, yang ngga Yerobeam go yaptenglam sik sogo. ¹⁴ Israel nogo so, deguena klaya duo-a mea taling. Ngga ey, Yerobeam go yaptenglam Ngga sono Woy Wali Iram lo mea suep-sing. Ku tebot ngge bano. Nggeasui dali. ¹⁵ Woy Wali Iram lo, blung Israel ngge, bu lo yum nsring go kalik so mea sret go nsring-sing. Nan teguop go ngge, asibabu no Woy Wali Iram lo itak go blo sik sogo, sedue Israel Woy Wali Iram lo bu Efrat idi sono mea iti. Seni so, nemotnang lo, ida nogo sogo neguon miam ey mea semu go nogo. Nggano Woy Wali Iram nogo dabui sadui mo taling. ¹⁶ Sedue kabung Israel nemotnang go kuklue pia Yerobeam lo plok go tang sogo so, Woy Wali Iram lo ngga kalik so mea semu." ¹⁷ Nggano, Yerobeam go senun ip go Tirza no tandali gemang klong. Nemot go yap yataput no degut gono, nemot go denun sadui sogo gemang kebong. ¹⁸ Nemot tuet go, Woy Wali Iram lo nabi Ahai go lom ba lo pen go kalik so, edue Israel naklay u gemang kluo-nenawo. ¹⁹ Yerobeam go wali naklay nogo nebut pen, nemot lo ple pung go, nemot lo Israel ta mlak go naklay sam ba no yam so mo klik gemang. ²⁰ Yerobeam lo tamlak go yagui 22 yam no. Nemot baning kua kebong go, asibabu nang ey tuet go nogo. Nggano, danon Nadap lo deguena so nglangin Rehabeam way so Yehuda no gemang suing. ²¹ Salomo danon, Rehabeam lo, Yehuda nogo deguena sogo gemang suing. Nemot deguena so Yehuda no ta mlak go nogo nemot go yagui, 41 yam no, Yagui 17 yam so, nemot lo Yerusalem, Woy Wali Iram lo kuoy go kota, Nemot go sui iti genang so kuoy go kota no, sedue Israel nesip no tamlak go suing go. Nemot go unen go sui, Naama, Amon kabung lo tui go. ²² No, sedue Yehuda lo Woy Wali Iram go nemu ku nogo, taybat-a kangok so pupluok. Nemotnang lo Woy Wali go dabui ba nogo, nenele-a kangok so tetaling. Nemotnang go asibabu lo Woy Wali Iram no dabui lo keng go kalik so kua keng ne. Nemotnang lo kuklue piam-a puluok ne. ²³ Nemotnang lo ida talo semu go sip meno-meno no klik go, nggano ida nogo demu pi-sing go, menduik kangok go blo no, nggano, di senang kango-kangok ga nui ba no, ²⁴ Ngga ey, kamea tap ibe so pupluok go, nan ngga naklay nogo pupluok ne. Tasam suk kua go-a naklay nemotnang lo pupluok. Saula tang saula tang Woy Walo Iram lo, Israel sik so go tasam kalik so ne puluok. ²⁵ Ngga no, Rehabeam lo tamlak go yagui 5 tete ba no, deguena nan Mesir sik sogo ngga Sisak weng go, Yerusalem sono ple gemang pung. ²⁶ Nemot lo, Woy Wali Yap ba sik sogo tau ey deguena go yap ba sik sogo taut ikak go gemang klong. Naklay ngga ikak gono, Salomo lo demusamon lo pi go taming ikak go gemang klong dali. ²⁷ Ngga ey, taming ngga way dali so, deguena Rehbeam lo taming demening go tembaga lo gemng pi-sing dali. Plesedue wengkabui nogo , deguena go yap yataput yay suing genang sogo so. Plesedue yay so susuing go degu ba no ikak go gemang ta-sing. ²⁸ Deguena Woy Wali Yab ba no degut-go nogo, Plesedue ngganemot lo taming ngga iti go degut go, ngga ey tandali yay so suing go degu sono iti go tandali mea degut. ²⁹ Rehabeam logo nebut pen itak go, nemot lo puok go naklay, sam ba no gemang klik. ³⁰ Rehabeam ey Yerobeam ey go susuing go nogo ple seguong-a senang so pupung, ku naklay nogo. ³¹ Ngga ey, Rehobeam kebong go asi babunang ey gemang yaluim dali. Nemot go asibabunang mit no Daud go yakena no gemang tuet. Nemot go unen go sui, Naama, Amon kabung lo tui go. Nggano, danon Abiam lo deguena so, nglangin way so gemang suing.