I Miri Yehu Narihi Bokulu-pa Welingu Lai Muha ¹ Angu dedi. Angu-nda patau karitu papa auna i Allah! Mala pangada hamu-manya badi yiana i Yehu! Na paihiku-nya Nyuna paraina i Allah panjadi Ratu Bokulu la Anggama payapa-nda. ² Na- tuturu-ma duna lai Allah nama mbada pindinya la parama nuna hama tuna i Muha ama-ngu bana tuturu pa-palaku-ya na parama-na la uma Allah. ³ Taka i Yehu duna na-parakangu-ma pa-ngalangu tembi-maraku ma-parihingu welingu lai Muha. Nadu na tau na mawulu uma ba parihi tembi welingu la uma nuna. ⁴ Deningu-na nimbihu-da da uma ba ninguma mawulu-ha, taka na mawulu-ya mbuu ndabana. Jiaya i Allah duna. ⁵ Muha na tuturu-ma duna bama-lumu-nya da-a la uma-na i Allah dangu la pa-pataka-nya na papanii-na i Allah la rehi na-manamu-nya. ⁶ Taka iKaritu duna na-tuturu ba ana-ya, na makata-nya na uma-na i Allah. Nyuta maka yia umana i Allah jaka pa-daingu ringgitu-nda dangu pa-daingu mandungu-nda la eti-nda pangala-nya napamonu-nda. Pangala-Nyauwa Patundu-nya I Allah. ⁷ Jia ba tuna nu, hama tuna papanii-na na ngahu-na I Allah. La lodu nahu, jakai rongunya na wai liina I Allah. ⁸ Ambi malihu-du hama tuda da boku la mangilu-mi, ba da katadaku lai Allah, hi dakama-nya I Allah la marada wara. ⁹ Lai nu dakama-ngga parai da boku la-mangilu-mi, dangu dakaka-ka, wana I Allah, jiapa ka mbada ngita-danja da pawunda-nggu ba patu kambula ndauna mandaina, wana. ¹⁰ Jia-duyaka hikuhangga-nja hi kupanii, naingu-mana ba nda tuturu, dangu nda dabihu pa-karuduku-nja da hupu linggu, hi wanggu. ¹¹ Kumbeni hi ku-harangu, Nda jia ngalangu ada patama la tana nuna la pa-hangahu dangga Nyungga, wanggu, wana. ¹² Oi angu dedi, manggangu ka ambu ningu ha atu lai nyima ma aka-tu etina dangu manda pawai, hi na-kandulingu ba nama raunya I Allah maluri! ¹³ Jia ba tuna, ambu ningu ha atu lai nyimi pa-panyuanga ma akatu hina-ndubaku-nya I Allah, matawa kai marangga panaungu dangga angumi nimbihu lodu ba talanga luru-ndapa la rehi nahu, nu na lodu Nahu” ba wana la huratu matua. ¹⁴ Nyuta mbudaba-nda angu pajarangu-na I Karitu-ta mili aru nyuna takata undu-nya nama-mandungu la etinda piti welingu la pakiri-na lundu hupu njapuna. ¹⁵ Yiana-na na patulihu la huratu matua, jakai ronguya na wai liina I Allah la lodu nahu, ambi malihu-du, hama tuda da boku la mangilu-mi ba da-katadaku lai Allah, wana. ¹⁶ Mala nggamu haka wami da marongu-ya na wai liina I Allah hi katadaku biada-nyai lai Nyuna? Hi jia ndaba-maha da tau pa iru ngandi-na I Muha welingu la mehiru, wangguka? ¹⁷ Dangu ka nggamu-haka da pa-mbenina I Allah la patu kambulu ndangu mandai-na? Jiaha da matuu manjala, hi da meti hadaparu la marada tialangu, wanggu-ka? ¹⁸ Ba tuna yia na harangu-na I Allah, nda jia ngalangu ada patama la tana nuna la pahangahu dangga Nyungga wana ka nggamu-haka duda da pala ana I Allah? Jiaha da tau da ma-katadaku lai Allah, wanggu-ka? ¹⁹ Nu piduda-nyaka nahu, hi nda da-ngalangu patama ba ruku nda pawai da lai Allah.