¹ Napawai ba wanda jiaya na-mandungu langataka-na laeti-jakanggarahada pa-monungu, nu jiaduya-ka ba mbada ninjaka la cima da kawu-da panda ngita wangu mata. ² Rukuna ba pawai da tau la handaka-na hi nambuha-nja paraina i Allah. ³ Rukuna ba pawai, hi tapinya ba na paluna i Allah na ma-padika-nya na pa-nggubulu awangu; jia ba tuna, nggaraha da pangita-nda dedida welingu la panda ngita. ⁴ Rukuna ba pawai hi ngandi kameti maraku lai Allah i Hambilu, nu na kameti maraku na marihi-nya na kameti maraku-na i kangu. Rukuna pawaina nuna hina-nggepiya i hambilu paraina i Allah ba tau hamuya, nadu ba na-luahangu bana nggepi-ha da pawotu-na paraina i Allah i hambilu duna mbada meti-naka taka rukuna na pawaina hi re-reu bia napa lundu nahu. ⁵ Rukuna ba napawai, hi nda mameti i Henuku, na nyuna pa-padita-ya hi karai-ya lai Allah. Nda ningu-a tau mahunggu-ya, maa ba mbada padita-nanyaka duna paraina i Allah. Pa-tulihu-mayaka daa la huratu matua ba ndendipa pa-padi ta-ya i henuku, nali-maya na etina i Allah. ⁶ Jaka nda ningu pawai, nda ningu-a ha-atu tauma-ngalangu paliya na eti-na i Allah. Nadu na tau na ma-lihi-nya i Allah nawai-maya badi ba ninya i Allah. Dangu ba-nawua-nya wundana na tau na ma-himbuya Nyuna. ⁷ Ruku pawaina hi napanii-nya i nuhu paraina i Allah rukuda da madedi la lodu ma-lamiri, da pandedi ngitana. I nuhu naka-ruduku-nya i Allah hi na-pandai-ya na kapalu lapa-pamara wanya dangu na kuru umana. Nu hi hukunya na pinu tana, taka i nuhu duna tau hamanya wananya paraina i Allah rukuna na pawaina. ⁸ Ruku pawaina, na-karadaku lai Allah i Ambrahamu ba na-radunya hina paliawa-ya palaku la hau pangia napa randi-nanya paraina i Allah. Ka laku-na nyaka nyuna i Ambrahamu dangu nda pinanya na ngia pa hanggangu-na. ⁹ Wangu pawaina, nama-ndapu nyuna i Ambrahammu la tana pa-randi-nanya paraina i Allah ba takau takaya. Ka ngiangu-nanyaka-lai nu i Ambrahamu la uma tiara. Tumbuda i haku dangu i yakupu, dama angu ndumanya na parandi-na i Allah. ¹⁰ Nadu ba patia-ma-nanya duna i Ambraham na parangu na maningu lata mandungu, napa pa-pakaka hahana dangu na pa-rahada-na i Allah. ¹¹ Ruku pawaiana, hi na-ngalangu bia kawukuna lai hara nyuna i Ambrahamu, taka i Hara duna ba tau mbuti aya. Na mandungu-ma la etina i Ambrahamu ba na-patutu-nya na parandina i Allah. ¹² Jiapa kadu la rehi nuna bahama tuna tau bambada metiya i Ambrahamu, na nyuna nangala pahau dangu biaana umbuku-na da panda tau padiha-hama tuna na dangu da kandumu la awangu dangu wara la hingi tehiku. ¹³ Nyuda numbuu ndabada daingu pawai-mada hi lundu dameti. Nda dangala-anjapa da parandi-na i Allah, taka dangita dangu da nggepi marau-aya. Jia ba tuna nuka pajia-duda-nyaka ba tau takaha dangu ba tau tama-aha yia lapinu tana. ¹⁴ Da tau da mapanii tuda nuba pa-ita luaha-danya ba himbu-danya tana na manjadi tana wikida napa. ¹⁵ Nda jia-aya na tana na pambada tu kajia-da na pa-pangada manuda. Nadu jaka tunanu, mbada peku-daka lati pakabeli latana ngia paweli-da. ¹⁶ Taka ita-ndanyaka, ba rinju da-nya na hau tana na marihi hamu, nuna tana na maninya la awangu, jia-duyaka hi nda na-makia i Allah, Allah-maya jaka wada-nya ma-a mbada payiama-du-nanjaka hau paraing ndumada nyuda. ¹⁷ Ruku pawai-mbuna- i Ambrahamu hi nawotu-yai i haku ba na tuya kameti marakuna ba jiaya nakama-nanya-paraina i Allah. Lai Ambrahamu-maka na ngia papara-ndinguna i Allah na nyuna ba tuna na majangu bia i Ambrahamu pawua-ya na ana mangu didingu-na. ¹⁸ Mbada panii naka i Allah lai Ambrahamu, lai ihaku yiana-maka na ngia pa-ngalangu-mu ana umbuku-mu na parandi nggunggau, ba wananya. ¹⁹ N-anandungu-ma duna laetina i Ambrahamu ba namaka-ma duna i Allah la pa-pahada belinya I ihaku welingu la meti-jia ba tuna nu i Ambrahamu mbada ngala. Beli-nanya-ka I ihaku welingu la meti peku wandambu. ²⁰ Ruku pawaina, i ihaku hi piaka-nja mahamu i Yakupu dangu i Ehau ndumana na lodu na manamu-nya. ²¹ Ruku pawaina, bandedipa nameti i Yakupu, hinapiaka maraha-atu-nja mahamu da anana i Yakupu- hina-namanya-nyai Allah bana-payuka la pingina na to-kungu-na. ²² Ruku pawaina, i Yakupu-ba mareni meti-ama-naka-hi napanii-ya na luhuda da tau ihirailu welingu la mehiru -hi-napa muanja jaka nggiki-danya badi napa na metina. ²³ Ruku pawaida, da inana da amana ba nadedi-ka i Muha hida-wini-nya katailu mbua wulanya parai da ina amana. Ba-da-ita-ya paraka miningu-na dangu nda damanga-datu-anya nahupu liina na hanganji. ²⁴ Ruku pawaina, ba na-matua-ka i Muha nda nabihu-a ka tikiya ba anana na ananakawini Firaunu-ya. ²⁵ Narihi mbuhangu-pa la papada danya mayila na banjaru-na i Allah welingu la papada-nya na luri hamu nu naluri la-njala na manda pira-a mandaina. ²⁶ I Muha napada-nya la etina ba kanjupu rihi palawingu-mayapa duna la-pangala-nya na papawa-ya lumuna na hanganji ma-pamanangu pa-randi-na i Allah welingu la pangala ndabanja da banda tana mehiru, ma ba monu-mananya duna i muha nawundara la lodu mala miri. ²⁷ Ruku pawaina, i muha hi na-dunjaku-nya na tana mehiru dangu nda mangatu-nanya na hanggana na hanganji. Ka laku hanggangu-nanyaka i muha la ngia palaku-na ba hama jiangu ita bia-nanya i Allah na panda ngita. ²⁸ Ruku pawaina i muha, hi nakata-nya na uku paha hi na-wuangu pareta kaperinja wai ria da pindu uma tau ihirailu ka ambu na-pameti-ha da kawunga ana-da parai papaliawa-na i Allah na matanggu butuhu kayeku tau. ²⁹ Ruku pawaida da tau ihirailu, hi peku pala-danya na tehiku rara, ba hama tuna malii la mamara biaha, taka da, tau mehiru da ma-kamangu-mbu la papala da mumuhu. ³⁰ Ruku na pawai-da tau ihirailu da-nyungguru-ha da kangeli paraingu Yeriku ba dahala-ka-pa-winggiru appihu mbua lodu-nya. ³¹ Ruku pawai-mbuna i Rahapu pahunda, hi nda namohu karia bianja da tau da ma—ndubaku-ya iAllah: ba nanggepi mangu hamu-dunjaka da tau ihirailu dama-kapilitu tana. ³² Nu ba tana. Peku pani pa-ngalangu-manggu, taka nanjapu-nggaka rehi. Nadu ba ndedi ku tiki-aha Inggindeungu, i mbaraku, i Himungu, i Yeputa, i Ndau-tu i Hameulu lupa da wunangu-ka. ³³ Ruku pawaida, hi mbada pakaku-daha da pa-nganji. Da wunda ya na matanji, hi dangala-nya na parandi-na i Allah. Dawunggu-nja da ngaru hinga. ³⁴ Dapada epi ma-kandulangu, da-pahala welingu la tanju-nanja hapanda. Da manda maka. Hi dalua-ya la pamaka; nyuda da-kabuanangu la pabiara, hi da-biaraha da pamba banjaru tau hangadangu. ³⁵ Ruku pawaida, da kawini dangala belinja da taudaka da mameti, ningu-mbu ma-pajamangu wikida ka pa-mayilaha mameti-ningu-mbu ma-pajamangu wikida ka pa-mayilaha lundu da meti, nda dabihu-a kapahala-ha-ba da-mbuhangu-ningupa la pa-paluri beliha la’hili hau luri na marihi hamu. ³⁶ Ningu pa-payudi ,papalu, patungu nggili bahi, dangu pa-pananggangu, la uma kapata-ngu. ³⁷ pa-pinjalungu watuha lundu dameti, ningu pa-ruandangu, dangu ningu pa-pameti wangu hapanda. Da-njadangu dangu paki manula mbimbi jaka ndia manula kamambi; ba dangu milada. Pa-pamayila dangu pa-pajara-ha. ³⁸ Na pinu tana yiana nda raka pangia-andaya. da- njadangu la marada tialangu dangu la tandula- tandula, da-ngiangu la ciangu dangu la ruawa tana. ³⁹ Nda uku bokulu-ya na manangu na pa-ngalada da tau mbuu ndabada nuda rukuna na pawaida! Jiapa-kai ba tuna nda dangala-anya na parandi-na i Allah. ⁴⁰ Nadu ba ningu pa-pakaka-na duna i Allah na marihi hamu ndumanda nyuta. Nu na pa-pakaka-na jiaba da-karianda nyuta-a hi pekuda la panda ningu nyurangu.