Nameti-na Miri Yehu Karitu na Handakangu-a-lundu nu-nu ¹ Na uku anggama Yahundi nawangu pa-lamaru-a ba-na pi-nuna manja da mahamu da manamu-nja, banda jia pakuya nuna hada langataka-da. Nuna na uku nda nangalangu-a pa-palundu-nya i Allah ba nawangu pangandi maraku. Jiapa-kai kana nimbihu ndangu ba nawotu manu kameti maraku ma-hamangu. ² jaka mbada payaha langataka-manjaka lati da njala tau da malumunya i Allah, kanda hili ningu ndaku-a duna pandanguda njala, dangu nda pahili wotu-apa kameti maraku. ³ Taka nama—luahangu, jianihai-ka da kameti maraku pawotu la-nimbihu ndaungu dama-panamu-nja da tau rukuda da njalada, ⁴ Nadu nawai ria hapi dangu wai ria kamambi bum-bu ba-nda da-ngalangu-ma duda pa-pua dahu njala. ⁵ Jia-duyaka ba nataka-ka i Karitu la pinu tana, hi napani-nya i Allah, nda kameti maraku dangu mangejingu-a dumu pambuha-mu, taka na nyuna mbada payiama munggaka tada ihingu. ⁶ Nda kameti maraku patunu-a pauara-mu jaka ndiaa nda kameti maraku pa-jamangu wangu njala-mbu. ⁷ Hu kupanii-yia-nggaka yia, ou Allah! Mainggu-nyaka pa-patutu-nya na pawuku-mu, hama tuna na pa-huratu la huratu matua rukunggu nyungga, wana hi wana. ⁸ La kawunga-na napanii i karitu, nda kameti maraku dangu ma-ngejingu-a dumu pambuhamu; nda kameti maraku danda patunu dangu nda kameti maraku ruku njala pa uara-mu, wana. Tuna nu na panina i karitu jiapa-kai ka pa-panatungu la uku anggama Yahudi-ha ba wotuha nuda da kameti maraku mbuu ndabada. ⁹ Halaku nu hi napanii i karitu. Jia-nggaka yia ou Allah! Mainggu-nyaka pa-patutu-nya na pawukumu, wana. Jia- duyaka hi na-pahangilu ndabaha da kameti maraku da ma-wungangu paraina i Allah, taka hi na-pahilu wanja kameti maraku-na i karitu. ¹⁰ I Yehu Karitu mbada patutu-nanyaka na pawuku-na i Allah hi na-mangejinguwikina ba kameti maraku-ya. Rukuna na mangejingu-na nuna ba nahandakangu-a panunju-ya lundu nu-nu ka payaha ndaba-nanjaka welingu la njala. ¹¹ Nimbi-na na ratu Yahundi na pahara-nya na wai ngiarana nimbihu lodu ba ratuya, dangu na-panutakungu pa wotu-hada kameti maraku ba jia-jiama-aha. Taka da kameti maraku nuda nda da-ngalangu ndoku-a pa-puadahu njala. ¹² Taka na nyuna, i karitu duna hau-a kameti marakupawo tu-na na pa-jamangu wada da njala,taka na kameti maraku nuna na-undungu-ma duna ndumana . Lundu nu-nu. Ba nahala-ka pawotu kameti maraku, ka-mandapu-nanyaka i karitu la kawana-na i Allah hi anguda pa-pareta. ¹³ Nahu patiangu-nanya padua i karitu hi lundu na-panyaku-ha da papa-naka paraina i Allah. ¹⁴ Jiaba tuna nu rukuna na kameti maraku ba hauna, mbada palundu-nanjaka la nda ningu nyurada paraina i karitu da tau da pambada payaha-na welingu la njala. ¹⁵ Na Ngahuna i Allah na- hakahii-mbu-nyaka lai nyuta ruku na jiana. Ba napanii na Ngahuna i Allah. ¹⁶ Yiana-ya napa-randingu na parindingu na parindi-nggunja napa la lo-lodu na manamu-nya, wana i Miri, napa ka kutuha da ukunggu da-a la etida, dangu ka ku-huratu-ha da-a la pa-ngadangu-da, wana. ¹⁷ I Allah napanii-mbu, nda ku-utu-ahapa da njalada dangu da akatu-da, wana. ¹⁸ Nu batuna pambada jamangu-haka da njala dangu da iraku, nda nggara ihi wangu-apa la pawotu maraku pa-jamangu wangu njala. ¹⁹ Jia batuna-angu dedi, rukuna na metina i Yehu, ka toru-mbeni-ndanyaka patama la Ruawa mahupu matua. ²⁰ Ba mbada luata-nandaka ngarangia mbidi i Yehu, nu na-ngarangia na mawua-nda luri. Na ngarangia nuna nalii ningu la dindi tiara, nu na tada ihi wikina i Yehu. ²¹ Dangu ba ningu-ndaka nahu ha-atu ratu bokulu, na ma-ta-nara ya na umana i Allah. ²² Jia ba tuna nu, malawa kata- mareni-ya i Allah mangu-tanji eti-nda dangu mandungu pawainda; wangu eti pa-payara hu welingu la kaduku-nya na njala. Dangu da tada ini pambada baha wangu wai kahingiru. ²³ Matawa ka ta-pamandu-manya na papiaka-nda rukuna na pamonu-nda, nadu ba pa-monungu-maya duna i Allah dangu na-patutu-manya duna na parandi-na. ²⁴ Dangu matawa ka ta-maranga pa-hamata dangga angunda, kata-manangga pahani dua wiki la pambuha-nya na angunda dangu la pawunda mahamu. ²⁵ ka ta-pauhi manuma dangga angunda, ambu hawia-ngu. Manau tuturu-manda bani lapa-marangga pa-undungu dangga angunda. Nadu ba tapi-manya ba nda namandai-apa na lodu takana i Miri. ²⁶ Nadu jaka mbada taka-nandaka pulungu ma-tubangu welingu lai Allah, taka hi taharawuku bia-ya patuku manu manjala, kanda hili ningu-apa kameti maraku pa-puadahu wanjada njalanda. ²⁷ Na maninya lai nyuta mbulungu-ma ana bata-hanuabaku-ya ratananda wai ngiara i Allah dangu na epi hangana na ma tunu palapu-ha napa da bau da ma-ndubaku-ya nyuna! ²⁸ Na tau na manda patutu-nya na uku pawua-na i muha pa haku pameti-ya dangu nda pa-jama-anya, jaka madua matai lu na ma-hakahi-nya ba njala langataka mananja. ²⁹ manau mbotu-naipa duna na hukungu napa-panggunangu-ma badi la tau makali-lijaku-nya na ana Allah. Na tau nuna na rakaba-ya na wai ria pa-randingu-na i Allah. Nu na metina i Karitu na ma-payaha-nya la njala. Nyuna napa akanya i Ngahu na ma-wuangu pa-namungu. ³⁰ Tapi-manya nggamuya nu Nyuna nama mbada panii, napa hukungu! Na mawana. Dangu na napanii. I Miri napa na-patanda-nya wai ngiarana na banjaru-na, mawana. ³¹ Nda uku mara-daputa jaka ta-yamihu la limana i Allah maluri. ³² I namu-mayai badi Angu dedi, nggi-nggikina na lurimi larehi na ma-lapahu la rehi nuna, ba nahala pa-handaraku-nggai hambilana i Allah. Ba dira mayila-kai; na nyuna daingu-mami bai pajarungu dira matiki. ³³ Talanga handaka-na da-pakalana-kai dangu manda hamunya ba da-palua-nggai lima la hangga madangu. Talanga han daka-na mitanggu mayila daa-mbunja nyimi dang nyuda da pa-paluangu lima tungu nu. ³⁴ Dangu bai hawina karian-ja da tau ma-ngiangu la umakapatangu. Taka ba wahi ndaba-haka da mangumi, inggepi mbaha eti biaya nuna, ma-a bai pidunya ba ninyapa na mangumi na marihi pahamu, na ma-padangu lundu nu-nu. ³⁵ Jia ba tuna nu, matawa ka ambu dambua-tadu da monungu mi nadu jaka daingu-mami la wai, nadangu-ma napa na wundami. ³⁶ Ipa-patangu-ma badi, ka peku nunju-minya na pawuku na i Allah, ka peku ngala-minya na parandina. ³⁷ Maa ba pa-tulihu-duya la huratu matua, ba ndapira-ama-napa, ba naluu taka nyuna na manamu-nya; dangunda jia pare-rehi-ananya na maina. ³⁸ Hamanai na banjaru-nggu na mantaji napa napawai hi naluri taka jaka ningu la huangada ma-kandulingu, ka nda ku mbuha-anya napa, bawana. ³⁹ Nyuta duta nda banjaru ma-kandulingu, dangu ma-njarangu ata. Taka na nyuna banjaru mapawai lai Allah-ta dangu-papama-nanguta.