¹ Lahau rehi, larehi yi Paulus ndangui Saulus mbada lapahunyai Amfipolis ndangu Apolonia, nyuda takka la Tesalonika, lagini ningu hau sinagoge tau Yahudi. ² Hallaka, hamana pambada palaku nai Paulus, na tama la huanga nda nyuda, ndangu lundu tailu lodu minggu na kareuku ndangu nyuda weling la mbuku pulung tanji, ³ Mbana paluahanya ndangu mbana pa'ittanya mbai Karitu ndaingu mayilla ndangu hadang welingu la huanga tau meti, ndangu wanna, "Yehu yiana, na pabuabar nggu hanggang lai nyumu, njiayai Karitu." ⁴ Hallaka, na hawiangu weling lai nyuda na pakapanduk ha ndangu na pambulu nja ndangui Paulus angui Silas, hama ndangu ma ndangu tau Yunani nama mangadat nyai Allah ndangu nda hakudu kawini-kawini patembi. ⁵ Njiayaika, tau Yahudi njadi iri Eti ndangu na wanda tau mapirra manda hammu nama paluangga maingu la pangia madangu, nyuda nda pabundunja mandangu tau ndangu nda pandoi ma kanyauru la paraingu, hallaka hi nda karungguya na umma nai Yason hi nda himbu yai Paulus angui Silas ndumang pangandi ha nyuda la hambeli la hangga tau madangu. ⁶ Larehi nyuda ndada hunggu yai Paulus angui Silas, nyuda nda mboru nyai Yason ndangu mapirra angudedi mapawai la hangga amabokul la paraingu, ndangu hi wanna, "Tau-tau nyiada, nama mbada paruhaya na pinutana, mbada mai mbuna lai yohu. ⁷ Ndangu, Yason na katakuha nyuda, ndangu nyuda mbulu ndaba ndatu pani nda nama lawangu hukungu Kaisar ndangu nda pani mba ningu maramba, nuna yi Yehu." ⁸ Tau ndangu angu amabokul paraingu njadi nda hamu mbada rongu ya na ruku nuna. ⁹ Ndangu, mba nyuds mbafa ngalangu jaminan weling lai Yason ndangu nda hawiangu nda, tau-tau nuda nda pahala wanja. ¹⁰ Angudedi-angudedi ma pawai na riangga papaliawa yai Paulus ndangui Silas, la rodung nuna mbu, la Berea, ndanga larehi nyuda takka la sinagoge tau Yahudi. ¹¹ Tau-tau Yahudi lai nahu rihi hamu etina weling nda tau-tau la Tesalonika kanudu ruda nda ngalanya na Pulung wangu mbinu kaparru, angu nda hamataya nda Mbuku Pulung tiapu lodu ndumang papinya na nggara-nggara nuna nama langataka padening. ¹² Rai ruku nuna, ndangu welingu lai nyuda nama parahaya, angubui kawini ndangu mini Yunani patembi na padiha nda hakuduna. ¹³ Njiayaika, larehi tau-tau Yahudi la Tesalonika mbada pinya na Pulung nai Allah mbu na mbuabarnya yi Paulus la Berea, nyuda mbu una mai la Berea ndumang pakuadanja ndangu pakanyauru ha nda tau madangu. ¹⁴ Hallaka, wangu hahangu, agudedi-angudedi ma pawai nda paliawayai Paulus laku takka la mbulu wara, jiayaika yi Silas angui Timotius padaingu todu lainahu. ¹⁵ Tau-tau nalihi nai Paulus na karianya takka la Atena, ndangu mba mbada ngalangu hau kareuku welingu lai Paulus nduma nai Silas angui Timotius ka damai lai nyuna rianggangu, Nyuda mbu nda laku. ¹⁶ Larehi yi Paulus nda patianja nyuda la Atena, na ngahuna na paddangu pamayillaya la dalu wikina kanadu nyuna na ittaya na paraingu nuna mbinu wangu katuada-katuada ndahamu. ¹⁷ Rsi ruku nuna, nda pani papida la sinagoge ndangu tau-tau Yahudi ndangu tau-tau welingu la pangia hau nama mangadat nyai Miri, angubui la pangia madangu, tiapu lodu, ndangu tau-tau nama nda hara wuku ninya lai nu. ¹⁸ Mapirra mapingu patandangu na welingu la pabundungu Epikuros ndangu Stoa mbu na pabanjaru-pabanjaru ndangu nyuna. Ndangu mapirra wadda,"Ngarraya na pambuhamu papani yi pembual nyiana?" nda hawiangu wadda,"hama njiangu, nyuna nyiana jiaya ha'attu mabuabar dewa-dewa panda tanda," kanadu nyuna na buabar ya Yehu ndangu na hadanguna. ¹⁹ Hallaka, nyuda nda wandaya ndangu nda karianya la Areopagus, hi na pani,"Njadi jiaka nyungga kupinya na pa'ajaru biddi nggara nyumu na pabuabar nyiana? ²⁰ Kanadu, nyumu mbu ngandi munya mapirra nggara na pahangattaru la kahillu ma nyuma. Nyuma mbuhang papinya nggaraya na lakungu na nggara-nggara nuna." ²¹ (larehi nuna, mbulu ndaba tau Atena ndangu tau-tau Pandatanda nama todu lai nahu mandamangu na panjappuya na rehi nyuda ndangu nda palaku nggara mbu lahambelina papaluahanya ndangu paronguya nama mbidi.) ²² Halla, Paulus na ndualak lapadua-padua Areopagus ndangu wanna,"Ho tau-tau Atena, nyungga ku hamata mba la mbulu ndaba nggara nyumu ailulu religius. ²³ Kanadu, larehi nyungga ku hallatu ndangu ku hamataya nda benda-benda na hamayamu, nyungga mbu ku hambur hau Altar angu patulihu yeana,"HANGGANG LAI ALLAH NA PANDA TANDA." Kanadu nuna, nggaraya na pasembahmu ndangu nda patandaya, nunaya na pabuabar nggu lai nyumu. Allah nama padikanya na pinutana ndangu mbulu ndaba nama ninya ndalu, kanadu Nyuna jiaya yi Miri na awangu ndangu na pinutana, ndana todu dalu la kuil-kuil napa pandoi wangu limma tau, ²⁵ Ndi'a mbu nda pakei wanya limma-limma tau, hamajiangu nyuna na paralu nggarangu kanadu Nyuna wiki nama wuangu hanggang lai nggamu mbu mba paluri wangu, ndangu kayeku ndangu mbulu ndaba na. ²⁶ Ndangu, na padikkanya, welingu la ha'attu tau, mbulu ndaba pangia tau matundunya ndumangu patodu la mbulu ndaba la pinutana yiana, mba mbada padainanya na musim-musim ndangu na huppu -huppu pangia nda nyuda, ²⁷ Ka nyuda kada himbu yi Allah, ndangu jiaka nggiki wanna nyuda njadi pajuanggaru-Ya ndangu pahunggu-Ya jappangkai Nyuna ndana marau welingu lai nyuta ndumang-ndumang. ²⁸ Kanadu, la dalu na Nyuna,nyuta luri, ngguada, ndangu ningu. Hama mbunai pujangga-pujanggamu wiki nama wanna, 'Kanadu nyuta mbu nyiana jiaya nuwa-Na.' ²⁹ Njadi, Kanadu nyuta jiata nuwa nai Allah, nyuta latti ndata patandangu mbaha na pangia Ilahi nuna hamabai amahu, ndia amahu mbara, ndia watu, hau ruppa na papadikkana welingu la keterampilan ndangu patandangu tau. ³⁰ Rai ruku nuna, mbana hallaka palamburnya na rehi-rehi maduba, tahu yi Allah na paninya mbulu ndaba tau la nggini-nggini kana manjaria, ³¹ Kanadu mbada parehinya la hau lodu larehi mbana hukutuya na pinutana dalu lama li paduangu welingu la Ha'attu tau na pambada paparehi-Na, mbana hallaka pawuangu malangataka hanggang la mbulu ndaba tau ndangu pahadanya na tau nuna, welingu la huanga tau meti." ³² Ndangu, larehi nyuda mbada rongu rukuna hadanguna lahuanga tau meti, tau mapira tau na pajukki, jiaya na hawiangu wanna,"Nyuma mbuhangu parongukau ruku na nggara nyiana." ³³ Hi, Paulus na laku welingu lahuanga-huanga nda nyuda. ³⁴ Jiayaika, tau mapirra na pabundung angu nuna, ndangu njadi parahaya, lahuanga nda nyuda mbu ninyai Dionisius,anguda yi Areopagus, ndangu ha'attu kawini matamungu Damaris, angubui tau hawiangu mapirra nama angunja nyuda.