¹ Hallaka nuna, Paulus na palaiwaru nyai Atena ndangu laku la Korintus. ² Ndangu, Paulus na ngalanya na tau Yahudi natamuna Akwila, nuwanai Pontus, mbidi takkana weling la Italia angu na papahana, Priskila, kanadu yi Klaudius mbada paliawa mbulu ndaba tau Yahudi papalai warunya na Roma. Paulus namai lai nyuda, ³ Ndangu kanadu nyuda ningu paramma nama pahama, Paulus todu ndangu nyuda ndangu ramma kanadu nda paramma nda nyuda njiaya mapandoi kawarungu. ⁴ Ndangu, Paulus nda patandang pahilung la sinagoge tiapu lodu Minggu ndangu parukungu ndumangu paparahaya tau-tau Yahudi ndangu Yunani. ⁵ Njiayaika, rehi Silas ndangui Timotius purru weling la Makedonia, Paulus pakiring papalakuya na wiki ailulu ndumang pabuabuar ya na pullung, angu na hakahinya wangu weling etingu hanggang la tau- tau Yahudi mba yi Yehu jiaya yi Karitu. ⁶ Njiayaika, larehi nyuda mbada rakkapuya ndangu mbada tuala nyai Paulus, na kambahuya na katarri na ndangu wanna hanggang lai nyuda, "Wairia mu ninya lapinu katiku wikimu! Nyungga kahillak. Pakiring nahu lundu pangalangu, nyungga ndaingu laku hanggang la paraingu-paraingu hawiangu." ⁷ Hallaka, na mattanya na pangia nuna ndangu na laku la umma ha'attu tau nama tamungu Titius Yustus, ha'attu nda Yahudi nama marubuk lai Allah, na umma na ninya lahalinggi sinagoge. ⁸ Krispus, tau matua sinagoge, na njadi parahaya lai Miri ndangu mbulu ndaba tau nama todu la umma na, angu ndangu tau Korintus nama mbada rongu yai Paulus njadi parahaya ndangu nda babtis. ⁹ Hallaka, Miri na kareuku hanggang lai Paulus la hau ruddung la peku itta, "Ambu mangadat, jiaya kareuku pangalang ndangu angu ambu kandiyi, ¹⁰ Kanadu nyungga angumu ndangu nda ha'attu mbu mapawahi nggau nduma pamayillakau kanadu ningu ndangu kabunggur-Nggu la paraingu nyiana." ¹¹ Hi, Paulus todu lai nahu lundu 1 ndaungu 6 mbua wulang, hinna ajaru pulung nai Allah lahuanga nda nyuda. Paulus nda Pahangganya la hangga nai Galio ¹² Njiaya, rehi yi Galio mbana njadi prokonsul Akhaya, tau-tau Yahudi wangu kahaungu eti hadang palawanyai Paulus ndangu na ngandiya lahangga kajakka lipaduangu, ¹³ Angu wanna, "Tau yiana palakunanya na pangaruya mbinu tau ndumang pa marubuk lai Allah nama palawang ndangu Hukup Taurat." ¹⁴ Njiayaika, larehi yi Paulus tikka pabunggahu ngaruna, Galio wanna hanggang la tau-tau Yahudi nuna, "Jiaka yiana jiaya na pawahing nama palapahu ndia mandahamu nama hanggari, ho tau- tau Yahudi, nyungga ndaingi wai hangganya rukkuna pa kareukungmu. ¹⁵ Jiaya, jiaka yiana jiaya napawahing rukkuna hillu-hillu, ndangu tamu- tamu, ndangu ndangu hukungu nyumu wiki, Aturu wiki. Nyungga ndaku mbuhang panjadi hakahi nduma na na nggara-nggara nuna." ¹⁶ Hallaka, Galio na nyaraha nyuda weling la pangia lipaduangu. ¹⁷ Hallaka nuna, nyuda mbulu ndaba nda yappa yai Sostenes, tau matua sinagoge, ndangu nda paluya lahangga pangia lipaduangu. Njiayaika, Galio ndana hamataya na nggara-nggara nuna. Paulus Kabeli Laparaingu Antiokhia ¹⁸ Hallaka nuna, Paulus pirra mbua lodu kika, hinna paramihi ndangu angudedi-angudedi mapawsi ndangu nda pala la Siria, kariungui Priskila ndangu Akwila. La Kengkrea, Paulus mbada pabotak nanya na lunggina kanadu mbada pandoi na hau Nasar. ¹⁹ Hallaka, nyida takka la Efesus angui Paulus nda palaiwaru nyai Priskila angui Akwila lai nahu, jiaya nyuna wiki tama la sinagoge ndangu pahilungu patandangu angu tau-tau Yahudi. ²⁰ Larehi nyuda mbada karaiyai Paulus ndumang patodu rihi mandai, Paulus ndana akuya, ²¹ Jiayaika paramihi ndangu nyuda ndangu wanna, "Nyungga ndaingu hilli mai nggupa lai nyumu jiaka yi Allah na panamungu." Ndangu na pala weling la Efesus. ²² Mbana na purruka la Kaisarea, hi nahei ndangu na wuangu tabbi hanggang la makabunggur, halla purru la Antiokhia. ²³ Ndangu, hallaka mba halla pirra mbua rehi lai nahu, na mattanya na pangia nuna ndangu na weliwinggirnya hau pangia la pangia hawiangu la wilayah Galatia ndangu Frigia, angu pakapanduk ha mbulu ndaba muritu. Apolos la Paraingu Efesus ndangu Paraingu Korintus ²⁴ Napa larehi, ningu tau Yahudi matamungu Apolos, nuwanai Aleksandria, mai la Efesus. jiaya ha'attu nama pa'ajaru ndangu mahir la nggara Mbuku Pullung Tanji. ²⁵ Tau nyiana mbada pa'ajaruya rukuna Andanai Miri ndangu maranna la roh. Na kareuku ndangu pa'ajaru ndangu hamungu nggara-nggara rukunai Yehu, jiayai napapina hanya pa'ihunai Yohanes. ²⁶ Na kareuku ndangu turumbeni la sinagoge, jiaya larehi Priskila ndangui Akwila na ronguya, nyuda nda ruruhuya la halinggi ndangu nda paninya na anda nai Allah nama rihi padening. ²⁷ Ndangu, larehi yi Apolos napala la Akhaya, angudedi-angudedi mapawai na pamandunya ndangu natulihu hanggang la murid-murid kada hambur ya namai na. Larehi mbana takka, na ndangu panamuha nyuda rairuku napawuana hi nanjadi parahaya, ²⁸ Kanadu ndangu haddirungu nalawanja tau-tau Yahudi lahangga madangu, angu pa'ittaya weling la Mbuku Pullung Tanji mbai Karittu jiayai Yehu.