¹ La rehi nuna, yi maramba Herodes na ndendiya na limmana la pinu tau ma pira welingu la kabungguru ndumang pamayilla ha nyuda. ² Nyuna na pameti yai Yakombuhu, angudedi nai Yuhani, wangu madaka. ³ La rehi yi Herodes na itaya mba napa pandoina nuna napa hananya na eti tau-tau Yahundi, nyuna pangalanya dangu na yappa yai Petruhu. Ruku nuna na tungu li lundu Lodu Mbakul Kanguta Nama Kaba. ⁴ Mba mbada yappa yai Petruhu, na patamanya la hukungu dangu na wuaya la hangga tau ma patu papaliawa ndumangu pahamataya, dangui mbu napa mbuhana, mba mbada la lodu heina, na ngandi ya la hangga tau dangu. ⁵ Hi, Petruhu na patuya la hukung, jiayaka na hamayang nduma nai Petruhu papangala-pangalanya pa wotunya hangganya lai Ala na kabungguru. Maranongu Nai Miri Na Pullinyai Petruhu Weling La Hukungu ⁶ Taka ka la rudungu la rehi yi Herodes daingu ngandiyai Petruhu la hambeli, yi Petruhu katuda la huanga tau mandua papaliawa, na hondu wanya dambu nggili mbahi, dangu dama dai la hangga pindu da hamataya na hukung. ⁷ Dangu, tarru, ha atu maranongu nai Miri na ndualak la tutu nai Petruhu dangu na hambila panjaraku la hukungu nuna, halaka maranongu nuda na tabbaya na ri karaha nai Petruhu dangu na pahadanya, dangu wana, "Hadang parianggang!" Dangu, nggili mbahi-nggili mbahi nuda kanabu tambukal welingu la dambu limmana. ⁸ Halaka, maranongu nuda wana lai nyuna, "Honduya na mbanggimu dangu pakiha da halapamu." Dangu, hi na palakuya mba halaka tunanu, hi wana lai nyuna, "Paki yauwa na kalembimu dangu tundungga nyungga!" ⁹ Halaka, yi Petruhu na luhu dangu na tundunya na maranongu nuna. Nyuna dena pi anya mba nggaraya nama tungu li la maranongu nuna palangatakangu, jiayaika na patandanya ba nyuna na itaya napa itana. ¹⁰ La rehi nyuna mbana lapahunya nama ndai lama ngiluna dangu lapa padambu wana, nyuna na taka la pindu mbahi mbakul nama hanggang la paraingu. Pindu mbakul nuna tabunggahu wangu wikina ndumana nyuna, hi nyuda luhu dangu pangga takka la halinggi, dangu na maranongu nuna jia palai waru mbananyai Petruhu. ¹¹ Laheri nai Petrus mbana pinyaka ndangu nggara ya nama tungu li na la wikina, nyuna na pani, ''Nahu, nyungga langa ta-taka pinya mba yi Miri na paliawaya na maranongu na ndangu na pahalangga nyungga welingu la limma nai Herodes ndangu welingu mbulu halla nda na rukku na pamonungu ndumangu tau-tau Yahudi." ¹² Hallaka yi Petrus mbana pinyaka nyuna na laku la umma nai Maria, na inna nai Yohanes na papa au mbu yi Markus, langgi ndangu tau nama pabundung pahamangu ndangu nda hambayangu. ¹³ Hallaka yi Petrus na katokungu pindu mbahi mbakulu, ha attu papaliawa kawini nama tamungu Rode namai la pa mbunggahuya. ¹⁴ Hallaka nyuna na tanda ya na lingu pani nai Petrus, kanadu nyuna na hannang ailulu nyuna ndana mbunggahuya na pindu, njiayaika na palai la kurru ndangu na paniya mba jiayai Petrus na ndingiru la pindu mbahi mbakulu. ¹⁵ Nyuda nda pani lai Rode, "Nyumu katuaba!" njiayaika, Rode na pani pangalangu mba jiaya nama tungu nuwu, ndangu nyuda ndaingu nda pani, "Nuna njiamayaka Maranongu na." ¹⁶ Jiayaika, Petrus na katokungu mannu, ndangu larehi nyuda mbada mbunggahu pindu, hi nda ngita yai Petrus, nyuda nda katatku. ¹⁷ Njiaya, mba hallaka yi Petrus na wuangu pahamangu wangu limmana lupangu nyuda nda kahanangu, nyuna na paluahanja lai nyuda nggiki wanna yi Miri mbada karianya luhu welingu la hukungu. Ndangu, nyuna wanna, "Patakanya na rukku naina lai Yakobus ndangu nda kapala angudedi-angudedi ma parahaya mapawai." Hallaka, nyuna na hadangu ndangu na laku la pangia hawiangu. ¹⁸ Larehi tidungu na lodu, na njadika na pabiara wangu nama nda kudu la huangu tau papaliawa rukku nggara nama tungu li na hanggang lai Petrus. Na Metina Yi Herodes ¹⁹ Larehi nai Herodes mbana himbu yai Petrus ndangu ndana hungguya, nyuda na parehaya ndama ndai ndangu na wuangu pani ka lupa nyuda nda pametiha. Hallaka, Herodes na purru welingu la Yudea hanggang la Kaisarea ndangu nda todu lai nu. ²⁰ Larehi na nuna, Herodes na mbeni ailulu hanggang la tau-tau Tirus ndangu Sidon, hallaka nda pahamang, nyuda nda mai la hangga nai yi Herodes, ndangu mbada halla pakahiliya yi Blastus, nama uruhuya na kuru umma maramba, nyuda nda karai nduma ka pandami kanadu la pangia nda nyuda nda ngalangu papaliawa pangangu welingu la pangia nai Herodes. ²¹ La lodu pambada pindi nda, Herodes na paki kalembi pahanganji, na mandapu la kanjakka lipaduangu, ndangu na patakkangu hillu hanggang lai nyuda. ²² Na tau na warangu mannu,"Nyiana njiamayaka na lingu nai Allah, nda tau!" ²³ Larehi nuna mbu, ha'attu na maranongu nai Miri na tabbaya kanadu nyuna ndana wuangu'a pajangga hanggang lai Allah ndangu nyuna na nganya ngeli-ngeli, hi na meti. ²⁴ Njiayaika, na pullung nai Miri na rihi tambang ndangu na ngalangu panduangu. ²⁵ Hallaka, Barnabas ndangui Saulus na kambeli welingu la Yerusalem mba mba hallaka nyuda papalokuya na paramma nda nyuda, angu nda wandaya mbu yi Yohanes, na pawadda mbu yi Markus.