¹ Ta nuku Taurat tidi mawuananya agananya nama kalung nama aming manga da jiamaya napa badawaingu. Jaka tou ngu ngala dama nuatu hameara dapa manuatu waipangalada hangi doungu hangi doungu, na nuku dana tomamangu ana pinnu ya tou na duda dama mai ada dekiha da taguda. ² Kadang ana jaji kaka nama toungu da hilu eimanguha ma idih manuatung kadang hadekapaja apa biaha ha, ngala na tou nama pahalakuya na pata kahoru-karada, dada padengamanyaka da doku-jala?. ³ Jidinguka, tadalu manuatung mu dapa namudaja da doku-jala da hangi doungu-hangi doungu. ⁴ Kadang, da wei ra hapi bibit jaka kamemi bubung dajiamaya nama pohi poddahuha da doku-jala. ⁵ jiakadiya hi Kristus ana purung ta pinnu tana, winna " Da manuatung jaka da marak da mu kabu atimaja, jidika na ihimu woaganya tutu tagugu". ⁶ Ou damu buhamang manuatung patunu jaka manuatung pa pohi waingu doku-jala. ⁷ Hi wigugu, " Ya nyouwa jiawaka : einyaka napatulih natoragu ta hurat bakul napa luning, nyowa amiga aku pahalakuya agananya napa kabu atimu Ou Allah ". ⁸ Hi Kristus na tikkiya, " Na ngawu jaka namanuatung napa tunu jaka manuatung papoddah waingu da doku-jala damu kabu atimaja, manga dana matutumangu lahi Ou, " ( napa manuatu waingu keriya na nuku Taurat) ⁹ Nadinguka natabaya, " ya jiawaka amigaka ku pahalakuya na pakabu atimu " yayi hi Yesus na poddahuya nama kawunga kana piaku pamadunya na kadubana ¹⁰ Witi pawukunanya, jiata napa higiluda ana manutu wainya na ihina hi Kristus hadekapana lappaku piangu-piangu. ¹¹ Ngala da ratu da pahalakuya na pakerada hangi wehang - hangi wehang ada idiha da manuatung dama hameara, dama piaku a pohi poddah waingu doku-jala. ¹² Jidinguka hi Kristus ana koling pa idiha damanuatung witi doku-jala nama hadekang lappaka piangu-piangu, na ngudonya na padoungu ta lawanana hi Allah. ¹³ Jaka nadinaja ngala dageana ana leti wainya wihina. ¹⁴ Waingu ha tou pana nama mati, hi Kristus napinuyaka da tou napa langa papahigiluna lappaka piangu-piangu. ¹⁵ Nahanghu harri napatekadanya na witina nou jaka ana manga patikiya. ¹⁶ "Ya jiaya na li jaji napatiki gu ja ngala na tou napa langa pedigu taladu nama langa loppah, winna hi Moiri : ' Ku hamadu giminya na nukugu ta atimi, jaka kutulih giminya tadalu pangadangumi'". ¹⁷ Lappaka, hina palodunya, " da kuhilu namu amayaha dadoku-jalada jaka nyouwa kudengajaka ngala dadoku-jalada jaka daku hilu namumaha dapa woluda dama kalung. 18. Nou atouna ya einya nama pohingu ngala dukana einyaka, jaka da hilu waiamang manuatung a pohi poddah waingu doku-jala. ¹⁹ Nou atouna, aku oali bei gimi, dukada nutu hita tarabani ata tomaya napa doungu ma biaha, witina wei ra na hi Yesus. ²⁰ Einya na lara ngi nama buangu jaka nama morik, napa langa wehana nama Rabba Yesus tutu tagu da jiata waingu kaba papadira, jiaya na ihi taguna. ²¹ Manga einyaka napapa li ratu bakuluda nama bei nya na umma na hi Allah. ²² Nou atouna maidaya katakahorukarada lahi Allah namaha wali ati tadalu maninguda wainya na atida nama langa murah walingu dapa ngadanguda nama jurrak, jaka na ihi napabaha pawarah waingu wei nama hingar. ²³ Maida ya ka hamanu duakabapanya aganananya napa langa peakanada na lara maninguda kadang jiaya hi Allah nama pajaji nama manudu. ²⁴ Maida ya kata meara pateting wikida tadalu ata panamu wikida jaka ata woluya na pakerang nama kalung. ²⁵ Abi maroungu wikidida walingu taka buanguda ata kahorukarada ngala dukada, toungu napa langa wolu tadalu toma dirada. Jidika maiya ya kata meara pakulih wikida pareihi-reihingu ta penyaka na rahi aminya hi Moiri dagitnanyaka. ²⁶ Kadang, ahangaja kaka ata woluya nama doku - nama jala ata kolling ha penyaka nama padeneng, jaka da hilu eimanguha pamanuatu waingu a pohi poddahuha da doku-jala. ²⁷ Nama eingu jiapayaka na nading nama pamangeatuda ana hakkida jaka na erik api nama pomohiha dama geanya nama Rabba Allah. ²⁸ Toungu napa langa peda tadalu toma dua lappaka toma tilumarangu, gearahinguya dama keriya na nuku hi Musa jiaya hi hukkunya lappaka ana mati da eimang ma millanya ati. ²⁹ Atou nou nakana da keri ukumaya na buatuna na hukung napa padeitudanya na tou nama leti wainya na ana Allah, jaka nama magira wainya na wei ra li jaji nama pahigiluya, jaka nama ngiki wainya naha hangahu harri nama waling lahi Allah?. ³⁰ Jidika, ta peanya a duna nama panewi "a taungu geana patagugunya nyouwa jiawa nama taunya tangana " manga winna jella " Hi Moiri jiaya nama hukunya na tou rara ". ³¹ Dana moadamangu ama nau kaka talimana hi Allah nama morik karawaya naha wukumu jaka na tengimu. ³² Jidika kamu namuya na ladu malanga loppah amu menga pakolinya nama wahang, kamu kulih amu pajukan amu deitu tidunya nama willa nama buat. ³³ Anangu jimi ngiki waigimi jaka geagimi tahaga tou dangu, jaka anang nyimi eigimi tadalu mawila napa mawila waingu nama tou ngu. ³⁴ Jiami mi millanya ati na tou nama ta gallu ya lappaka mekaya waingu egi atimi a eikanguka maparima gimi ja da ngawumi, kadang ami peanya einya ha na ngawu nama reihi kalung jaka dama dukang. ³⁵ Nou atou na, abi mi pahelakaya nama ningumi, kadang nama ningumi jiaya himi kolinya na kanyuru nama bakul. ³⁶ Kadang nyiami wali atimi ami marena ami pahalakuya na bakabu atina nama Rabba Allah jiaya himi kolinya agananya napa langa papeakana. ³⁷ Kadang " dana hilu madeimaha, duna nama aming ana duki jaka dana hilu padikimaya. ³⁸ Jidinguka, da huhu anagu nama padening da morik wainya namaninguda. Jaka, ana hilu bali kaka taka dengana ana mangeat, ya nyouwa daku hilu peamanya". ³⁹ Jiata da jiamada nama buhanya nama pamuhu dengang, jidinguka ta wainya namaninguda ta karawa ya na ihida.