¹ Na maning pingi nanya dukkana agananya napa mannida jaka tadananya agananya dadi pa ittada ² Kadang, witi manninguda hou da boku-appuda hi pamalanguha. ³ Witi einya namaning, hi ta penya ya na pinnu tana papa jaji nanya waingu winina hi Allah. Toma ganananya napa ittada dama walingu maya agananya napa ittada ⁴ Witi manninguna, hi Habel na idiha dama nuatungu lahi Allah damanuatung dama reihi kalung walingu na manuatunguna hi Kain. Witina nama nuatunguna hi Habel mapadeninguya hina kollinya nama kalung waling lahi Allah na woanya patikki ana kananya nama nuatunguna, a tadalu mati aya, hi Habel napanewiha. ⁵ Witi manninguna, hi Henokh na deddikkunya ka abi nali ya namati jaka da ittamaya kadang hi Moiri ana deddikunyakka, jaka a dadi nadeddikkunya einya napa langa paittana napa kabu atina hi Allah. ⁶ Dana egi ati dengamanya hi Allah dama eingu manninguna, kadang langka gearaya nama eingu takarahana hi Allah na wainyaka hi allah a einya, jaka hi Allah na woanya kanyuru a gearaya nama manyeranya. ⁷ Witi manning ana panamunya hi Allah witina nama jaji dadi pa itta, hi Nuh nou ya ta dadar ati jaka ana wainya hina woluya na tena bakul ana pamanumara da huhu-anana. Ya namanninguda hi Nuh na hukunya napinu tana hinakaya nama kalungu keriya na manninguna. ⁸ Witi manning, hi Abraham ana kamaikanya hi Moiri napa keri jaka namanudu ana halaku ta padoungu napa patekkananya. Jaka, hina halaku langka dana peanya a bayaka pingi pahalakuna. ⁹ Witi manning, naha laku jaka na engang ta pandoungu napa langa pekananya maga ma einya ta tana tou nou ya ana dounya na umma oli dahi Ishak jaka hi Yakub, nama kolli jelangu pataguna ta tana nou. ¹⁰ Kadang hi Abraham nadinanya napa raingu nama bakul nama maddung, napawolu jaka na papakidi na hi Allah ¹¹ Witi manning, hi Sara na woanya kulih ana pakabu jaka ana pa anangu lakeda waikang ama winni wotuya manga na kaweda jellaka ana paana waingu, kadang hi Sara namanninya ajiaya nama taunya rahi nama maddung. ¹² Nou jiaya ka waling hatou nama lukku tikki hamati, naboaruha da huhu -anana na dangu da toungu kapea ta awang lapakka da peamang pa yapuja toungu korrahu ta wiwi tahik. ¹³ Ngala dukada da mati ka tadalu manninguda lappaka dada kollimangu agananya napa langa pekada ja, jidinguka duda dapa teting ana wolahuja limma na rahi ma marou, lappaka da peangu wikkida touna duda tou ta habaliha dama mai ta pinnu tana ya. ¹⁴ Patikki togudanya duda ada peakaya nama tutung ada menyeranya na tana pingi pangoduda. ¹⁵ A jiakayaka na papangadada na tana napa langa jujakuda, bakalangu einguha kaloaga ada bali. ¹⁶ Jidinguka, buhang houdanya tana mareihi kalung, jiaya na tana surgawi. Jiakadiya hi Allah dana makidengamaja duda ada tikkiya a Allah danya kadang einyaka na paraingu bakul tutu taguda. ¹⁷ Witi manning, tadalu hi Moiri ana kamanya, hi Abraham na woaya hi Ishak ana manuatu wainya na kaya na li jaji maha wali atiya ana manuatu wainya na ana kanihana. ¹⁸ Witi anana hi Allah winnanya " witina nangarana hi Ishak da wallamu hi tikki ha ¹⁹ Hi Abraham na waitekkanya nama Rabba Allah lappaka na wainya nama Rabba Allah ana pakidi tou mati. Nahamera noungu, hi Abraham nakoli balinya hi Ishak walingu ta mati. ²⁰ Witi manning, hi Ishak napa maringu - mapalala ha tamorikuda nama aming hi Yakub jaka hi Esau ²¹ Witi manning, hi Yakub ta rahi daggit matina napa maringu - pamalalaha ngala da ana na hi Yusuf. Ana kahoru-karada lahi Allah ana harainoungu ta katikku takkungu ²² Witi manning, hi Yusuf ta daggit matina napeakaja na lara louhunguda da tou Israel waling ta Mesir jaka napa namu ja patikki torada da riina. ²³ Witi manning, hi Musa ana jajika, kabuninya lappaka tilu wulang da amana da innana. Kadang ada ittaya hi Musa lakeda manadanguya, toma dada hilu mangeatmanya na li pareahana na raja. ²⁴ Witi manning, hi Musa ana matuaka abua moni yaka, dana kamaya a' anananya nama winni Firaun. ²⁵ Reihi buhhananya a' liya naha duka haregga huhu anana hi Allah walingu nama deha hangi ladu awolu doku-jala. ²⁶ Ta pangadanguna duna witina ada padda ya hi Kristus reihi eingu hina waling ngala dukada nahapoti da na tou Mesir kadang hi Musa reihi pateti nou nanya na kanyuru nama aming. ²⁷ Witi manning, hi Musa na jujjakkunya na tana Mesir dana hilu mangeatmanguka na banina na Raja Firaun natarrunya mearanguna ana ittaya duna napa dadi pa itta. ²⁸ Witi manning, hi Musa na pahalakuya na tunu ta tana na jaka na peirahuja wei ra witina dapa palewa tou mati abi nali ha da tou Israel. ²⁹ Witi mannig, na tou Israel dapalanya na tahik rara, mearanguna ada halaku ta tana mara. Jidinguka ami jellaja da tou Mesir ada kamang ha pala ta biludanyaka ta tahik. Witi maning, na kangali paraingu Yerikho na taburi ada wolitunya tadalu pitu ladu. ³¹ Witi manning, hi Rahab nama winni majurrak daha matimaya oali ja da tou dama katadak witina ana kamaikaja dama li pa kahinung dama waling ta Israel. ³² Jaka hilu gana ikanyaka napa tikkigu? dana damangu na kaloagaku aku loluk bollugimija na torana hi Gideon, Barak, Simson, Yefta, Daud, Samuel, lappaka da ratu - ratu. ³³ Nama witi manning ada talu ha da kabihu- kabihu, da woluya nama kalung da koling rahi - rahi, jaka ada toniha da a' a' singa, ³⁴ Mapaddaya na erik api dapa heili waling ta tama bihi, na woaja kulih ada loajakaka, daka hedi gaga ada patau kaka, jaka daka leliha da gea da. ³⁵ Ngala da mangoma da kamaika bali ja da tou da nama langa mati apa kiddi bali ha jidinguka ieja lajja dapa tau jaka dama buhanya nama louhu kapiku kolinya na kiddi bali tadalu morik nama reihi kalung. ³⁶ Tadalu yayi eija lajja dapa yeki jaka dapa tau palu lappaka dapa pingu jaka patamaja ta gallu. ³⁷ Da kabeanaha watu da tipik kadubanya, jaka daha mati wainya katopu. Jaka dama halaku mai - mai jaka papa kenada koapi waling kalitu baebu anang kamemi da milla hingu ka aka tuku ja, jaka da hilu beti amaja. ³⁸ Ya na pinnu tana dana makenamangu ada dou nya, da halaku luruh ta mareda jaka na hiha da letina, da engang ha bali letina, jaka ta liangu ta kabu tana. ³⁹ Atou ana ada kolinya agananya nama kalung witi maninguda, jidika dada kolimanya agananya napa langa panou da ja. ⁴⁰ Kadang hi Allah badi pagenanyaka agananya nama reihi kalung tutu taguda, kadang ada jiata kaka dada kolimanya nama murah.