¹ Tadalu li jaji nama deingjellakaya na ihina patakabuang tapadoungu nama biaha tapinnu tana. Kadang einya na korung napa pajinyak : Tahabali hiddu, eija daha bijjal, na api wei, na meja jaka na kababa pamanuatu waingu, na padoungu ya padoungu biahaya. ³ Tahabali kaba kadubana eijelanya na korung padoungu biaha madiya. ⁴ Ta padoungu nou einya na beirapu (Mezbah) napawolu walingu ta omah rara jaka na pati patura-pajaji ngala na wiwina napatapalungu omah rara, ta pati nou, einya naka dunga omah rara pa dou bijjal kababa manna, na takunguna hi Harun nama eingu loluna, jaka dubada da watu patulih turajaji. ⁵ Ta pinnuna, einya nama pahadang mawurung mangu kapana (kerub) nama paeinanya na patti jidinguka ya atouna dadi rahi manauya ata tikki bolluha ⁶ A kolling apajinyak bolluyaka napa doungu da ratu tamadanyaka ta korung nama ta hagaya ada pahalakuya na deitu tidunguda. ⁷ Jidinguka, jiapaha da ratu bakul dapapahellang ada tama ta korung kadubbana tadalu hadoungu hadekapangu, pawaingu wei ra ya napa manuatu waingu lahi Allah tutu taguna na ihi wikina jaka na tutuna dadoku-jalana na tou dangu witina nahala dapa peawaida ata woluya. ⁸ Nahangahu harrina peakadanya jiata na larangi nama arung ta korung nama biaha dana tawehamaha kadang a einyaha na korung na makawunga. ⁹ Ya lipangerang ladu nutuya tou jellada ngara dukada dapa woada ata idiha da manuatung dapa manuatu waingu dama hawali ati waling tadalu ati da da tou dangu dama habayang. ¹⁰ Kadang jiakadiya natutu pa angu pa inung jaka na mattu-mattu natutu morik napa murah waina na ihida napa waingu lappaku a tomaya napa buang. ¹¹ Jidinguka, a aminyaka hi Kristus napa pali ratu bakul tutu taguna nama kallung nama aming, na tamanya na korung nama reihi biaha nama reihi bakul jaka nama reihi padening dapa wolu waingu lima tou rara manga dapa wolumaya. ¹² Na tama ta padoung ma biha hadeka waina lappaka piangu-piangu, da jiamaya ana idi wei ra kamemi bubung jaka wei ra ana hapi, jidika na idiya na wei ra taguna hina kollinya na morik malodung. ¹³ Kadang, a jiayakayaka a perah waingu wei ra kamemi bubung, jaka hapi moani, jaka na awu ana hapi bei ta tou nama manyarik hi baha pawarah waingu pata tou rara. ¹⁴ Pareihi-reihing na wei ra na hi Kristus, da jiaya waingu hangahu harri ana manuatu wainya na ihi taguna lahi Allah jaka nama baha pawarahdanya na atida walingu takanougu dama kallungu katapiaku ata kahoru-karada lahi Allah nama morik. ¹⁵ Jiaya napa pali ledi walingu ta li jaji mabuang toma duda napa patapedi-lihunyonga da kollinya na morik malodung napa langa jajinya, kadang naliyaka na mati ana palohuwaida walingu ta doku-jala dapa woluda anoudaha ta li jaji makawunga. ¹⁶ A iekanguka hurat hamuang patulih, jaka ienguha ma mati walingu na tou nama woluya. ¹⁷ Kadang na hurat hamuangu hi wainya ta li matina nama woluya, na hurat nou daeimang hawaidanya na tou nama woluya ana morikuha. ¹⁸ Jiakadiya, na li jaji kawunga da waimanya a dapa madduwaikanyaka wei ra. ¹⁹ Kadang tadalu ana peakaya hi Musa dukana na li pareha nuku taurat ta tou Israel, na dekiya na ra ana hapi jaka kamemi napa kehanya ta wei jaka na kaba wulu rara jaka ha pangu ai ana peirahunya ta hurat nuku taurat jaka duka nama dangu. ²⁰ Hi winna ja " Ya jiaya na wei ra li jaji napa pamaddu na hi Allah kami pa'akanya ²¹ Na pata nama hameara, hi Musa naperrahhunya na umma biaha jaka ngala dukada dama naingu dapa waingu tadalu kabuang awaingu ra. ²² Napatikkina na nuku Taurat tikki papeirah bolluja da ngawu abaha pawarahuha waingu wei ra, adana bongu kaka na wei ra, dana mapohi poddah mangu da doku-jala ²³ Tounaka, ngala dukka kana namawuna nama einya ta surga tou jelladanya ata pamurahuya, jidinguka ngala dukada nama eingu ta surga pawaingu manuatu mareihi kalunguya. ²⁴ Kadang, hi Kristus dana toma noumangu ta padoungu ma biaha pawolu tou rara, napa tidi keri walingu tama langa eingu, jidika iaya nama toma ta surga ta hagana hi Allah witida. ²⁵ Hi Kristus dana padua balimangu ana idiha da manuatuna, toungu na ratu bakul ada tama ta padoungu ma biaha hangi doungu hangi doungu ada idi wei ra tagu madanya. ²⁶ Atou nou kanaka, hi Kristus napa dua balinguha ana liyanama willa walingu aku wunga jajina na pinnu tana. Nou atouna hi Kristus ana patekang wikina hadeka pana lappaka piangu-piangu hodu hupu duka tana tutu taguna ana pohi-podahuha da doku-jala nawaingu pata ana manuatu wainya na ihi wikina. ²⁷ Mearanguna na tou rara langa penyaka na mati hadekapang jaka haga danyaka ahakida. ²⁸ Tou jellana hi Kristus hadekapana ana woya na ihina aha rikaya hinna mati, ana tagu deituha da doku-jala da jiata madangu jaka hilu aminya napapa duangu wainya dahilu tagu deitumanaja da doku-jala, jidinguka idinanyaka na manumara tutu taguna nama nadinya.