Wanno Salomo a Pakeddewe ¹ Napakeddewe Salomo Bait MORI monno istanana duwa kabullu douna. ² Bage Salomo napakedde baliwi ngara wanno payana Huram barana monno nadengngiwi ngara ata Israeal kadangngi ne ngara wanno. ³ Bage Salomo na kako Hamat-Zoba monno na dedewi. ⁴ Na pakedde wanno Tadmor ne padang gurun monno napakeddewi ngara wanno ne wanno Hamat pandou ngara barang pabondala. ⁵ Na pakedde bali kaiwi ngara wanno Bet-Horon ponnuna monno Bet-Horon kabuna kawanno pawessiwe monno rindina, gerbang monno palang a pawessi, ⁶ hinna kaina wanno Baalat monno ngara wanno douna pandou perbekalan. Napakeddewe wanno pandou kereta perang monno ngara wanno pandou dangngi wa'ida pasukan a waina dara. Salomo napa kedde kuwa appaku pakambu atena ne Yerusalem, Lebanon, monno ne ngara kuwa wanno ne kerajaanna. ⁷ Luwana ata eka a dangngi ne wanno da ata Israel. Hidda ata Het, Amori, Feris, Hewi, monno Yebus, ⁸ pawali wa'ida a enga ponna ne wanno monno dappa pamateda ata Israel, hidda bana papabudakna Salomo dukkine loddo. ⁹ Tetakka, ngara ata Israel da'iki papabudakna Salomo. Wa'i a prjurit, kepala pasukan, ata pareta regu, panglima pasukan kereta, monno pasukan a waina dara. ¹⁰ Ngara kuwa pejabat Tokko Salomo a ata pareta duwa ngau limma kabullu ata. ¹¹ Salomo nangindiwa ana minnena Firaun wali wannona Daud, ne umma papakedenai. Hinnawi, ""Ole ummagu, dana tubake budangngiwu ne istana Daud, orona ngara kuwa pandou a pernahba ba ta'i wai Tabut Aurana MORI na suciwe." ¹² Bage Salomo napamarakana kurban patunnu barana MORI ne maezbah papakeddena ne arona serambi Baitna MORI. ¹³ Naya maraka Salomo iya loddo-iya loddo dekuge patekkina Musa monno kurban papamarakana loddo Sabat, ne perayaan Wulla Baru, monno patoudana iya douna. Haida a touda perayaan nyawi Hari Raya Kababa Damangu Ragi, Hari Raya Pittu Loddo Poddu, monno Hari Raya Umma Ro'o. ¹⁴ Salomo na dekuge patekkina Daud, amana. Na pede kelompok imam a tugasage pelayanan. Na pede dommowi ngara ata Lewi a tugasage badeikawa ALLAH monno a rawige ibadah arona ngara imam, iya loddo-iya loddo a rawige ne Ummana MORI. Na pede dommo ata a jaga gerbang dekuge kelompokna ka tugasage jaga gerbang dekuge patekkina Daud, atana ALLAH. ¹⁵ Ngara ata Israel a dekuge petunjuk Salomo tubana ngara imam monno ngara ata Lewi. Da ubahke langngu appaku patekidai, hinna kaina ngara barang a mangngu wellina. ¹⁶ Nyaka, Salomo nabawe ngara papawilina Salomo tubana Bait MORI. Ne papawili a mulai ba ta'i fondasi monno da ngauki dukki babawe bapakedde Bait MORI. ¹⁷ Bage Tokko Salomo nakako Ezion-Geber monno netti Elot a wa'ina ne uppu bonnu, ne wanno Edom. ¹⁸ Huram napangindiwi kapal barana Salomo. Atana Huram a ngindi kapal a ahli pelayaran. A palolo dengadi atana Salomo netti ofir monno a bali ngindiwi kabullu limmarata limma ngau dua limma kilogram omma rara barana Tokko Salomo.