Ratu Syeba Nakunjungwa Salomo ¹ Ratu Syeba na rengnge tubana Salomo. Ammiwi ne Yerusalem bana ujia Salomo waige ngara patuwanai a sulit. Ratu Syeba ammiwi waina rombongan kalada monno unta a ngindi rempah, omma rara, monno togo permata. Ammiwi barana Salomo monno na tekki kuwawe a wa'ina ne papangeddadanana. ² Salomo nawale kuwawi patuwadai. Da'iki a sulit bana tekkiwe. ³ Ratu Syeba na eta pande Salomo, istana a allu dua papakeddena, ⁴ monno na etawi panga'a a ne'ina meja deta tokko. Na eta dommowi pata mandi'ida ngara pegawaina, patada ngara pelayanna ba layan monno ba tau kalambe, ngara juru enu monno ngara kurban patunnuda ne Bait MORI. Na bei takage bana eta kuwawi haida. ⁵ Bage hinnage barana tokko, "Ngara kuwa panewe parengngegu ne wannogu tubana ngara pawilli kaladamu monno pandemu, ngara kuwa na benar. ⁶ Dekukoge dakku wai kuwakige ngara kuwa parengngegu dukki ba ammiga ne monno baku eta dou waina matagu. Tetakka, appawi parengngegu danna dukki kippo setengah wali kaladana pandemu. Na allupo kaladana pandemu wali panewe parengngegu. ⁷ Berbahagialah ngara atamu monno ngara pegawaimu orona ba rengngego ngara pandemu ba layanigu. ⁸ Terpujilah MORI, ALLAHmu! a berkenan baramu monno a pamandi'igu ne takhta-NA ba tokko Israelwu, orona ALLAH namanawaragu monno na kambu atege ba wa'i patirri bangs aIsrael, nyakanna keketawu ba tokko Israelwu ku raige keadilan monno kebenaran." ⁹ Bage Ratu Syeba nayawi Tokko Salomo ngau dua kabullu talenta omma rara, rempah-rempah a allu luwana, monno togo permata. Da'i pongnguki iya ata a yawi rempah-rempah a allu luwana hinna kaina payana Ratu Syeba barana Israel. ¹⁰ Atana Huram monno atana Salomo a ngindi omma rara wali Ofir monno wasu cenadana monno togo permata. ¹¹ Wali wasu cendana tokko na raina tangga a tuba Bait ALLAH monno istana tokko, monno kecapi monno gambus a tuba ngara ata a dodo. Ata Israel da pernah pongngukipo ba eta a hinnana haida. ¹² Tokko Salomo nayawi Ratu Syeba ngara kuwa pabeina monno ngara padengngina, lebih apawi pangindinai tokko. Bage Ratu Syeba monno ngara atana wali bada netti wannoda. Douna Salomo ¹³ Botona omma rara pakolena Salomo ne iya douna botona enne rata enne kabullu enne talenta, ¹⁴ danna tama kipo pangindida ngara saudagar monno ata papalele. Ngara tokko ne Arab monn ata pareta a wa'ina ne wanno a ngindi kaina omma rara monno omma kaka barana Salomo. ¹⁵ Tokko Salomo narawina dua ngau perisai wali omma rara tempaan. Ne iya perisai nabutuge enne ngau syikal omma tempaan. ¹⁶ Na rai dommona touda ngau perisai a ki'ina wali omma tempaan. Na iya perisai nabutuh touda ngau syikal omma, bage a ta'i kuadi ne umma"Kabowo Lebanon". ¹⁷ Tokko Salomo narawina takhta a kaladana wali gading monno lapisiwa waina omma rara. ¹⁸ Ne takhta wa'idi enne ana tangga, monno iya pandou wa'i wali omma. Neida limma kursi a duada, wa;idi duada patung singa, ¹⁹ tetakka ne enne nauta a dede kabullu duada kasala tou singa, pata'ida ne iya kabi'u nauta. Daiki a hinna wa'ina wadde. ²⁰ Ngara kuwa paenu waina Tokko Salomo a rawi waidi wali omma. Ngara kuwa alat a ne'ina ne "Hutan Lebanonn" a rawi waidi wali omma rara. Barana Salomo ngara kuwa omma kaka da'iki wellida! ²¹ Wa'i kai tenana Tokko Salomo a kako netti Tarsis monno ata Huram, monno ne iya dou-iya dou na tenana wali wali Tarsis monno na keketai omma, omma kaka, gading, kedu, monno keila merak. ²² Na alluwe pakaya waina monno na alluwe pandena Tokko Salomo banding tokko wadde ne ponnu tana. ²³ Ngara kuwa tokko ne ponnu tana ammid barana Salomo barengngewe ne pawata a allu bijaksana. Ammidi barengngewe pande payanai ALLAH barana. ²⁴ Iya dou-iya dou ngara tokko ammidi bangindi maraka barana Salomo haida barang a wali omma, kalambe, senjata, rempah-rempah, dara, monno keledai. ²⁵ Wa'idi pata rata gollu darana Salomo monno keretana. Wa'i dommodi dua kabullu rata pasukan a waina dara monno na ta'i wa'idid ne wanno khusus kereta perang monno Yerusalem a palolo dengawi. ²⁶ Tokkowa na Salomo ponnuna tokko wadde, wali ne Loko Efrat dukki wannona ata Filistin, monno dukki perbatasan Mesir. ²⁷ Na allu luwadi omma kaka, hinnana luwana togo ne Yerusalem. Luwa dommodi wasu cendanana hinna kaina wasu ara ne letena a subur. ²⁸ Dara a tubawa Salomo a pangindi wali Misraim monno wali ngara wanno a eka. Matena Salomo ²⁹ Ngara lara moripana wali a ullu dukki babawe namatulisa kuwa bawe ne riwayatanna Nabi Natan monno kitab nubuatan Ahia ata Silo monno kitab papaetana Ido, na ata a pnde eta. Na Ido ata a mangngu paetanai a tulisawe tubana Yerobeam anana Nebat. ³⁰ Ba tokkowa Salomo ne Yerusalem pata kabullu douna. ³¹ Bage katane wa'iwi Salomo barana ina-ama kawedana ne wanno Daud, amana. Nyaka Rehabema, anana nya a deluwa Salomo ba tokko baruwa.