Pittu roti tubada pata rata ata ¹ Netti loddona, yidda ata mangieda bada pakassana mono da'ima a wa'ina panga'a. Yesu na paoudi yidda murita-Na mono linna barrada, ² " Yauwa ku kasihan di yidda ata mangieda oronage bada palolo dengaga selama touda loddo, mono da'ima a wa'ina ga'i ka nga'a. ³ Mono, baku patuka kodi bada bali karieba ummada, da bodda lara dana oronage yidda pirra ata walina padou a marro". ⁴ Mono, yidda murita-Na da walewe-Ya, "Gie wali ngieda bada biekuta dengana roti ni'i padou a kasika?". ⁵ Bage, Yesu na tuayi yidda, "Pirrada roti a wa'ina barrami?" Da walewe, "Pittu roti". ⁶ Bage, Yesu na patukadi yidda ata mangieda ga'i kada madi'i togo tana, mono na dekeyi yidda pittu roti, na malangi, mono na bareyi, bage na yadadi barrada murita-Na ga'i kada bareyi barrada yidda ata mangieda.Bage yidda da bareyi barrada ata mangieda. ⁷ Mono, wa'i suodi alladi kabokko barrada yidda murita. Ne bada bawe bada malangi, Yesu na patukadi yidda murita-Na bada bare allayi yidda kabokko barrada yidda ata mangieda. ⁸ Yidda ata mangieda da nga'a dukki bada biekuta, mono da pakassadi yidda panga'a a iengana pittu keranjang a bonnuna. ⁹ Pata rata da ata a nga'a. Bage, Yesu na patukadi bada kako. ¹⁰ Bage Yesu na tama nee tiena dana dugguda murita-Na mono da dukki nee daerah Dalmanuta. Yesu da dengiya bada patingodi tada a walina Surga dana. ¹¹ Mono, yidda ata Farisi da mai mono da berdebat dengani Yesu, sambil bada dengiya Yesu ga'i kana patingodi tada a walina Surga dana, ga'i bada nunga-Ya. ¹² Yesu na tengiwe ngau-Na nee Roh dana-Na, linna, "Appa ne generasi kada ngaddowa tada? Ku takka guge a bia barramu, da'ima lakka iyya tada pa yadadi yidda generasi". ¹³ Bage, Yesu na duddakadi mono na tama bali nee tiena dana, mono na pala nee bali. Ragi ata Farisi mono ragi Herodes. ¹⁴ Yidda murita da dengana bada ngiddi roti, mono iyya kige roti a wa'ina nee tiena dana. ¹⁵ Mono, Yesu na pana'u barrada, " Siap sedia mi! Paate kimi tubada ragi ata Farisi mono ragi Herodes". ¹⁶ Bage yidda da woroge iyya mono waddeka tubada yidda a idda manguna roti. ¹⁷ Mono, ne bana paddege neya, linna Yesu barrada yidda, "Appa maka mi tekkiwe tubanage ba da'i rotimi? Dei padde alla mapoge? Na kattoge atemu? ¹⁸ Mangu matami takka dei ietama? Mono, mangu katillumi takka dei rengema? Dei lolo mawe, ¹⁹ ne Yauwa baku bareyi limma roti tubada limma rata ata, pirra keranjang da a bonnuna panga'a pa pakassami?" Da walewe, "Kabullu duada keranjang". ²⁰ "Mono, yidda pittu roti tubada pata rata ata, pirra keranjang da a bonnuna panga'a pa pakassami?" Da walewe, "Pittu keranjang". ²¹ Bage, linna barrada yidda, "Dei padde alla mapoge?" Yesu na palengani ata kabuola nee Betsaida. ²² Bage, Yesu mono murita-Na da dukki nee Betsaida. Mono, yidda pirra ata da ngiddiyi ata a kabuola mono da dengi barrana Yesu ga'i kana norrodi. ²³ Yesu na norro nani limmana na ata kabuola mono na ngiddiya nee bali wanno. Bage, Yesu na panu'i nani matana na ata kabuola mono na tauya limma-Na togo matana. Linna barrana, "Mu ieta sesuatu?" ²⁴ Bage, na ata na tangara dieta mono linna, "Ku ietayi yidda ata, takka ku ietayi mirrika wasuyi a kako". ²⁵ "Bage, Yesu na tau kiaya limma-Na ponnu matana na ata, bage na ata na wukkeya matana, na ieta bana, mono na ieta padessa bana. ²⁶ Bage, Yesu na patukani bana bali ummana mono linna, "Dou tamakana nee wanno dana". Yesu ngiadona Kristus. ²⁷ Bage, Yesu na kako, dugguda murita-Na, nee wanno dana nee Kaisarea Filipi. Mono, ne lara dana, Yesu na tuayi yidda murita-Na ba linna, "Lidda yidda ata, garra-Ga Yauwa?" ²⁸ Da walewe, "Yohanes Pembaptis, waddeka lidda Elia, mono yidda waddeka kia lidda nabi. ²⁹ Bage, linna Yesu barrada, "Takka, menurut yemmi, garra-Ga Yauwa?" Na walewe Petrus, "You ngiadona Kristus". ³⁰ Mono, Yesu na tekki dage ga'i ka dada tekki kawe lakka lai garra tuba tou-Na. Patekkida tubana mayillana Yesu. ³¹ Bage, Yesu na bowodi murita-Na bahwa na Ana Ata na mayillapo tubanage ngara dukkanage mono da tullarani tua - tua Yahudi, imam kepala mono ahli Taurat, mono da pamate ya, touda loddo nage na kedde bali. ³² Mono, Yesu na terbuka bana tekkiwe neya. Bage, Petrus na tengiya Yesu nee barrana mono na tegur-Ya. ³³ Takka, sambil bada gilla kadi yidda murita-Na, Yesu na tegur ya Petrus mono linna, "Kakowu walina barra-Gu, ta muori tana! Oronage, ba dou pangeddage perkara na Allah, takka perkara na ata pi'a". ³⁴ Bage, na paoudi yidda ata mangieda mono yidda murita-Na,mono linnadi, "Na ata bana beikoge bana dieku-Ga, na menyangkal powe tou douna, mono na deitoya salib na bage na dieku-Ga Yauwa. ³⁵ Oronage, garrakoni a beige bana manumarawe ngauna na dadawe.Takka, garrakoni a dada lolo ngauna tubagu Yauwa mono Injil na pamanumarawe. ³⁶ Oronage, appa konage pa utu na ata bana kole koge ngara dukkanage ponnu tana, takka na dadawe ngauna? ³⁷ Appa pa yana na ata ga'i kana kolege ngauna? ³⁸ Oronage, ba garra koni a makkege orogu Yauwa mono li'i-Gu barrada yidda ata a idda setia mono a sala, bage na Ana Ata na makke alla bana akui ya na ata ne bana maiko nee kemuliaan danana Ama-Na dugguda malaikat a kudus".