¹ Bage, linna Yesu barrada, "Ku tekki takka guge a bia barramu, wa'idi yidda pirra ata a dede ni'iya a idda mate dukki bada ietawe ba ammige ne kerajaan Allah waige kuasa". Yesu mono Musa mono Elia ² Bage, enne loddo kia, Yesu a woddayi Petrus, Yakobus, mono Yohanes, bage na ngiddiyi bada kamiesa togo letena a madieta. Bage, Yesu na berubah we matana aroda yidda. ³ Bage, kalabbe-Na da kabibbaka mono kaka takkage. Da'ima ata a pakakana kalabbe ne ponnu tana a padde pakakage a linna wa'ina. ⁴ Bage, na ouda aroda yidda, Elia dugguda Musa, nedi a panewe dengani Yesu. ⁵ Bage, linna Petrus barrana Yesu, "Rabi, na dessa takkawe ba wa'igama neya. Maida kata rawina touda kemah, iyya tubamu You, iyya tubana Musa mono iyya tubana Elia". ⁶ Oronage, Petrus ba dana padde appako pawalena oronage bada madauta. ⁷ Bage, na oudawe kawuta a woletadi, mono da rengewe li'i a mai walina kawuta dana, linna, "Na ngiadona Ana-Gu pa manawara-Gu. Rengeya Ngia!" ⁸ Bage ne bada ietawe barrada, da'i miema ponguma pa ietada lakka garrani ngiakadona Yesu. ⁹ Bage, ne bada burru walina togo letena, Yesu na tekki dage ga'i ka dada tekki kawe lakka lai garra ne pa ietada, dukki na Ana Ata bana kedde walina mate dana. ¹⁰ Ba linna kowe, na norroge ne patekki tubada yidda dou sambil bada tuawe appa arti nage ne ba kedde walina mate dana. ¹¹ Bage, da tua barrana Yesu, "Appa yidda ahli Taurat na tekkiwe na Elia na ullu po?" ¹² Bage, linna Yesu barrada, "Elia ammi ullu takkani bana pa dessawe ngara dukkanage. Bage, pei wa'idage ne a matulisa tubana Ana Ata ne Ngia bana luapoge mayillana mono da hinaya? ¹³ Takka, Ku tekki guge barramu na Elia wa'i bani, mono yidda da rawige a linnana pa beida, a linnana a matulisa tubana ngia". Yidda murita dada sanggup ma bada pasellaya na roh a buokala walina barrada ata. ¹⁴ Bage, na Petrus, Yakobus mono Yohanes bada bali barrada yidda murita, da ietayi yidda ata mangieda a pakassana barrada, mono yidda ahli Taurat nedi a berdebat dengadi yidda. ¹⁵ Mono, yidda ata mangieda bada ietaya Yesu, da katattaka mono da malle bada regga-Ya. ¹⁶ Bage, Yesu na tuayi yidda, "Appa pa berdebat dengami dugguda yidda ahli Taurat?" ¹⁷ Na iyya ata a walina yidda ata a pakassana na waleya Ngia, "Guru, ku ngiddiya na lakawa kabani barra-Mu oronage bana tamani roh a pa kabangaya. ¹⁸ Na roh bana tamakoni, na pobbani togo tana mono wa'ige wurra a lousona wali ngada danana, mono na pakatidi ngudduna, bage na lattaka. Ku dengiyi yidda murita-Mu ga'i kada wudaya na roh, takka dada sanggup ma". ¹⁹ Bage, Yesu na waleyi mono linna, "Ta ata a idda mangu ate waina! Pirra kiapo baku iengana barrami? Pirra kiapo baku bertahan denga gumi? Ngddiya na lakawa barra-Gu!" ²⁰ Bage, da ngiddiya na lakawa barrana Yesu,. Bage, na roh ne bana ietaya Yesu, na kiddukani bana kabali mono na pawurrawe ngadana. ²¹ Bage, linna Yesu barrana amana na lakawa, "Pirra gaibawa mado'i nage bana dadiwe neya barrana?" Na walewe, "Bana ki'i pona. ²² Mono, na roh na leto pakitani na lakawa nee api dana mono wee dana ga'i ka pamateya. Takka, bou paddeko bou rawige, manawaraga mono tulu gama". ²³ Linna Yesu barrana, "Bou paddeko? Ngara dukkanage notoge tubadage yidda a waige". ²⁴ Na amana na lakawa na ngi'o mono na dangu, "Yauwa ku waige! Tulu gage ne pa idda waige!' ²⁵ Ne bana ietayi Yesu yidda ata mangieda a ngettana a mai, Ngia na kayakani na roh mono linna barrana, "You roh a kabanga mono kawanga, Yauwa ku paretawu ga'i kou lousona walina na lakawa mono dou tama kiakani!". ²⁶ Ne bana tangu mono na kiddukani na lakawa, na roh na lousona. Na lakawa mirrika ata mateya bage yidda ata mangieda lidda, "Ngia na mate!" ²⁷ Takka, Yesu na norro nani limmana na lakawa mono na pakedde ya, bage na lakawa na dede. ²⁸ Bage, na Yesu bana tama nee umma, yidda murita-Na da tua kamiesa ya, "Appa yamme maka dama paddewa bama wudaya?" ²⁹ Mono, linna barrada, "Neya dada bisa mawe bana lousona kecuali ba waige sabaya". Yesu na tekki kiawe tubana mate-Na. ³⁰ Walina neeya, Yesu mono murita-Na da kako mono da liwe wilayah Galilea. Mono, dana nauma ba wa'iko ata a paddege. ³¹ Oronage, ne ba neni a bowodi murita-Na mono linnadi yidda, "Ana Ata da yaya nee limma danada ata, mono yidda da pamateya. Mono, ne ba pamateya, touda loddo linnawe Ngia na kedde". ³² Takka, yidda murita dada padde mage ne patekki mono da madauta bada tuawe barra-Na. Perdebatan tubana garra a kaladana. ³³ Bage, Yesu mono murita-Na da dukki nee Kapernaum. Mono, ne ba ne bani nee umma, na tuayi yidda, "Appa pa tekkimi nee lara dana?" ³⁴ Takka, yidda da kadenna oronage ne ba nedi lara dana da berdebat iyya mono waddeka tubanage garrani a kaladana. ³⁵ Bage, Yesu na madi'i mono na pa oudi yidda kabullu duada murita-Na. Mono, linnadi barrada, "Na iyya ata bana beikoge bana dadi a ulluna, da murri po wali ngara dukkada mono pelayan barra ngara dukkada". ³⁶ Bage, Yesu na dekeya na iyya lakawa ki'i mono na padedeya tilluna. Mono, sambil bana aguni na lakawa, linnadi barrada, ³⁷ "Garra koni a deiba linna wa'ini na lakawa waige ngara-Gu, ngia deiba naga Yauwa. Mono, lakka garrani a deibawa Yauwa, da deibakinaga Yauwa, takka Ngia a patukaga Yauwa". Ata a wuda muori tana waige ngara-Na Yesu. ³⁸ Linna Yohanes barrana Yesu, "Guru, yamme ma ieta ata a wudayi muori tana waige ngara-Mu, mono yamme ma addadi oronage ngia ba dana deikugama yamme". ³⁹ Takka, linna Yesu, "Ommana pa addadi oronage da'ima ata a rawige ne parawi a ajaib waige ngara-Gu, a hujat miemawa Yauwa. ⁴⁰ Oronage, garra koni a idda lawada itta, wa'ini barrada itta. ⁴¹ Bage, Yauwa ku tekki guge a bia barramu, ba garra koni a yagu iyya kuoba wee oronage you ba ata a diekunagu Kristus, dana dada mawe tubamu". Tubana a pa oroge ne sala. ⁴² "Mono ba garra koni a pa kaboulaya nee sala dana na lakawa ki'i a waiga, na louka padessa powe na watu kilangan a kaladana ba tieru nani togo bukkuna mono letoni nee bonnu dana. ⁴³ Mono, na limmamu bana pa oro kowe bou rawina a sala, katupuya na limmamu. Na louka padessa powe bou tama nee muorika dana waini limmamu a kaduku daripada duada limmamu bou tama nee neraka dana, nee api dana a idda boddana, ⁴⁴ padouda keddela a idda mate mono api a idda boddana. ⁴⁵ Mono, na wa'imu bana pa oro kowe bou rawina a sala, katupuya na wa'imu. Na louka padessa powe bou tama nee muorika dana waini wa'imu a kaduku, daripada duada wa'imu bou tama nee neraka dana, ⁴⁶ padouda keddela a idda mate mono api a idda boddana. ⁴⁷ Mono, na matamu bana pa oro kowe bou rawina a sala, wikkoya na matamu. Na louka padessa powe bou tama nee kerajaan Allah dana waini iyya matamu daripada duada mata bada letogu nee neraka dana, ⁴⁸ padouda keddela a idda mate mono api a idda boddana. ⁴⁹ Oronage, na ata da pamessiya waini api. ⁵⁰ Ne messi na dessawe, takka na messi bana dukka koge messinage, pei wa'imuni bou pa messi kiewe? Mangu messi pomu nee tou danamu mono muoli dame dengadi iyya mono waddeka".