¹ Haworus oho nioho matang si Yesus moho atetela iluah Galilea, haaho luah Tiberias. ² Tadoo totumu luluten mange malalas i Sia, nde tadoo mujizat-mujizat mawawemauleng, i totumu pahadosan tinulid’na. ³ Sa si Yesus metung ambaoi ndungusan sa dumatuh biboho wakaru-haruai manga muri’d Na. ⁴ Pashah, endo pawalooren i tou Yahudi ala’kapui. ⁵ Pilahen noho Yesus kumekêdNa, sa monarah, awahem tadoo totumu luluten mange mahi we Sia, kuan Yesus besi Filipus “ Bisana telesan ihita kipul roti, saniboho silatahula dona kuman ? ⁶ Waaho behua i Yesus, mangepe be sia, nde kalahaNa asai e tulide’Na. ⁷ Sowaten i Filipus be Sia : “roti kipul baer i dua ngatus dinar ahii ro’ro mande silatahula mahaere mange mekele hisid. ⁸ Kuan i mari’dNa si Andreas pog i Simon Petrus be Sia; ⁹ bana kedong biai lima ngawowote roti kipul bo dua enda, sumata awa niange doro a totumu kele ange katadooan ? ¹⁰ Kuan i Yesus : i wasium manga totumu iana medatuh”. Tampai boho tadoo noho, oasa medatuh manga totumu iboho hii hahurag a lima ngoribu katadooan manga tuama. ¹¹ Tilahom si Yesus i minjo roti, sa i sombayaNga sa webetengen besilatahula a medatuh-ratuh biboho. Keleaho hahi tinuli’dNa a manga da, katadooan nihabog ilatahula. ¹² Asahoho silatahula kuaNa a manga muri’dNa : sesenen niana manga powa’na saniboho ahem niwoula. ¹³ Tilahom sinesen, sangawulu bo rua bonut e powo’na i lima roti lebe hahi kuman noho silatahula. ¹⁴ Kawelahan noho imanga totumu e mujizat tulid’na, kuan ilatahula : Awahes Sia totuu nabi e mahi ambaoitoba. ¹⁵ Kalahan i Yesus, silatahula mahi sa weangen ilatahula Sia karuai peleseen iatang ilatahula Sia daja, moho Sia menyingkir imbe ange, siSiai nesa. ¹⁶ Bawaandom molainem dumendem manga murid i Yesus moho aluah, sa manake mabolutu. ¹⁷ Sa tumetela moho a Kapernaum. Alam dendemem awe si Yesus imahi tumauw silatahula. ¹⁸ Bohol i saloyon bako bae kakab depet. ¹⁹ Meru oho silatahula awe onah dua telu mil karengkangan, pilahen ilatahula si Yesus mahebebe ambaoi nahe sumusud ohoi bolutu. Matalo mio silatahula. ²⁰ Sumata kuan i Yesus besilatahula : “siAhu niai, naam matalo. ²¹ Isake ilatahula Sia ambolutu, hii makapui be heramatem silatahula a suaan. ²² Mandomai tadoo we totumu awe i maleng a tetela, meilah ahem bolutu bati io waaho hii si Yesus i sumake ambolutu karua i manga muri’dNa, bati manga muri’dNa eni matang. ²³ Makapui imahim bolutu a Tiberias sumua tai kinanan ilatahula roti, a nisombayanag ngoho i Tuhah. ²⁴ Tadoo aho manga totumu meilah oho si Yesus bo manga muridNa alam biboho i sumakem silatahula ambolutu moho a Kapernaum mangilah si Yesus. ²⁵ Iwetouw oho i manga totumu si Yesus ambeta i saloyon kuan ilatahula be Sia : “Rabi, kaisa how behoamatai wiai?" ²⁶ Sowaten i Yesus silatahula : “ I huahu behamotahula, awahem kamotahula mangila i Ahu, ahi asa hamotahula imilahem i manga tanda, sumata komotahula ihumanem roti osa hamotahula masuhem. ²⁷ Matawoi, hii sa tanu kakanen mahaere kabinasaan, sumata tanu kakanen e tahang abad penonowan. Telas, eniehe Bata i Ngeledyiu behow ; nde siSia e sa be sia matu-utu, Ngeledtou, tapel Na. ²⁸ Osa kuan ilatahula beSia : “Asia tuliden ihamitahula, saniboho kamitahula tumawoi i tawoyen ihabog i Ngeledtou. ²⁹ Sowaten i Yesus besilatahula : “waim tawoyen papandungen i Ngeledtou, yanasa kamotahula maheman beSia ambewa siumai i Ngeledtou. ³⁰ Osa ihuai latahula beSia : “tanda wasia we tinuli’d Nu, saniboho kamitahula milah bo maheman i How ? Tawoyen asia e tuli’deNu ? ³¹ Nawo ihamitahula i human mana a tinia, kele embewatih : silatahula bineaNa kan roti a sorga”. ³² Osa kuan i Yesus besilatahula : Ihuahu behamotahula awahem hii si Musa e nimehe roti behamotahula a sorga. Sumata Namangku mutu-utu nimehe roti behamotahula roti totuu a sorga. ³³ Nde roti a Ngeledtou waahoo roti ilumolos a sorga e mahehe penonowan ambaoitoba”. ³⁴ Osa kuan ilatahula be Sia : Ngeledtou, beanai hamitahula roti na hasondo”. ³⁵ Kuan i Yesus besilatahula : “si Ahu roti katowan; sisei sia mahi we Ahu, alam sua maleo, bo sa sisei maheman i Ahu, alam sia kawelaan. ³⁶ Sumata ihua hu be hamotahula ; mande hamotahula imilahem iahu, hii hamotahula meman. ³⁷ Pahasa behei NamangKu beaHu maleng mahi be Ahu, bo sisei sia mahi be Ahu hii Sia itiKu. ³⁸ Nde Ahu nilumolos a sorga hii tumulid pandu’Ku sumata pandung i Ngeledtou i masiu i Ahu. ³⁹ Osa wai pandu’Nga i masiu i Ahu, saniboho pahasa beheNa be Ahu ahem nihatala sumata male’Ku iwawatow a nendo mahahad. ⁴⁰ Nde wai pandung i Namangku, sanibohp pahasa tou milah keding sa maheman i Sia mahaere katowan telas, saniboho male ku iwawatow a nendo mahahad. ⁴¹ Mosau-sauna mio tou i Yahui be Sia, nde mbehua Na : “ Si Ahu roti ilumolos asorga”. ⁴² Kuan ilatahula : hii Sia niai si Yesus, bata i Yusuf, mama bo wapa Na kahilalaan ihita ? Kelembisa Sia kumua : ilumolos Ahu a sorga ? ⁴³ So’waten i Yesus be silatahula : “naam kamotahula mosau-sauna”. ⁴⁴ Tow esa ahen do’na mahi we Ahu satahii sia kosen i mutu-utu i masiu i Ahu. Bo sia maleku iwawatow anendo mahahad. ⁴⁵ Bana mbewatih akukua i nabi-nabi : bo pahasa silatahula susuyan i mutu-utu. Bo sisei nitumanga bo tumirimai mbesusui i mutu-utu, mahi be Ahu. ⁴⁶ Wai ahem mbaera, awahem bana totumu imilahem si mutu-utu. Bati siSia mahi a Ngeledtou, si Siam nimilah i mutu-utuh. ⁴⁷ Ihuahu behamotahula ; kaulitan sasisei maheman, mahaere sia katowan telas. ⁴⁸ Si Ahu roti penonowan. ⁴⁹ Nawoku ihumanem manna a tinia ta silatahula i matem. ⁵⁰ Waim roti ilumolos a sorga : sisei sia kuman i sia, hii sia mate. ⁵¹ Si Ahu roti penonowan, ilumolos a sorga swana tow kuman roti iaia penonowan ahad kaeto-eto, bo roti iehehu waahu ketédKu, ieheHu tanu penonowan ambaoitoba. ⁵² Manga tou Yahudi i mekahanjoan anesa hele anesa sa kuan ilatahula : kelembisa sia mehe i keted Na kanen ihita”. ⁵³ Kuan i Yesus besilatahula : i hua hu behamotahula, awahem sa hamotahula kuman i keted Bata iNgeledtou boluku indahaNa, hii hamotahula menonow ambatanga nu, ⁵⁴ Awahem sisei sia uman i kete’Ku boluku indahaKu mahaere sia katowan telas bo male’Ku sia iwawatow anendo mahahad. ⁵⁵ Nde kete’ku totu-totu kakanen bo daha’ku totu-totu palekuun. ⁵⁶ Sa sisei kuman i kete’Ku bo luku ndaha’Ku, metewio sia be Ahu bo Ahu be sia. ⁵⁷ Kele mange si mutu-utu menonow i masiu i Ahu bo Ahu menonow tanu mutu-utu, keleaho hahi sa sisei e kuman i Ahu, menonow sia nde si Ahu. ⁵⁸ Wai roti ilomolos a sorga, hii sa hele roti pinakan inawo-nawo i mamatem. Sasisei kuman i roti yai, penonowana ahad kaeto-eto”. ⁵⁹ Pahasai boho kuan i Yesus a Kapernaum kele bewasusui Na ambale wasesenan. ⁶⁰ Kataanan nohoi latahula nioho kodait kuan i manga murid i Yesus : taned io kodait iai sisei ndona tumanga ? ⁶¹ Kalahan i Yesus asuang i nateNa. Awahem manga muridNa mosau-sauna hawali wiboho, kumua be silatahula : “Awa kodait iboho mawataned kawahema’nu ? ⁶² Osa kelembisa, sa hamotahula milah Bata i Ngeledtou kumapet bisana nutunaNa atalewe? ⁶³ Monggonguot e mehe penonowan, ahem bereguna i keted. Pahasa kodait be huahu behamotahula waaho monggongguot bo penonowan. ⁶⁴ Sumata esaan behamotahula bana tahii meman. “nde awe moho kalahanem i Yesus, sisei tahii meman bo sisei i sumatakan isia. ⁶⁵ Osa kuaNa : nde aho behua hum behamotahula : tow esa ahem dona mahi we Ahu satahii kohomba i mutu-utu be Sia. ⁶⁶ Molai wiboho tadoo muridNa malengilihud alam ilumas i Sia. ⁶⁷ Osa kuan i Yesus a kasangawulu bo rua i muri’d Na : “Awe hahi hamotahula alam mabog moho ? ⁶⁸ Sowaten i Simon Petrus be Sia : “Ngeledtou, besisei e nohoan i hamitahula ? Kodai’Nu waaho kodait tumow kaeto-eto ; ⁶⁹ Emanen ihamitahula bo kalahanem, awahem kow waaho leo a Ngeledtou. ⁷⁰ Sowaten i Yesus besilatahula : “Hii halahan i hamotahula si Ahu ni sumisir ihamotahula sangawulu borua? ⁷¹ Panutuiku waaho si Yudas, bata i Simon Iskariot, nde sisia e sumarakan si Yesus, sisia nesa kasangawulu bo ruai murid.