¹ Halawusoho nioho bana nendo walooren i tow Yahudi, osa si Yesus matang moho a Yerusalem. ² A Yerusalem atai imbonang bako domba bana nesa papaan kuaan itow Ibrani Betesda ; lima elesad’na. ³ Biboho ammanga lesad tadoo totumu pahadosan meleked manga totumu bu’ta, manga tow bakui bo tou hii helapang, manondo-nondo kaluad inahei papaani boho. ⁴ Nde matepo-tepo lumolosai malaekat i Ngeledtou a papaan meye inahei boho, sa sisei tilaho sumuang meye oho kaluad inahe, memauleng, asia mange mahado’na. ⁵ Biboho bana nesa tou telu ngawulu bo walu ngatau sia pahadosan. ⁶ Kawilahan noho i Yesus sia meleled bibohom bokalahaNa, awahem etoom sia kelewaaho, kuaNa wesia : mabog kow memauleng? ⁷ Sowaten ibooho papaani bange sa nahe molai meye kumaluad samantara ahu mahehowe, boho apapaan, tow walina pahamunan nde siahu. ⁸ Kuan Yesus be sia “tumodem, peangen niana pahooanu sa lumapang. ⁹ Tuos iboho imemaulengem totumu iboho sa iatangan pahooan na sa lumapang. Sumata endoi boho sabat. ¹⁰ Iboho kawalian manga tou Yahudi kumua boho atow memaule’ng pe mio-inia endo sabar hii how mataumeang i pahooan’nu. ¹¹ Sumata kuana besilatahula : tow imawawemauleng iyahu, si Sia nihumua beahu : latang pahoooany sa lumapang. ¹² Taanan ilatahula wesia : sisei nioho totumu ihumua behow : latang pahooanu sa lumapang ? ¹³ Sumata weaho tow imemaulengem hii mahalad sisei aho totumu, nde si Yesus behatala nemoho a tutud i katadooan totumu biboho. ¹⁴ Mohoitau mange iwetauw i Yesus sia ambalei Ngeledtou osa kumua be sia : sihow imemaulengem, mo’nam tumulid sea, saniboho how mainjo ta’pia, ¹⁵ Tilahom ilumuai towi boho. Osa mohona iworosirita atow Yahudi, awahem si Yesus i mawawemauleng i ahu. ¹⁶ Iboho kawalian manga tow Yahudi dumameji mauwah si Yesus, nde sia nitumulid iboho anendo sabat. ¹⁷ Sumata kuan i Yesus besilatahula : “si wapaha matawoi ahad inia, iboho kawalian Ahu tumawoi. ¹⁸ Boho kawalian manga tou Yahudi lebe dumameji i mate si Yesus, hii sawati waaho sia hii mikaya i sabat, sumata kahi Sia kumua Ngeledtou si wapaNa mutu-utuna bo wekelena batanga Na bo Ngeledtou. ¹⁹ Osa kuan i Yesus sumowad silatahula, kuaNa : Ihuahu be hamotahula, awahem kedong hii mahaelei tumawoi sa wati batanga’Na mio. Sa hii Sia mila mutu-utu tumawoi nde asia tawoyen mutu-utu, waaho hahi tawoyen i kedong. ²⁰ Nde mutu-utu mahalas i kedong sa ituruNa be Sia epahasa tinawoiNa mio, keleaho Sia ituruna be Sia e manga tawoyen osa hahi mange tawoyen bako osa hahi manga tawoyen iboho osa ihaerang ihamotahula. ²¹ Nde kele mutu-utu mawatow i mangatow i mamatem bo maleng mawatow, keleaho hahi kedong mawatow sisei e nihabog’Nga. ²² Mutu-utu hii mahahim iseiseiange, sumata besarakanem e pahakiman niboho pahasa a kedong, ²³ Saniboho pahasa tow masiri kele silatahula masiri i namang mutu-utu. Sisei how hii masiri i kedong, kele mange how hii masiri i namang mutu-utu, i masiu i Ahu. ²⁴ Ihuaha be hamotahula : sisei sia matang kodai’ku osa maheman be Sia imasiu i Ahu, mahaere sia katowai telas bo ahii sia uk’kumen, nde Sia irumesom a pawate a menonow. ²⁵ Ihuahu behamotahula : awahem tepona ihoamatem, bo hoamatem awahem manga tow imamatem mahataan kodoid bata i Ngeledtou bo silatahulai nimahatanga, malêng tumow. ²⁶ Ndekele namang mutu-utu bana katowan ambatanga’Na mio, kele aho hahi beheNa batNa mahaere katoan ambatangNa mio. ²⁷ Osa beheNan kawasa be Sia murus, nde Sia bata itotumu. ²⁸ Naam i haerang ihamotahula nioho, nde topona hoamatem nde pahasa tow asuangi kubut mahataan i kodai’Na. ²⁹ Sa silatahulai ni matuli-tulid mauleng male tumow a penonowan kaeto-eto, ta’silatahula matuli-tulid ta’pia male’ng tumow sa uk’kumen. ³⁰ Hii ahu matau tumulid wasi wasia ambatangaiKu mio, mutus Ahu asia nioho kinataanaiKu, bo pahuruseiku ulit adil, nde nia hii kahabogeiku, sumata kahabogena i masiu i Ahu. ³¹ Sahu sumairi tanu batangaiKu mio, tatu sairi Hu hii humiit, ³² Bana mbalina sumairi tanu si Ahu ta’ kalahaiku, awahem be sairiNa tanu si Ahu totuu ulit. ³³ Kamotahula i hamirim bewasiu besi Yohanes osa sia isumairim i kaulitan. ³⁴ Sumata Ahu hii erlu sairi i kaheletou, sumata ihuahu niai, saniboho hamotahula maselamat. ³⁵ Si Sia nioho sasoloan a melalap bosumelo bo hamotahula mahahelam ahii hapui suloi boho. ³⁶ Sumata bana nisairiHu lebe wenting a nisairi Yohanes, waaho pahasa tawoyen iyehe i mutu-utu be Ahu, saniboho nioho tulideiku. Waaho niho tawoyen tulideiKu iaitalewe, bo waho, mbe sairi tanu si Ahu, awahem namang mutu-utu nimasiu i Ahu. ³⁷ Mutu-utu nimasiu i Ahu. Si Sia nisumairi tanu si Ahu. Hii maahasa tangaan ihamotahula kodaina. GioNa hii mahasa kawilahan ihamotahula. ³⁸ Bi kukuaNa hii mahasa sumondo io behow, nde tahii emanen i hamotahula sia e masiuNa. ³⁹ Silihen ihamotahula emanga Kaol, ndesa sangkan ihamotahula si Sia kamotahula bana katowan telas sumata mande suang i Kaol sumairi tanu si Ahu, ⁴⁰ Ta’ kamotahula hii mabog mahi we Ahu mahaere iboho katowan. ⁴¹ Hii Ahu mabog siriin itow, ⁴² Sumata kamotahula, kalahaiku mio suang inate hamotahula hii mahales i Ngeledtou. ⁴³ Mahi Ahu tanu ngalan i Nama’Ku, mutu-utu Hu, ta’ kamotahula hii tumirima i Ahu ; stow walina mahita ngalan mio, tiriman i hamotahula. ⁴⁴ Kelembisa hamotahula meman, kamotahula hii mabog siriin itow walina hii mabog sumiri tanu Ngeledtou pahemanu. ⁴⁵ Naam kamotahula sumangka, awahem mahu mahatau asasaangen i mutu-utu e ni mahatau ihamotahula waaho si Musa, waaho si Musa, be sia hamotahula mepa paharawanu. ⁴⁶ Nde sa hamotahula waheman be si Musa, tatu hahi hamotahula maheman be Ahu. ⁴⁷ Ta’ sa hamotahula meman asia nioho mbewati’nga kelembisa hamotahula maheman asia mbehuaHu?