¹ Kamotahula a talewe imatem apa-apaan i manga kalawahan bo manga katoronu. ² Kamotahula imenonow a sakumen i’ aho paa-apaan kamotahula makiit a tutul i mbaoi toba i’ai, apa-apaan kamutahula hahi behatebe a mahaibahut, i pakolanoan ambao i langit, awo aho tutuh e nia’ talewe metawo-tawoi ena a tutud i manga totumu malawah. ³ Kaulinana a talewe, pahasa kamitahula hahi behatebe a tutud i latahula a tepo hamitahula menonow a padung i kahetedan bo uteh i hamitahula tapia. Asaneana kamitahula awahem mangatotumu e’ musti ahii’ toro sa tahi’i i bororo, kelehahi tow walina. ⁴ Sumata Ningumeled e kahamangan apa-apaan i kahakoan i mbelesNa e mbeusa’Nga we hita. ⁵ Imawatowen ihita karuru i mbeles kohomba bewawa-lowid, ⁶ bo sakum i Kristus Yesus sia maleng kahi mawatow ihita bo imehe tanpa koruru Na a kaumbungan Sorga. ⁷ Saniboho e nendo malengai tumuru sia we hita kahakoan i mbeles kohombaNa eniit io tado’o kumi’it a kamaulengaNa be hita sakum si Kristus Yesus. ⁸ Nde napa’an i mbeles kohomba kamutahula be wawawia i kawaheman wa’aho hi’i bua i pinongikaan’nu sumata komba i Ningumeled, ⁹ wa ‘aho hi’i bua i pinatawoiNu nade bana totumu manombong i mbabatangan. ¹⁰ Apa-apaan kita bengeled i Ningumeled, pinogimano asakum si Yesus Kristus tanu tumulid i tatawoi mauleng, e ndali’im sinadia i Ningumeled a pahamunan. Padunga saniboho hita menonow biboho. ¹¹ Kawaliani aho i munenange awahem a talewe kamotahula hele mangatotumu hi’i Yahudi lumas, e pato’ton mangato tumu hi’i mahasunat ilatahula e mangalan silatahula mio sunat, a waaho sunat a mbatangan e tinawoi i kama i tatomu. ¹² A tepo wa’aho kamotahula a hem si Kristus, ahi’i sumua-suanga a tow i Israel bo ahi’i mahaere a mbaoitoba. ¹³ Sumata i’ndaha ai talewe be si Yesus kamutahula e ndekang a talewe be wawa susutem i ndaha i Kristus. ¹⁴ Nde si sia sononoi enow ihita, e nimawaesam i ndu weta ,nimawaweletem beton imawatered, awaaho pekasehedean. ¹⁵ Apa’an karengan i pawatena kele totumu ihumelongen sia ilala’ut Torat teka i pahasa pereta bo apaan wa’aho mehe sononoi enow. ¹⁶ Bo mawa sononoi silatahula dua tabiat a nesa batangan, bo Ningumeled i kalawat, tekad a batangan, bo Ningumeled i kalawat teka mawatalo i papesaruan bi boho a kalawat. ¹⁷ Imahi sia bo mawa sahai isononoi enow be homotahula e na ndekang bo mawa sononoi enow e nasusut. ¹⁸ Nde napa’an si sia kita i na ndua mbeta,a nesa tutuh maharere tutulen moho a Namang. ¹⁹ Kalewetan kamotahula alam kahi totumu asing bo bati imahi, sumata karuan pekaroongan i, manga totumu lenas bo sangandahem i Ningumeled. ²⁰ E tinod besane a moro Rrasul sisiu bo moro Nabi teka si Yesus mainjo hele batu tumeh batu du’una. ²¹ Besia homotahula pahasa toden, lo’or liu-liusunan, mamoali bata i Ningumeled lenas be si Nigumeled tow. ²² Be sia homotahula karua be wawatod mamoali tampa utunan (pahutunan) i Ningumeled a sakum tutuh.