¹ Katoroan si Yesus nu rumou’mi witu em Bait ni Empung, siesa murid-Na si limila’ wia-Nisia: “Guru, loo’onouw kumura eng kate’etepna em batu-batu i ti’i wo kumura eng kamega’anna eng gedung-gedung i ti’i !” ² Laa o lumila si Yesus wia nisia: “Loo’onnu eng gedung-gedung hebat i yi’i? Reiy’la siesa watu tu’u e laa i wayala rumeta’ witu natas em batu walina, em baya nyi’a e laa i ronga’la.” ³ Katoroan si Yesus nu rimuber witu natas eng kakenturan Zaitun, minesaruan ampit em Bait ni Empung, Petrus, Yakobus, Yohanes wo si Andreas se minueiy sandiri wia-Nisia: ⁴ “I lila’momi wia nikeiy, sakawisa ku’a re’en e ni’itu laa mamuali, wo sapa ku’a re’en eng kowa’na, sa em baya nyi’a i ti’i e laa i ka’ayola witu eng kesampetanna.” ⁵ Takar muleiy mouw si Yesus lumila’ wia nisea: “Tumeghamouw rio te’a wawean tou si sumeipla nikouw! ⁶ Laa meiy kelaker se tou ampit mepake e ngaran-Ku wo lumila’: Niaku mouw Sia, wo nisea se laa sumeipla laker tou. ⁷ Wo sakawisa kouw luminga e nederan em perang ka’apa e naba-abar em perang, te’a mouw kouw balisa, em baya nyi’a i ti’i e lewo’ sa reiy’ mamuali, ta’an e ni’itu reiy’pe’ eng kesampetanna. ⁸ Karengan se bangsa se laa tumo’or sumaru se bangsa wo eng keraja’an sumaru eng keraja’an. E laa mamuali em pengero’ wia e reiy’ sa mina’asa tampa, wo e laa wawean kelalenan. Em baya ni’itu en tare mouw i te ketarean em peme’itan melelaa en zaman weru. ⁹ Ta’an nikouw i yi’i, maato-ato mouw! Nikouw kouw laa i sarakan wia se majelis agama wo nikouw kouw laa wewen witu e wale ibadat wo nikouw kouw laa i sarula witu en sinaru ne penguasa-penguasa wo ne raja-raja kaa Niaku, en tanume eng kasairian i wee nisea. ¹⁰ Ta’an e Injil e lewo’ sa reiy’ i abarla rerior wia em baya ne bangsa. ¹¹ Wo sa kouw rawiren wo i sarakanla, te’a mouw kouw lieiy sa sapa e lewo’ sa reiy’ i lila’ miouwla, ta’an i lila’mola sapa e neiy i karuniala wia nikoo witu i te en toro ni’itu kangkasi, karengan reiy’ nikoo si meila-ila’ ta’an i te e Roh Kudus. ¹² Siesa patuari si laa sumarakan si patuarina kaa laa wunu’un, tuanakan kangkasi siesa ama’ wia si oki’na. Wo se oki-oki’ se laa rumangu wia se tu’ana wo laa munu’ nisea. ¹³ Nikouw kouw laa i kari’iris em baya ne tou karengan e ngaran-Ku. Ta’an sitou timaang i ka’ayo witu eng kesampetanna nisia si laa melawir.” ¹⁴ “Sakawisa kouw lumoo’ si Mememuneng lewo’ rimedeiy witu en tampa reiy’ kewaarna – em baya ne mememaca satorona se meela ghenang nyi’a – takar se tou-tou waki Yudea se lewo’ sa reiy’ mouw tumingkasla waki kakuntungan. ¹⁵ Sitou kasuatan witu em paroisan witu natas em bale te’a mouw sia metetumpa wo ghumorem kaa laa ma’edo wo’o sapa witu em balena, ¹⁶ wo se tou waki uma te’a mouw sia mareng kaa ma’edo em pakeanna. ¹⁷ 17 Cilaka mouw se ina-ina’ megandong ka’apa se matoto’la si dadeoki witu e masa i ti’i. ¹⁸ 18 Sumombayangouw, rio em baya nyi’a i ti’i te’a mamuali witu e noras eng ge’egher. ¹⁹ 19 Karengan witu e masa ni’itu e laa mamuali siksa’an tanu e reiy’pe’ ma’an mekasa mamualila rengane’ eng ketareanna eng kaoatan, en siniwola ni Empung, i ka’ayomi en teakan wo e reiy’ mouw laa mamuali kasi. ²⁰ 20 Wo sa wona’na si Tuhan si reiy’ minapapototla e nedona, takar waki se reiy’ sa mina’asa matou-tou reiy’ laa wawean si melawir; ta’an kaa eng karengan se tou-tou pineleng se pineleng-Na mola, Tuhan si minapapototla e nedona. ²¹ Witu e nedo ni’itu sa sitou lumila’la wia nikoo: Loo’on, si Mesias si waki ti’ime, te’a kouw ma’eman. ²² Karengan se Mesias-mesias palsu wo se nabi-nabi palsu se laa modol wo nisea se laa tumuanala eng kowa’-kowa’ wo e mujizat-mujizat ampit e maksud, satorona wona’, sumeipla se tou-tou pinelengla. ²³ Maato-ato mouw kouw! Niaku ku kimetare mola limila’la em baya nyi’a i yi’i wia nikouw.” ²⁴ Ta’an witu e masa ni’itu, nu reiy’ mouw en siksa’an i ti’i, si endo si laa mareiydem wo si sumendot si reiy’ sumena’ ²⁵ wo se sumesena’-sumesena’ se laa mera’araghi waki langit, wo eng kuasa-kuasa langit e laa moghe. ²⁶ Witu en toro ni’itu se tou se laa lumoo’ si Oki’ ni Tou si meiy witu e linaak-linaak ampit e reiy’ sa mina’asa kakuasa’an wo eng kamulia’an-Na. ²⁷ Wo witu e nedo ni’itu tu’u Nisia si laa rumeo rumou’mi se malaikat-malaikat-Na wo laa merurla se tou-tou pineleng-Na waki epat ruuna em bumi, waki tempok em bumi i ka’ayo waki tempok e langit. ²⁸ Medo mouw teturu’ witu em peulurela tanume e nakana ara. Sakawisa em pangana-pangana rumewo’ wo muleiy masuru, kete’uan niouw, kaa noras ra’ar en tawi mouw. ²⁹ Tuanakan kangkasi, sa kouw lumoo’ eng kapualitan-kapualitan i ti’i mamuali, kete’uanola kaa e nedona en tawi mouw, witu mouw en sinaru em pepalen. ³⁰ Niaku ku lumila’me wia nikoo: Eng kaulitna se angkatan i yi’i se reiy’ laa lumangkoiy, nu reiy’pe’ em baya nyi’a i ti’i mamuali. ³¹ Langit wo em bumi e laa lumangkoiy, ta’an em patotor-Ku e reiy’ laa lumangkoiy. ³² Ta’an tanume e nendo ka’apa e nedo ni’itu e reiy’ siesa tou tu’u si mete’u, se malaikat-malaikat waki sorga reiy’, wo si Oki’ tu’u reiy’, si Ama’ i te.” ³³ “Maato-ato mouw wo mategha-teghamouw! Karengan nikouw kouw reiy’ mete’u sakawisa ku’a re’en e nedona ma’ayomi. ³⁴ Wo eng kapualitanna masuat en tanu siesa tou si minea, si timele’ula em balena wo sumarakan en tanggong jawab wia se hamba-hambana, siesa o siesa ampitouw e lukarna, wo minerentala si tumetayur em pepalen rio mategha-tegham. ³⁵ Kaa ni’itu mategha-teghamouw, karengan nikouw kouw reiy’ mete’u sakawisa ku’a re’en si mekewale i ti’i o marengi, melelaa wengi, ka’apa maparua em bengi, ka’apa kasa wengi, ka’apa memo’odope’ kasa, ³⁶ rio sa sia i kalo’ositi meiy te’a o kouw atonna timekel. ³⁷ Sapa em peila’-Kula wia nikoo, em peila’-Kula wia em baya ne tou: mategha-teghamouw!”