¹ O laa si Yesus si muleiy mouw sumusuiy wia nisea witu em peulurela: “Wawean siesa tou si minuka’ e numa anggor wo rumeen eng kaledongna. Sia kumiar eng ko’okor papuusan e nanggor wo rumedeiyla em pewale. Kamurian i eramnala e numa i ti’i wia se mengenguma-mengenguma laa o mea waki wanua walina. ² Wo eng katoroan witu mouw e norasna, sia rumeo siesa hamba mea wia se mengenguma-mengenguma i ti’i kaa laa maka’ato esa nga weteng witu e wua’na e numa i ti’i wia nisea. ³ Ta’an nisea se simikop si hamba i ti’i wo mewe nisia, laa o rumeo nisia mea ampit e lawas memayos. ⁴ Kamurian sia rumeo kangkasi siesa hamba walina wia nisea. Sitou i yi’i si winewe nea i ka’ayo minepali’ eng kokongna wo kasa neiy nea i papaira-irangla. ⁵ Laa o sia rumeo siesa hamba walina kasi, wo sitou i yi’i si winunu’ nea. Wo lakere’ kasi se walina, wawean si winewe nea wo wawean si winunu’ nea. ⁶ Teakan siesa mokan oki’na si i keupusna. Mamuri sia rumeo nisia wia nisea, pokeiyna: Sioki’ku si laa ormaten neala. ⁷ Ta’an se mengenguma-mengenguma i ti’i se limila siesa wia se walina: Nisia mouw si ahli waris, meiy mouw sia wunu’un ta, takar e warisan i yi’i mamuali punyata. ⁸ Nisea se simikop nisia wo munu’ nisia, laa o i lawala sia witu luar e numa anggor i ti’i. ⁹ Teakan sapa e laa tuananla ni makauma anggor i ti’i? Nisia si laa meiy wo munengla se mengenguma-mengenguma i ti’i, laa o mapa emanla e numa anggor i ti’i wia se tou-tou walina. ¹⁰ Reiy’ ma’an mekasa ku’a re’en kouw maca e nats i yi’i: Watu neiy i terek ne meneniwo-meneniwo bangunan e minamuali mouw watu penjuru: ¹¹ eng kapualitan i ti’i minamuali waki suat ni Tuhan, e nesa pasiwo-siwon maka’erangen witu em beren ta.” ¹² Laa o sea me’inakut mesesikop si Yesus, karengan nisea se mete’u, kaa nisea mouw se i pemaksud-Nala ampit em peulurela i ti’i. Ta’an nisea se meide’ wia se tou kelaker, jadi sea mea wo mayala Nisia. ¹³ Kamurian i reomi se pirala tou Farisi wo se tou Herodian wia si Yesus kaa meiy mewewe’etes Nisia ampit e nesa wewueiyen. ¹⁴ Se tou-tou i ti’i se mineiy wo lumila’ wia-Nisia: “Guru, nikeiy keiy mete’u, Nikoo koo esa tou jujur, wo Nikoo koo reiy’ meide’ wia si seiy i te tu’u kangkasi, karengan Nikoo koo reiy’ pa’ar mengisu-ngisu’, ta’an i te ampit en jujur mawee teturu’ e lalan ni Empung ampit e reiy’ sa mina’asa kajujuran. Sapa ku’a re’en ni’i wee i te mawear em pajak wia si Kaisar ka’apa reiy’? Lewo’ sa reiy’ku’a re’en keiy mear ka’apa reiy’?” ¹⁵ Ta’an si Yesus si mete’u eng kamunafikan nea, laa o lumila’ wia nisea: “Ka’a kouw mewa’awa’ Niaku? Alinomi e nesa dinar rio tu loo’eng-Kula!” ¹⁶ Laa o sea malila. Takar Sia mueiy wia nisea: “Eng gambar wo em patik ni seiy ku’a re’en e nyi’i?” Wingkot nea: “Eng gambar wo em patik ni Kaisar.” ¹⁷ Laa o pokeiy ni Yesus wia nisea: “I wee mola wia si Kaisar sapa e lewo’ sa reiy i wee miouwla wia si Kaisar wo wia si Empung sapa e lewo’ sa reiy’ i wee miouwla wia si Empung!” Nisea se kasa mina’erang liminga Nisia. ¹⁸ Meiy mouw wia si Yesus se pirala tou Saduki, se maka ghenang, kaa reiy’la eng kato’oran. Nisea se minueiy wia-Nisia: ¹⁹ “Guru, Musa si minatikla em perenta i yi’i i wee nikita: Sa siesa tou, si maka patuari tuama, si minate ampit si timele’ula siesa tu’awewene ta’an si reiy’ timele’ula urang, patuarina si lewo’ sa reiy’ kumaweng ampit si tu’awewenena i ti’i wo meteto’ori see’ i wee si patuarina i ti’i. ²⁰ 20 Nisea se pitu matuari. Si ketare si kimaweng ampit siesa wewene wo mate si reiy’ timele’ula see’. ²¹ 21 Laa o si karua kangkasi si kimawengla nisia wo mate si reiy’ timele’ula see’. Tuanakan kangkasi ampit si katelu. ²² 22 Wo tuana mouw se katodongna, nisea nu pitu se reiy’ timele’ula see’. Wo eng kamurian, nu reiy’ mouw sea nu waya, si wewene i ti’i tu’u si minate. ²³ 23 Witu e nendo nu to’oren, sakawisa sea tumo’or, seiy ku’a re’en si minamuali tu’atuama ni wewene i ti’i? Karengan nisea nu pitu se timu’awewene mola nisia.” ²⁴ Wingkot ni Yesus wia nisea: “Nikouw kouw seip, eng kaulitna kaa nikouw kouw reiy’ mangarti eng Kaol Suci ka’apa tu’u eng kuasa ni Empung. ²⁵ Karengan sakawisa sitou tumo’or witu e nelet ne tou minate, sitou si reiy’ kimaweng wo reiy’ neiy i kawengla ta’an i te matou-tou tanu si malaikat waki sorga. ²⁶ Wo kangkasi en tanume eng keteto’or ne tou-tou minate, reiy’ ku’a re’en winaca miouw witu eng kaol ni Musa, witu e numan tanume eng kongkom tetunean, kumura lininga e nuwu’ ni Empung wia nisia: Niaku mouw Ku Empung ni Abraham, Empung ni Ishak wo Empung ni Yakub? ²⁷ Nisia si reiy’ mouw Empung ne tou minate, ta’an i te si Empung ne tou matou-tou. Nikouw kouw uli-ulit simeip!” ²⁸ O laa siesa ahli Taurat, liminga si Yesus wo se tou-tou Saduki mewewueiyan wo mete’u, kaa si Yesus si minee wewingkot en timena’ wia se tou-tou i ti’i, si mineiy wia-Nisia wo mueiy: “E nukum wisa ku’a re’en eng kasa i paketa-ketare?” ²⁹ Wingkot ni Yesus: “E nukum kasa i paketa-ketare nyi’a mouw: Linganouw, heiy tou Israel, Tuhan si Empung ta, Tuhan i ti’i si esa. ³⁰ I keupusola si Tuhan, Empungmu, ampit em pakasa’an e natemu wo ampit em pakasa’an ni imukurmu wo ampit em pakasa’an eng genangmu wo ampit em pakasa’an eng kaketerannu. ³¹ Wo e nukum eng karua nyi’a mouw: I keupusola si kasuatmu en tou tanukan en toumu nuesa. Reiy’la ukum walina eng kasa i paketa-ketare ta’an i te e rua ukum i yi’i.” ³² Laa o pokeiy ni ahli Taurat i ti’i wia si Yesus: “Eng kasa timena’, Guru, e nulit em pokeiy-Mu i ti’i’, kaa Nisia siesa, wo kaa reiy’la si walina kacuali Nisia. ³³ Memang meupusla Nisia ampit em pakasa’an e nate wo ampit em pakasa’an eng genang wo ampit em pakasa’an eng kaketeran, wo kangkasi meupusla si kasuat en tou tanukan en tou nuesa nyi’a mouw e wa’akat kasa i paketa-ketare ta’an i te em baya en tetule tinunu wo en tetule rineret.” ³⁴ Yesus si limoo’, kumura en sama’na e wewingkot ni tou i ti’i, wo Sia lumila’ wia nisia: “Nikoo koo reiy’ wa’akat witu eng Keraja’an ni Empung!” Wo siesa tou tu’u si reiy’ mouw berani kasi mueiyla wo’o sapa wia si Yesus. ³⁵ Witu e mekasa katoroan si Yesus nu mawee teturu’ witu em Bait ni Empung, Sia lumila’: “Kumura se ahli-ahli Taurat o toro lumila’la, kaa si Mesias nyi’a mouw si oki’ ni Daud? ³⁶ Si Daud nuesa kaa em pa’aka-aka’an ni Roh Kudus si limila’: Tuhan si minee mola nuwu’ wia si Tuangku: rumuberola witu esa nga weka lele’os-Ku i ka’ayo se kesaru-kesaru-Mu se i reta’-Ku witu wawa’ e ne’a-Mu. ³⁷ Si Daud nuesa si matotor Nisia si Tuangna, kumura mouw wona’ o Sia oki’na kangkasi? Se tou kelaker se ka’asa’an eng kelakerna se malingala Nisia ampit minawuta em pa’ar. ³⁸ Witu eng kapawee-Na teturu’ Yesus si limila’: “Maato-ato mouw wia se ahli-ahli Taurat se pa’ar mengela-ngelang minake eng karaiy labot wo se pa’ar maka’ato eng kaormatan waki pasar, ³⁹ se pa’ar maruber witu en tampa kasa muka witu e wale ibadat wo witu en tampa kasa paormaten witu em pesakeiyan, ⁴⁰ se nime’enep em bale ne balu-balu, kasuatan sea nu limi’ibusla em beren ne tou ampit en sesombayangen labo-labot. Nisea i yi’i tantu mouw se laa maka’ato e nukuman lebe wuter.” ⁴¹ Witu e mekasa Yesus si rimuber simarula em piti sesempean wo maweela ghenang kumura se tou kelaker maghoremla e loit witu eng gorem em piti i ti’i. Laker se tou kaya se mawee eng kelaker. ⁴² Laa o meiy mouw siesa balu miskin wo sia ghumoremla rua peser, nyi’a i ti’i e nesa loit. ⁴³ Takar kineret-Na se murid-murid-Na wo lumila’ wia nisea: “Niaku ku lumila’me wia nikoo, eng kaulitna si balu miskin i yi’i si minee e lumantouwla eng kelaker ta’an em baya ne tou se ghimoremla e loit witu eng gorem em piti sesempean. ⁴⁴ Karengan nisea nu waya se minee witu eng kalokonan nea, ta’an si balu i yi’i si minee witu eng kareiy’awesanna, em baya em bia nisia, nyi’a i ti’i e minapekasa em bene’na.”