¹ Katoroan e nendo maoatouw, em baya ne imam kepala wo se tua-tua ne bangsa Yahudi minerur wo medo kaputusan kaa laa mewewunu’ si Yesus. ² Nisea se timorongku Nisia, laa o mali-Nisia wo sumarakan-Nisia wia si Pilatus, wali em banua i ti’i. ³ Witu eng katoroan si Yudas, si simarakan-Nisia, limoo’, kaa si yesus pinutusanouw e nukuman paten, meneselouw sia. Laa o warengnala e loit telu nga pulu’ perak i ti’i wia se imam-imam kepala wo se tua-tua, ⁴ wo lumila: “Niaku ku minaberdosa mouw karengan simarakan e raa’ nitou reiy’ si selok.” Ta’an wingkot nea: “Sapa e nurusan neiy ampit e ni’itu? Ni’itu nurusannu nuesa!” ⁵ Takar sia tu’u si limawala e loit perak i ti’i witu eng gorem em Bait Suci, laa o rumeu’la witu, wo rumantong. ⁶ Imam-imam kepala minedo e loit perak i ti’i wo lumila’: “Reiy’ i wee megheghoremla e loit yi’i witu eng gorem em piti sesempean, karengan nyi’i e loit raa’.” ⁷ Sea nu rimundingola sea tumeles ampit e loit i ti’i en tana’ em patotoren Tana’ Sumesiwo Kure’ kaa em pesesiwon tampa pakuburan se tou wo’oseiy. ⁸ Kaa ni’itu mouw en tana’ i ti’i i ka’ayomi e nendo yi’i em patotoren Tana’ raa’. ⁹ Satuana lekepouw e nuwu’ neiy i pa’ayola ni nabi Yeremia: “Nisea se minaka’ato telu nga pulu’ loit perak, nyi’a i ti’i e narga neiy i tetapla i wee sitou i ki’it eng kenaramen witu e nelet ne tou Israel, ¹⁰ wo i wee neala e loit i ti’i i wee en tana’ ni sumesiwo kure’, tanu neiy i owerla ni Tuhan wia niaku.” ¹¹ Laa o i sarula si Yesus wia si wali em banua. Wo si wali em banua minueiy wia –Nisia: “Nikoo re’en koo raja ne tou Yahudi?” Wingkot ni Yesus: “Nikoo nuesa koo limila’la nyi’a.” ¹² Ta’an witu en teturean neiy i pa’ayola ne imam-imam kepala wo se tua-tua wia Nisia, Sia si reiy’ miningkot sapa tu’u. ¹³ Takar pokeiy ni Pilatus wia-Nisia: “Koo reiy’ re’en liminga kumura eng kelakerna en teturean ne sairi-sairi i yi’i wia Nikoo?” ¹⁴ Ta’an Nisia si reiy’ miningkot esa nga totor tu’u, i ka’ayo si wali em banua i ti’i si kasa mina’erang. ¹⁵ Minamuali mouw kenaramen wia si wali em banua kaa mewewayala siesa tou ukuman witu en susur nendo wangko’ i ti’i i ki’it em pineleng ne laker tou. ¹⁶ Wo witu en toro ni’itu wawean witu eng gorem penjara siesa tou si kasa mouw kasine’uan eng kalewo’anna si mekengaran Yesus Barabas. ¹⁷ Karengan nisea se minerurouw maname, si Pilatus limila’ wia nisea: “Seiy si kepa’ar miouw i wayakula i wee nikouw, Yesus Barabas ka’apa Yesus, si patotoren Kristus?” ¹⁸ Sia si memang mete’u mouw, kaa nisea se simarakanola si Yesus karengan en dengki. ¹⁹ Katoroan si Pilatus rimuber witu eng kadera paadilan, ka’awuna si minapa’ali e nower wia nisia: “Te’a koo mesesewokla eng kapualitan ni tou ulit i ti’i, karengan kaa Nisia niaku ku kasa peme’itan witu e nipi eng kawengi.” ²⁰ Ta’an kaa e nule ne imam-imam kepala wo ne tua-tua, se tou kelaker se me’inakut mekekiwee rio si Barnabas si i wayala wo si Yesus si ukumen paten. ²¹ Wali em banua miningkot wo lumila’ wia nisea: “Seiy si witu e nelet ne rua tou i ti’i si kepa’ar miouw i wayakula i wee nikouw?” Pokeiy nea: “Barabas.” ²² Pokeiy ni Pilatus wia nisea: “Satuana, sapa re’en e lewo’ sa reiy laa ku siwon wia si Yesus, si patotoren Kristus?” Sea nu waya se minaleiy: “Sia si lewo’ sa reiy’ i salibela!” ²³ Pokeiyna: “Ta’an eng kalewo’an sapa re’en en siniwo-Nala?” Ta’an nisea se maka ente’ mola maaleiy: “Nisia si lewo’ sa reiy’ i salibela!” ²⁴ Katoroan si Pilatus limoo’ kaa e reiy’ sa mina’asa pe’inakuten e laa maghio, awesla mamuleiy mouw malentut eng kekaceuan, sia medo rano wo rumano witu en sinaru ne tou kelaker wo lumila’: “Niaku ku reiy’ si selok witu e raa’ ni tou yi’i; ni’itu e nurusan niouw nuesa!” ²⁵ Wo se pakasa’an rakyat i ti’i se miningkot: “Ma’anouw e raa’-Na i pesa’anla wia nikeiy wo wia se urang-urang meiy!” ²⁶ Laa o sia i wayanala si Barabas i wee nisea, ta’an si Yesus winewena laa o i sarakannala kaa si laa pesesalibla. ²⁷ Kamurian se suraro-suraro wali em banua minali si Yesus witu eng gedung paadilan, laa o kumeret se pakasa’an pasukan merur lumedong si Yesus. ²⁸ Nisea se limengatela e labung-Na wo tumodongla eng karaiy buwung wia-Nisia. ²⁹ Nisea se minayamla e mahkota tetunean wo rumeta’la nyi’a witu e natas eng kokong-Na, laa o meela Nisia esa nge wa’atang tabelang witu e lawas lele’os-Na. Kamurian sea kumudu witu en sinaru-Na wo menero-nero’la wia Nisia, pokeiy nea: Tabea, heiy raja ne tou Yahudi!” ³⁰ Nisea se rimura’la-Nisia wo medo en tabelang i ti’i wo i wewe neala nyi’a witu eng kokong-Na. ³¹ Nu reiy’ mouw sea nu mine nero-nero’la wia Nisia lengaten neala eng karaiy i ti’i wia-Nisia wo i todongla kasi e labung-Na wia-Nisia. Kamurian sea mali Nisia rumou’ kaa si’i pesesalibla. ³² Katoroan sea nu makelang mea waki luar kota, sea masungkul si esa tou waki Kirene si mewali-wali si Simon. Sitou i ti’i si paketeran nea mesa’an en salib ni Yesus. ³³ Takar ma’ayo mouw sea witu e nesa tampa mekengaran Golgota, em penoronna: Tampa en tereuka’. ³⁴ Laa o weean nea kumoo’ Sia e nanggor sinewok em peru. Sia nu mine’anola nyi’a, Nisia si so’o mouw kumoo’ nyi’a. ³⁵ Nu reiy’ mouw sea nu simalibla Nisia sea memete-meteng e labung-Na ampit makoba’. ³⁶ Laa o sea rumuber witu timayur wia Nisia. ³⁷ Wo witu e natas eng kokong-Na em pinatikan en timotor e nalasan ka’a Sia niukum: “Yi’i mouw si Yesus si Raja ne Tou Yahudi.” ³⁸ Mewali-wali ampit Nisia neiy i salibla se rua tou penyamun, siesa witu esa nga weka lele’os wo siesa witu esa nga weka kawii-Na. ³⁹ Tou-tou se melangkoiy maname se maojat Nisia wo makuyungla eng kokong, ⁴⁰ Nisea se meila’: “Heiy Koo si pa’ar mereronga’la em Bait Suci wo pa’ar mererediyla nyi’a sumeup witu en telu nga endo, lawirenola en tou-Mu sawona’ Koo Urang ni Empung, tumumpa momi witu en salib i ti’i!” ⁴¹ wia Nisia wo sea meila: ⁴² “Tou walina se linawir-Na, ta’an en tou-Na nuesa e reiy’ mete’u kelawiran-Na! Sia si Raja Israel? Le’osouw Sia tumumpami witu en salib i ti’i wo keiy laa ma’eman wia-Nisia. ⁴³ Sia si minee e narapan-Na wia si Empung: le’osouw si Empung si lumawirla Nisia, sa si Empung si mepa’arla wia-Nisia! Karengan Nisia si limila’ mouw: Niaku mouw ku Urang ni Empung.” ⁴⁴ Awes tare se penyamun-penyamun neiy i salibla mewali-wali ampit Nisia se masese’la-Nisia tuanakan kangkasi. ⁴⁵ 45 Muleiymi en jam dua belas eng kareiydeman simongkouwi e minapekasa en daerah i ti’i mina’ayo en jam tiga. ⁴⁶ 46 Wo’o wona’ jam tiga ma’aleiyouw si Yesus ampit eng kasa legu’: “Eli, Eli, lama sabakhtani?” Em penoronna: Empung-Ku, Empung-Ku, ka’a Koo tumele’ula Niaku?” ⁴⁷ 47 Liminga ni’itu, se pirala tou rimedeiy witu limila’: “Nisia si makeret si Elia.” ⁴⁸ Wo makarenganouw meiy siesa wia nisea; sia medo e wungang karang, sumosouwla nyi’a witu eng gorem nanggor esem, laa o tumude’la nyi’a witu e nesa wa’atang tabelang wo meela si Yesus kumoo’. ⁴⁹ Ta’an se tou-tou walina limila’: “Tea’, le’osouw loo’on ta, sapatare si Elia meiy kaa melelawirla Nisia.” ⁵⁰ Yesus si minaleiy kangkasi eng kasa legu’ laa o sumarakan e nyawa-Na. ⁵¹ Wo loo’onouw, en tabir Bait Suci minaparua waki atas mina’ayo em bawa’ wo mamuali mola em pengero’, wo eng kuntung-kuntung watu minakewe’, ⁵² wo eng kuburan-kuburan e minawuka’ wo laker se tou kudus minate mouw se timo’or. ⁵³ Wo nu reiy’ mouw eng kineteto’or ni Yesus, sea tu’u rumou’mi witu eng kubur, laa o ghumorem witu eng kota kudus wo mapa’atola en tetou wia se laker tou. ⁵⁴ Kepala pasukan wo se perajurit-perajuritna se timayur wia si Yesus se kasa mineide’ katoroan sea nu limoo’ em pengero’ wo sapa e minamuali mola, laa o lumila’: “Ulit, Nisia yi’i mouw si Urang ni Empung.” ⁵⁵ Wo wawean witu laker se wewene maloo’omi waki wa’akat, sea i ti’i se wewene-wewene se matode-todeiy wia si Yesus waki Galilea kaa melelayanela Nisia. ⁵⁶ Witu e nelet nea wawean si Maria Maghdalena, wo si Maria ina’ ni Yakobus wo ni Yusuf, wo si ina’ ne urang-urang ni Zebedeus. ⁵⁷ Melaa mouw em bengi meiy mouw siesa tou kaya, sitou Arimatea, si mekengaran Yusuf wo si minamuali mouw murid ni Yesus kangkasi. ⁵⁸ Sia mea sumaru si Pilatus wo kumiwee e mayat ni Yesus. Pilatus si minerentala laa sumarakanla nyi’a wia nisia. ⁵⁹ Wo si Yusuf tu’u medola e mayat i ti’i, kumafanla nyi’a ampit e roko’ lenan em puti’ weresi, ⁶⁰ laa o ghumoleiyla nyi’a witu eng kuburna weru, eng kiniarna witu eng gorem kuntung watu, wo nu reiy’ mouw e minolonla e nesa watu sela witu em pepalen eng kubur i ti’i, mea mouw sia. ⁶¹ Ta’an si Maria Magdalena wo se Maria walina minena’ witu rimuber witu en sinaru eng kubur i ti’i. ⁶² Kawo’odoanna, nyi’a i ti’i nu reiy mouw e nendo tiniro’an, meiy mouw se imam-imam kepala wo se tou-tou Farisi mewali-wali simaru si Pilatus, ⁶³ wo nisea se limila’: “Tuang, keiy ghimenang, kaa si sumeseip i ti’i witu Nisia nu matou-toupe’ si limila’: Ni’itu nu reiy’ mouw en telu nga endo Niaku ku laa tumo’or. ⁶⁴ Kaa ni’itu perentanola kaa laa metetayurela witu eng kubur i ti’i i ka’ayola e nendo katelu; sawona’ reiy’, se murid-murid-Na se wo’o wona’ meiy kaa meiy mererongkit Nisia, laa o lumila’la wia se rakyat : Sia si timo’orouw witu e nelet ne tou minate, i ka’ayo em paseipan kesampetan e laa makawurukla e mamuali ta’an eng ketare.” ⁶⁵ Pokeiy ni Pilatus wia nisea : “ Yi’i se tumetayur-tumetayur i wee nikoo, mea wo tayuranola eng kubur i ti’i makale’o-le’os.” ⁶⁶ Takar mea mouw sea wo ampit en sesawangan ne tumetayur-tumetayur i ti’i sea mee meterai eng kubur i ti’i wo tumayur witu.