¹ Ni’itu e nendo sabat nu limangkoiyouw, e laa mouw meiy e wuena witu e nendo ketare duminggu i ti’i, mea mouw si Maria Magdalena wo se Maria walina, mea lumoo’ eng kubur i ti’i. ² Takar mamuali mola em pengero’ kasa hebat ee pasil karengan siesa malaikat ni Tuhan timumpami waki langit wo meiy witu e watu i ti’i wo molonla nyi’a laa o rumuber witu e natasna. ³ Eng giona en tanu mokan eng kerap wo e labungna em puti’ tanu mokan en salju. ⁴ Wo se tumetayur-tumetayur i ti’i se kineide’an wo se minamuali tanu se tou-tou minate. ⁵ Ta’an si malaikat i ti’i limila’ wia se wewene-wewene i ti’i: “Te’a mouw kouw meide’; karengan eng kete’uanku kouw menero si Yesus si neiy i salibla i ti’i. ⁶ Sia si reiy’ wia nyi’i, karengan sia si timo’orouw, masuat tanu mouw e neiy i lila’-Nala. Meiy, loo’onouw en tampa Sia nu neiy i gholeiyla. ⁷ Wo makarenganouw mea wo i lila’ mola wia se murid-murid-Na kaa Nisia si timo’orouw witu e nelet ne tou minate. Sia si rimeriorola wia nikouw mea waki Galilea; maname kouw laa lumoo’ Nisia. Kaulitna niaku ku limila mola nyi’a wia nikouw.” ⁸ Nisea se makarengan rumou’mi witu eng kubur i ti’i, ampit e nide’ wo ampit mepa’a-pa’ar wangko’ wo tumingkas rimepe-repet kaa laa makite’ula nyi’a wia se murid-murid ni Yesus. ⁹ I kasenge’mi si Yesus si minasungkulouw ampit nisea wo lumila’: “Tabea wia nikouw.” Nisea se rimetenla- Nisia wo rumawak e ne’a-Na ampit simempe-Nisia. ¹⁰ Takar pokeiy ni Yesus wia nisea: “Te’a meide’. Mea wo i lila’ mola wia se patuari-patuari-Ku, rio sea mea waki Galilea, wo mana mouw sea laa lumoo’ Niaku.” ¹¹ Katoroan sea nu witu e nuner lalan, meiy mouw se pirala tou wia se tumetayur i ti’i meiy waki kota wo makite’ula e reiy’ sa mina’asa minamualila i ti’i wia se imam-imam kepala. ¹² Wo sea nu rimundingola ampit se tua-tua, nisea se minedo kaputusan laa o meela e loit kasa laker wia se suraro-suraro i ti’i ¹³ wo lumila’: “Nikouw kouw lewo’ sa reiy lumila’la, kaa se murid-murid-Na se mineiy mawengi-wengi wo rumongkit-Nisia katoroan kouw nu timekel. ¹⁴ Wo sakawisa eng kapualitan yi’i kalinga’an ne wali em banua, nikeiy keiy laa sumusuiy ampit nisea, i ka’ayo kouw reiy’ maka’ato kasulitan sapa-sapa.” ¹⁵ Nisea se minaka’ato e loit i ti’i wo sumiwo tanu e neiy i owerla wia nisea. Wo e ne’umanen i yi’i e rimangket witu e nelet ne tou Yahudi i ka’ayo en teakan yi’i. ¹⁶ Wo se mapulu’ o rua murid i ti’i mea waki Galilea, waki kuntung e neiy mouw i tudu’la ni Yesus wia nisea. ¹⁷ Katoroan nu limoo’ Nisia nisea se simempe-Nisia, ta’an se pirala tou se meware-wareng. ¹⁸ Yesus si simusutla nisea wo lumila’: “Wia-Niaku e neiy mouw i weela e reiy’ sa mina’asa kuasa waki sorga wo wia em bumi. ¹⁹ Kaa ni’itu mea mouw, siwonola em baya ne bangsa murid-Ku wo baptisela sea witu e ngaran ni Ama’ wo ni Oki’ wo e Roh Kudus, ²⁰ wo turu’unouw sea matuanala e reiy’ sa mina’asa wo’o sapa e neiy Ku mouw i perentala wia nikoo. Wo kete’uanola, Niaku ku rumapitela nikouw reiy’ si ena’na i ka’ayo witu eng kesampetan zaman.”