¹ Si yesus nu simampetouw ampit e reiy’ sa mina’asa teturu’-Na i ti’i, lumila’ mouw Sia wia se murid-murid-Na: ² “Kouw mete’u, kaa e ruape’ nga endo kasi en siwonouw em Paskah, takar si Oki’ ni Tou si laa i sarakan kaa si pesesalibela.” ³ Witu en toro ni’itu merurola se imam-imam kepala wo se tu’a-tu’a ne bangsa Yahudi waki istana ni Imam Wangko’ si mekengaran Kayafas, ⁴ wo sea rumundingla e nesa rencana kaa mese sikop si Yesus ampit em biles kawilesan wo kaa mewewunu’ Nisia. ⁵ Ta’an nisea se limila’: “Te’a witu e nedo kesesiwo em Paskah, rio te’a lumentut eng karungkaran witu e nelet ne rakyat.” ⁶ Katoroan si Yesus si waki Betania, witu em bale ni Simon si kusta, ⁷ meiy mouw si esa wewene wia-Nisia maali-ali e nesa buli-buli pualam pinumpunan e lana wangi eng kasa maal, Lana i ti’i neiy i toa’nala witu e natas eng kokong ni Yesus, si rimuber mekaan. ⁸ Limoo’ ni’itu se murid-murid se meupi’ wo lumila’: “Edon sapa em peghio-ghion i yi’i? ⁹ Karengan e lana i ti’i en toro i wangker maal wo e loitna en toro i weela wia se tou-tou miskin.” ¹⁰ Ta’an si Yesus si mete’u eng genang nea, laa o lumila’: “Ka’a kouw mesesusahla si wewene yi’i? Karengan nisia si simiwo mola e nesa pasiwo-siwon le’os wia-Niaku. ¹¹ Karengan se tou-tou miskin se re’eregh wia nikoo, ta’an Niaku ku reiy’ laa re’eregh mewali-wali nikouw. ¹² Karengan ampit en timoa’la e lana i ti’i witu e nouwak-Ku, sia si simiwo mola e nesa tetiro’an kaa em pekekuburan-Niaku. ¹³ Niaku lumila’me wia nikoo: Kaulitna wisa i te injil yi’i neiy i abarla wia em pakasa’an eng kaoatan, sapa en tinuananala yi’i e laa totoren kangkasi kaa laa ghumenang nisia.” ¹⁴ Kamurian mea mouw siesa tou wia se mapulu’ o rua murid i ti’i, si mekengaran Yudas Iskariot, wia se imam-imam kepala. ¹⁵ Sia lumila’: “Sapa e laa i weemula wia niaku, rio ku sumarakanla Nisia wia nikouw?” Nisea se minear telu nga pulu’ loit perak wia nisia. ¹⁶ Wo rengan en nedo ni’itu sia si menero-nero e nedo le’os kaa laa sumarakan si Yesus. ¹⁷ Witu e nendo ketare nendo wangko’ Roti Reiy’ Siragi meiy mouw se murid-murid ni Yesus wia-Nisia wo lumila’ : “ Wisa eng kepa’aran-Nu tiro’an neiyla sesakeiyan Paskah i wee Nikoo ?” ¹⁸ Wingkot ni Yesus : “ Mea mouw waki kota wia si Anu wo i lila’la wia nisia : Nge’enge’ ni Guru : Nedo-Ku en tawi mouw i ka’ayo; witu mouw eng gorem em bale mu Niaku ku pa’ar mewewangko’la em Paskah mewali-wali ampit se murid-murid-Ku.” ¹⁹ Laa se murid-murid-Na se timuanala tanu e neiy i tokela ni Yesus wia nisea wo metetiro’la em Paskah. ²⁰ Ni’itu nu wengi mouw, Yesus si rimuber mekaan mewali-wali ampit se mapulu’ o rua murid i ti’i. ²¹ Wo katoroan sea nu mekaan, Sia lumila’: “Niaku lumila’me wia nikoo, kaulitna siesa witu e nelet miouw si laa sumarakan Niaku.” ²² Wo ampit e nate kasa susah lumila’ mouw sea siesa o siesa wia-Nisia : “ Reiy’ niaku, ee Tuhan?” ²³ Sia mingkot : “ Sia si mewali-wali ampit Niaku simosouwla e lawasna witu em pinggan yi’i, sia mow si laa sumarakan Niaku. ²⁴ Oki’ ni Tou memang si laa mea minatoroan ampit e neiy i patik tanume Nisia, ta’an cilaka mouw sitou kaa nisia si Oki’ ni Tou i ti’i i sarakan. Eng kasa mouw le’os wia si tou i ti’i wo’o wona’ sia reiy’ neiy i patoula.” ²⁵ Yudas, si laa mesesarakan Nisia i ti’i miningkot, pokeiyna: “Reiy’ niaku, ee Rabi?” Pokeiy ni Yesus wia nisia: “Nikoo koo limila’ mola nyi’a.” ²⁶ Wo katoroan sea nu mekaan, Yesus minedomi roti, tumotorla em berkat, mengebi-ngebi’la nyi’a laa o meela nyi’a wia se murid-murid-Na wo lumila’: “Edonouw, kaanenouw, nyi’i mouw e nouwak-Ku.” ²⁷ Nu reiy’ mouw i tu Sia medola en cawan, tumotorla syukur laa o meela nyi’a wia nisea wo lumila’: “Koo’onouw, kouw nu waya, wia en cawan yi’i. ²⁸ Karengan e nyi’i mouw e raa’-Ku, e raa’ tata’aran, e neiy i toa’ i wee se laker tou kaa em paampungan en dosa. ²⁹ Ta’an Niaku lumila’me wia nikoo: muleiy i temi teakan Niaku ku reiy’ mouw kasi laa kumoo’ e wua’ nakana anggor yi’i i ka’ayo witu nendo Niaku kumoo’ nyi’a, nyi’a i ti’i em beru, mewali-wali ampit nikouw witu eng Keraja’an ni Ama-Ku.” ³⁰ Sea nu kimantarola eng kekantaren pujian, mea mouw si Yesus wo se murid-murid-Na waki Kuntung Zaitun. ³¹ Takar lumila’ mouw si Yesus wia nisea: “Wengi yi’i kouw nu waya e laa i kaoghe imanmu kaa Niaku. Karengan wawean neiy i patik: Niaku ku laa munu’ rumerawir wo se kawang ne domba-domba i ti’i se laa i ketabuke’is. ³² Ta’an Niaku nu tumo’orouw, Niaku ku laa rumeriorla wia nikouw laa waki Galilea.” ³³ Petrus si miningkot-Nisia: “Ma’an tu’u sea nu waya i kaoghe iman nea kaa Nikoo, niaku ma’an mekasa i te reiy’.” ³⁴ Yesus minila’ wia nisia: “Niaku lumila’me wia nikoo, kaulitna wengi yi’i, nu reiy’pe’ se ko’oko’ kumukuk, nikoo koo simangkalouw Niaku makatelu.” ³⁵ Pokeiy ni Petrus wia-Nisia: “Ma’anouw tu’u niaku ku laa mate mewali-wali Nikoo, niaku ku reiy’ laa sumangkal Nikoo.” Em baya se murid walina tu’u limila’ tuana kangkasi. ³⁶ Takar i ka’ayo mola si Yesus mewali-wali se murid-murid-Na witu e nesa tampa mekengaran Getsemani. Laa o Sia mila’ wia se murid-murid-Na: “Rumuberouw wia nyi’i, kaa Niaku ku lumaa weti’ila laa mesesombayang.” ³⁷ Wo Sia si minaali si Petrus wo se rua urang ni Zebedeus ma’an-Nisia. Takar muleiy mouw Sia mapedam susah wo meide’, ³⁸ Laa o pokeiy-Na wia nisea: “Nate-Ku eng kasa susah, tanu mepepate papedamen. Mena’ mouw wia nyi’i wo mategha-teghamola ampit Niaku.” ³⁹ Takar Sia majula oki’, laa o kumurur wo sumombayang, pokeiy-Na: “Ya Ama’-Ku, sa satorona wona, ma’anouw en cawan yi’i lumngkoiye wia-Niaku, ta’an te’a mouw en tanu neiy Ku i kepa’arla, ta’an i te en tanu neiy Mu i kepa’arla.” ⁴⁰ Nu reiy mouw i tu Sia mareng wia se murid-murid-Na i ti’i wo matola nisea se timekel. Wo Sia lumila’ wia si Petrus: “Reiy’ re’en makawoo koo mategha-tegham esa i te jam ampit Niaku? ⁴¹ Mategha-teghamouw wo sumombayangouw, rio te’a kouw i kawolon witu eng gorem pewa’awa’an: roh si memang maki’i-ki’it, ta’an e le’ona lewea’.” ⁴² Laa o Sia mea eng karuana wo sumombayang, pokeiy-Na: “Ya Ama’-Ku sa en cawan yi’i e reiy’ wona’ lumangkoiy, kacuali sakawisa Niaku kumoo’ nyi’a, mamuali mouw eng kepa’ar-Mu!” ⁴³ Wo katoroan Sia marengi kasi, Sia matola nisea se timekel, karengan em beren nea em buterouw. ⁴⁴ Sia si minayala nisea witu laa o mea wo sumombayang eng kateluna wo tumotorla en sesombayangen ni’itukan kangkasi. ⁴⁵ Nu reiy mouw i tu Sia meiy wia se murid-murid-Na wo lumila’ wia nisea: “Tumekelouw teakan wo masenge’la. Loo’on, nedona e wia mouw, kaa si Oki’ ni Tou si i sarakan witu e lawas ne tou-tou berdosa. ⁴⁶ Tumo’orouw, meiy mouw ta mea. Sia si mesesarakan Niaku si tawi mouw.” ⁴⁷ Witu en toro si Yesus nu masusiye’ meiy mouw si Yudas, si meta’asa’an wia se mapulu’ o rua murid i ti’i, wo se mewali-wali nisia se esa nga rewok tou maali-ali en santi wo em bewewe, neiy i reo ne imam-imam kepala wo se tua-tua ne bangsa Yahudi. ⁴⁸ Sitou mesesarakan Nisia si minaki te’u mola eng kowa’ yi’i wia nisea: “Sitou laa sionganku, ni’itu mouw Sia, sikopenouw Sia.” ⁴⁹ Wo makarengan sia maju lumalesla si Yesus wo lumila’: “Tabea Rabi,” Laa o sumiongla Nisia. ⁵⁰ Ta’an si Yesus limila’ wia nisia: “Heiy kalo, kaa ni’itu re’en o koo meiy?” Takar maju mola sea tumiboiy si Yesus wo sumikop-Nisia. ⁵¹ Ta’an siesa wia nisea si matepe-teper si Yesus si minayatla e lawasna, sumawut en santina wo i ta’atakla wia si hamba Imam Wangko’ i ka’ayo mina tegol en talingana. ⁵² Takar pokeiy ni Yesus wia nisia: “Ghoremla en santi i ti’i i wareng witu eng gorem ne’uma’anna, karengan seiy i te si mepakela en santi, si laa mapuneng kaa en santi. ⁵³ Ka’apa eng genangmu, kaa Niaku ku reiy’ mete’u maaleiy wia si Ama’-Ku, rio Sia si makarengan mapa’alimi se lumantouwla wia se mapulu’ o rua pasukan malaikat sumawang Niaku? ⁵⁴ Satuana, kumura mouw tu laa lekepen e neiy i patik witu eng Kitab Suci, e limila’la, kaa e lewo’ sa reiy’ mamuali tuana?” ⁵⁵ Witu en toro ni’itu Yesus si limila’ wia se tou kelaker: “Pokeiymu Niaku yi’i ku penyamun, takar kouw mineiy lekep ampit en santi wo em bewewe kaa mesesikop Niaku? E nulitna susur nendo Niaku ku rumuber mawee teturu’ witu em Bait ni Empung, wo nikouw kouw reiy’ simikop Niaku. ⁵⁶ Ta’an em baya nyi’a minamuali rio malekep e neiy i patik witu eng kitab nabi-nabi.” Laa o em baya ne murid-murid i ti’i timele’ula Nisia wo tumingkas. ⁵⁷ Ni’itu nu reiy mouw sea nu simikopla si Yesus, nisea se minali-Nisia sumaru si Kayafas, Imam Wangko’, Witu minerurouw se ahli-ahli Taurat wo se tua-tua. ⁵⁸ Petrus si maki’itla Nisia witu em ba’akat i ka’ayo waki kalasan Imam Wangko’, wo sia nu ghimoremouw witu eng gorem, sia rumuber witu e nelet ne pengawal-pengawal kaa meleloo’ eng kesampetan eng kapualitan i ti’i. ⁵⁹ Imam-imam kepala, ma’an tare se pakasa’an Mahkamah Agama mesesero kasairian palsu wia si Yesus rio Sia toro ukumen paten, ⁶⁰ ta’an sea se reiy’ minaka’atola nyi’a, ma’anouw tu’u mineiy laker se sairi towo. Ta’an mamuri meiy mouw se rua tou, ⁶¹ se meila’la: “Sitou yi’i limila’: Niaku ku toro rumewala em bait ni Empung wo rumedeiyla nyi’a sumeup witu en telu nga endo.” ⁶² Laa o rumedeiy si Imam Wangko’ i ti’i wo lumila’ wia-Nisia: “Reiy’ re’en Koo meela wewingkot witu en teturean-teturean ne sairi-sairi yi’i wia Nikoo?” ⁶³ Ta’an si Yesus si minakapenes i te. Laa o pokeiy ni Imam Wangko’ i ti’i wia-Nisia: “Demi si Empung matou-tou, i lila’ momi wia nikeiy, sapa ku’a re’en Nikoo koo Mesias, Urang ni Empung, ka’apa reiy’.” ⁶⁴ Wingkot ni Yesus: “Nikoo koo limila’ mola nyi’a. Ta’an, Niaku lumila’me wia nikoo, rengan en teakan nikouw kouw laa lumoo’ si Oki’ ni Tou rimuber witu esa nga weka lele’os Ni Mahakuasa wo meiy witu e natas linaak-linaak waki langit.” ⁶⁵ Takar si Imam Wangko’ i ti’i kumurensangla e labungna wo lumila’: “Sia si maojat si Empung, Edon sapa ta medope’ kasi sairi? Teakan e lininga miouw mouw e nojat-Na. ⁶⁶ Kumura eng genang miouw?” Nisea se miningkot wo lumila’: “Sia si lewo’ sa reiy ukumen paten!” ⁶⁷ Laa o rura’an neala eng gio-Na wo kumunteiy-Nisia; se tou-tou walina se minewe Nisia, ⁶⁸ Mesias, seiy re’en si minewe Nikoo?” ⁶⁹ 69 Kasuatan ni’itu Petrus si rimuber witu luar witu eng kalasan. Takar meiy mouw wia nisia si esa hamba wewene, pokeiyna : “ Nikoo kangkasi koo re’eregh mewali-wali ampit si Yesus, sitou Galilea i ti’i.” ⁷⁰ Ta’an nisia si simangkal nyi’a witu en sinaru em baya ne tou, pokeiyna : “ Niaku ku reiy’ mete’u, sapa e maksudmu.” ⁷¹ Katoroan sia nu mea waki pepalen lengko’an, si esa hamba walina limoo’ nisia wo lumila’ wia se tou-tou witu : “ Sitou yi’i si mewali-wali ampit si Yesus, tou Nazaret i ti’i.” ⁷² Wo sia si simangkal nyi’a kangkasi ampit en timiwa’: “ Niaku ku reiy’ makasine’u sitou i ti’i.” ⁷³ 73 Reiy’ ure e ni’itu se tou-tou witu meiy wia si Petrus wo lumila’: “ Tantu mouw nikoo kangkasi koo meta’asa’an wia nisea, ni’itu em pakalinga-lingan witu eng kapa susuiymu.” ⁷⁴ Takar makarenganouw si Petrus makutok wo matiwa’: “ Niaku ku reiy’ makasine’u sitou i ti’i.” witu i te en toro ni’itu kumukukouw se ko’oko’. ⁷⁵ Takar i kaghenangouw si Petrus sapa neiy i lila’la ni Yesus wia nisia: “Nu reiy’pe’ se ko’oko’ kumukuk, nikoo koo simangkalouw Niaku makatelu.” Laa o sia mea witu luar wo maame’ ampit eng kasusana.