¹ “Witu en toro ni’itu eng kapualitan Keraja’an Sorga e nulur se mapulu’ reraa, se minedo em pelita nea wo mea sumungkul si peredegom. ² Lima se witu e nelet nea se we’engel wo se lima se bijaksana. ³ Reraa-reraa we’engel i ti’i se minali em pelita nea, ta’an se reiy’ minaali lana, ⁴ Awes tare se reraa-reraa bijaksana i ti’i se minaali em pelita nea wo kangkasi e lana witu eng gorem em buli-buli nea. ⁵ Ta’an karengan si peredegom i ti’i si keure reiy’pe’ mengeiy kangkasi, melelea mouw sea nu waya laa o katekelan. ⁶ Witu eng katoroan maparua em bengi kalinga’anouw sitou marekeiy: Mengeiy mouw si peredegom! Sungkulenouw sia! ⁷ Se reraa-reraa i ti’i tu’u em baya nea se timo’or laa o tumu’utulela em pelita nea. ⁸ Se reraa-reraa we’engel se limila’ wia se reraa-reraa bijaksana: Weeane’mi oki’ keiy witu e lana miouw i ti’i, karengan em pelita meiy en tawi mouw mate. ⁹ Ta’an wingkot ne reraa-reraa bijaksana i ti’i: Reiy’, sangari tu reiy’ ma’awes wia nikeiy wo wia nikouw. Kasa le’os kouw mea wia si mewangker lana wo tumeles witu. ¹⁰ Ta’an, witu eng kasuatan sea minea kaa meteteles nyi’a, o meiy mouw si peredegom i ti’i wo nisea se timiro’-tiro’ mouw sea ghumorem mewali-wali ampit nisia witu e woang pesakeiyan kimaweng, laa o kusi’in em pepalen. ¹¹ Kamurian meiy kangkasi se reraa-reraa walina i ti’i wo lumila’: Tuang, tuang, wuka’ane’la keiy pepalen! ¹² Ta’an sia si miningkot: Niaku lumila’me wia nikoo, kaulitna niaku ku reiy’ maka sine’u nikouw. ¹³ Kaa ni’itu, mategha-teghamouw, karengan nikouw kouw reiy’ mete’u e nendo ka’apa tu’u e nedona.” ¹⁴ “Karengan eng kapualitan Keraja’an Sorga e masuat tanu siesa tou si me’a waki luar em banua, si kimeret se hamba-hambana wo minemanla eng hartana wia nisea. ¹⁵ Si esa tou wineeanna lima talenta, si esa tou kasi rua wo si esa tou walina kasi e nesa, siesa o siesa i ki’it eng kaawoanna, laa o sia mea. ¹⁶ Makarengan mea mouw si hamba minaka’atola lima talenta i ti’i. Sia si kimelangla e loit i ti’i laa o maka’ato e nuntung lima talenta. ¹⁷ Si hamba minaka’ato rua talenta i ti’i tu’u si simiwo en tuana kangkasi wo si minuntung rua talenta. ¹⁸ Ta’an si hamba minaka’ato e nesa talenta i ti’i mea wo kumiar eng ko’okor witu eng gorem en tana’ laa o kumirongla e loit ni tuangna. ¹⁹ E nure nu reiy’ mouw i tu marengomi si tuang ne hamba-hamba i ti’i laa o sumiwola rerekenan ampit nisea. ²⁰ Si hamba minaka’ato lima talenta i ti’i mineiy wo sia si maali-ali e nuntung lima talenta, pokeiyna: Tuang, e lima talenta neiy i emanla ni tuang wia niaku; loo’on, niaku ku minaka’ato mouw e nuntung lima talenta. ²¹ Takar pokeiy ni tuangna i ti’i wia nisia: Le’os kasa em pasiwo-siwonnu i ti’i, heiy hambaku le’os wo lale’; nikoo koo lale’ mouw witu eng kapualitan rintek, niaku ku laa meela wia nikoo em pemesa’anen witu eng kapualitan sumelala. Ghumoremouw wo kumi’itouw witu e naruiy ni tuangmu. ²² Laa o meiy mouw si hamba minaka’ato rua talenta i ti’i, pokeiyna: Tuang, rua talenta ni tuang neiy i emanla wia niaku; loo’on, niaku ku minaka’ato mouw e nuntung rua talenta. ²³ Takar pokeiy ni tuangna i ti’i wia nisia: Le’os kasa em pasiwo-siwonnu i ti’i, heiy hambaku le’os wo lale’, nikoo koo lale’ mouw minesa’an em pemesa’anen witu eng kapualitan rintek, niaku ku laa meweweela wia nikoo em pemesa’anen witu eng kapualitan sumelala. Ghumoremouw wo kumi’itouw witu e naruiy ni tuangmu. ²⁴ Teakan meiy mouw kangkasi si hamba minaka’ato e nesa talenta i ti’i wo lumila’: Tuang, kete’uanku kaa si tuang sitou kejam meupu’ witu en tampa wisa si tuang reiy’ kimeror wo mapurut witu en tampa wisa si tuang reiy’ timanem. ²⁵ Kaa ni’itu ku meide’ wo mea kumirongla en talenta ni tuang i ti’i witu eng gorem en tana’: Nyi’i mouw, edonola eng kapunya’an ni tuang! ²⁶ Takar wingkot ni tuangna i ti’i: Heiy koo, hamba lewo’ wo malas, jadi kete’uannu mouw, kaa niaku ku meupu’ witu en tampa wisa niaku reiy’ kimeror wo mapurut witu en tampa wisa niaku reiy’ timanem? ²⁷ Kaa ni’itu lewo’ mouw sa reiy’ e loitku i ti’i i weemula wia sitou makelangla loit, rio eng kinewewarengku niaku ku maka’atola nyi’a ampitouw em bungangna. ²⁸ Kaa ni’itu edonola en talenta i ti’i wia nisia i wee mola wia sitou makapunya mapulu’ talenta i ti’i. ²⁹ Karengan susur tou si makapunya, wia nisia si laa weean, i ka’ayo sia kalokonan. Ta’an seiy si reiy’ makapunya, sapa i te tu’u kangkasi em bia nisia e laa edoni wia nisia. ³⁰ Wo i sea’ mola si hamba reiy’la ka’ara’an i ti’i witu eng gorem kareideman eng kasa reidem. Mana mouw e laa atoan e narip wo eng kare’eket em ba’ang.” ³¹ “Sakawisa si Oki’ ni Tou meiy witu eng kamulia’an-Na wo em baya ne malaikat se mewali-wali ampit Nisia, takar Sia si laa rumuber witu e natas en takhta kamulia’an-Na. ³² Laa em baya ne bangsa se laa erurela witu en sinaru-Na wo Sia si laa tuma’atasla nisea siesa tou wia siesa tou masuat tanu si rumerawir tima’atasla se domba wia se membe’, ³³ wo Sia si laa tumampala se domba-domba witu esa nga weka lele’os-Na wo se membe’-membe’ witu esa nga weka kawii-Na. ³⁴ Wo si Raja i ti’i si laa lumila’ wia nisea se witu esa nga weka lele’os-Na : Meiy, heiy kouw nu binerkatla ni Ama’-Ku, edonola eng keraja’an en sinadia mola i wee nikoo e rengane’ eng kaoatan siniwola. ³⁵ Karengan eng katoroan niaku maarem, nikouw kouw minee Niaku kumaan; katoroan Niaku nu re’o, nikouw kouw minee Niaku kumoo’; katoroan Niaku nu tou wo’oseiy, nikouw kouw minee Niaku tete’upan; ³⁶ katoroan Niaku nu poteiy, nikouw kouw minee Niaku labung; katoroan Niaku nu rara’an, nikouw kouw mineiy limalesi Niaku; katoroan Niaku nu witu eng gorem penjara, nikouw kouw miney limalesi Niaku. ³⁷ Takar se tou-tou ulit i ti’i se laa mingkot Nisia, pokeiy nea: Tuhan, kawisa mouw re’en keiy limoo’ Koo maarem wo keiy mee Nikoo kumaan, ka’apa re’o wo keiy mee Nikoo kumoo’? ³⁸ Kawisa mouw re’en keiy limoo Koo tanume si tou wo’oseiy wo keiy mee Nikoo tete’upan, ka’apa poteiy wo keiy mee Nikoo labung? ³⁹ Kawisa mouw re’en keiy limoo’ Koo rara’an ka’apa witu eng gorem penjara wo keiy lumalesla Nikoo? ⁴⁰ Wo si Raja i ti’i si laa mingkot nisea: Niaku lumila’me wia nikoo, kaulitna e reiy’ sa mina’asa wo’o sapa en tinuana miouwla i wee si meta’asa’an wia se patuari-Ku kasa hina yi’i, nikouw kouw timuana mola nyi’a i wee Niaku. ⁴¹ Wo Sia si laa lumila’ kangkasi wia nisea se witu esa nga weka kawii-Na: Rumou’la witu en sinaru-Ku, heiy kouw tou-tou neiy i kutok, rumou’la mea witu eng gorem napi kekal en sadia mouw i wee si iblis wo se malaikat-malaikatna. ⁴² Karengan katoroan Niaku nu maarem, kouw reiy’ minee Niaku kumaan; katoroan Niaku nu re’o, kouw reiy’ minee Niaku kumoo’; ⁴³ katoroan Niaku nu tou wo’oseiy, kouw reiy’ minee Niaku tete’upan; katoroan Niku nu poteiy, kouw reiy’ minee Niaku labung; katoroan Niaku nu rara’an wo witu eng gorem em penjara, kouw reiy’ limalesi Niaku. ⁴⁴ Laa o sea tu’u laa mingkot Nisia, pokeiy nea: Tuhan, kawisa mouw re’en keiy limoo’ Koo maarem, ka’apa re’o, ka’apa tanume sitou wo’oseiy, ka’apa poteiy ka’apa rara’an, ka’apa witu eng gorem em penjara wo keiy reiy’ limayanela Nikoo? ⁴⁵ Takar Nisia si laa mingkot nisea: Niaku lumila’me wia nikoo, kaulitna e reiy’ sa mina’asa wo’o sapa e reiy’ siniwo miouwla i wee si meta’asa’an wia se kasa hina yi’i, nikouw kouw reiy’ simiwola nyi’a kangkasi i wee Niaku. ⁴⁶ Wo nisea yi’i se laa ghumorem witu em pasiksa’an kekal, ta’an se tou ulit witu eng gorem patou-touan kekal.”