¹ Nu reiy’ mouw i tu Yesus si rumou’mi witu em Bait ni Empung, laa o mea. Takar meiy mouw se murid-murid-Na wo tumudu’ wia em bangunan-bangunan em Bait ni Empung. ² Sia lumila’ wia nisea: “Nikouw kouw limoo’ em baya nyi’a i ti’i? Niaku lumila’me wia nikoo, kaulitna reiy’ siesa watu tu’u wia nyi’i e laa i wayala rimeta’ witu e natas em batu walina; em baya nyi’a e laa i ronga’la.” ³ Katoroan si Yesus nu rimuber waki atas eng Kuntung Zaitun, meiy mouw wia-Nisia se murid-murid-Na kaa mesesusuiy i tela ampit Nisia. Pokeiy nea: “Lila’ mola wia nikeiy, wo’o kawisa re’en e ni’itu laa mamuali wo sapa ku’a re’en eng kowa’ eng ke’e eiy-Mu wo eng kowa kesampetan eng kaoatan?” ⁴ Wingkot ni Yesus wia nisea: “Mategha-teghamouw rio te’a wawean tou si sumeipla nikouw! ⁵ Karengan laker tou se laa meiy ampit mepake e ngaran-Ku wo lumila’: Niaku mouw ku Mesias, wo nisea se laa sumeipla laker tou. ⁶ Nikouw kouw laa luminga nederan em perang ka’apa e naba-abar tanume em perang. Ta’an mategha-teghamouw te’a o kouw balisa; karengan em baya nyi’a i ti’i e lewo’ sa reiy’ mamuali, ta’an e ni’itu reiy’pe’ eng kesampetanna. ⁷ Karengan se bangsa se laa tumo’or sumaru se bangsa, wo se keraja’an sumaru se keraja’an. E laa wawean kelalenan wo em pengero’ witu e reiy’ sa mina’asa tampa. ⁸ Ta’an i laa em baya nyi’a i ti’i tare mouw i te eng ketarean em peme’itan melelaa en zaman weru. ⁹ Witu en toro ni’itu nikouw kouw laa i sarakan rio kouw siksan, wo nikouw kouw laa wunu’un wo laa i kari’iris em baya ne bangsa karengan e ngaran-Ku, ¹⁰ wo laker tou se laa mamurtad wo nisea se laa mesesarakanan wo mereri’irisan. ¹¹ Laker nabi palsu se laa modol wo sumeipla laker tou. ¹² Wo karengan eng kasa maka’awesola eng kadurhaka’an, takar e nupus ne kelakeran tou e laa maghe’egher. ¹³ Ta’an sitou timaang i ka’ayo witu eng kesampetan si laa melawir. ¹⁴ Wo Injil Keraja’an yi’i e laa i abarla wia e minapekasa eng kaoatan e mamuali kasairian wia em baya ne bangsa, nu reiy’ mouw i tu tare mouw i te i ka’ayo eng kesampetanna.” ¹⁵ “Jadi sakawisa kouw lumoo’ Mememuneng lewo’ rimedeiy witu en tampa kudus, i ki’it e nuwu neiy i pa’ayola ni nabi Daniel – se mewaca satorona maweela ghenang nyi’a – ¹⁶ takar se tou-tou waki Yudea, lewo’ mouw sa reiy’ tumingkas waki kakuntungan. ¹⁷ Sitou witu em paroisan witu e natas em bale te’a mouw sia metetumpa kaa ma’edo em barang-barang witu em balena, ¹⁸ wo se tou-tou waki uma te’a mouw sia mareng kaa meiy ma’edo e labungna. ¹⁹ Cilaka mouw se ina’-ina’ megandong ka’apa se mawee susu si oki’ witu e noras ni’itu. ²⁰ Sumombayangouw, rio e nedo ketetingkas miouw i ti’i te’a tumena’ witu e noras eng ghe’egher wo te’a witu e nendo Sabat. ²¹ Karengan witu e noras ni’itu e laa mamuali siksa’an kaente’ tanu e reiy’pe’ ma’an mekasa minamuali rengan ketareanna eng kaoatan i ka’ayo teakan wo e reiy’ mouw laa mamuali kasi. ²² Wo sawona’ e nedona reiy’ pinemotot, takar waki e reiy’ sa mina’asa matou-tou reiy’la si laa melawir; ta’an i te kaa eng karengan se tou-tou pineleng en toro ni’itu e laa pemototen. ²³ Witu en toro ni’itu sa sitou lumila’la wia nikoo: Loo’on, Mesias si wia nyi’i, ka’apa Mesias si waki ti’ime, te’a kouw ma’eman. ²⁴ Karengan se Mesias-mesias palsu wo se nabi-nabi palsu se laa modol wo nisea se laa sumiwola eng kowa’-kowa’ hebat wo e mujizat-mujizat, i ka’ayo sawona’ toro, sea sumeipla se tou-tou pinelengla kangkasi. ²⁵ Ghena-ghenangenola, Niaku ku limila’ mola nyi’a eng ketare wia nikoo. ²⁶ Jadi, sakawisa sitou lumila’la wia nikoo: Loo’on, Sia si waki padang gurun, te’a mouw kouw melelaa witu; ka’apa: Loo’on, Sia si witu eng gorem woang, te’a mouw kouw ma’eman. ²⁷ Karengan masuat tanu eng kerap kimerapi waki esa nga weka sendangan wo rumesike en sena’na i ka’ayo waki esa nga weka talikuran, tuana mouw kangkasi ee sangari eng ke’e eiy ni Oki’ ni Tou. ²⁸ Wisa e wawean wange, witu se burung nazar muyut.” ²⁹ 29 Makarengan nu reiy mouw en siksa’an witu e masa ni’itu, si endo si laa mareidem wo si sumedot si reiy’ laa sumena’ wo se sumesena’-sumesena’ se laa mera’araghi waki langit wo eng kuasa-kuasa langit e laa moghe. ³⁰ 30 Witu en toro ni’itu e laa loo’on eng kowa’ ni Oki’ ni Tou waki langit wo em baya ne bangsa wia em bumi se laa ma’arip wo nisea se laa lumoo’ si Oki’ ni Tou i ti’i meiy witu e natas linaak-linaak waki e langit ampit e reiy’ sa mina’asa kakuasa’an wo eng kamulia’an-Na. ³¹ Wo Sia si laa rumeo se malaikat-malaikat-Na rumou’mi ampit masengo en sangkakala kasa legu’ e legu’anna wo nisea se laa merurla se tou-tou pineleng-Na waki epat ruuna em bumi, waki tempok e langit esa mea waki tempok e langit walina. ³² Edola teturu’ witu em peulurela tanume e nakana ara: Sakawisa em pangana-pangana rumewo’ wo muleiy sumuru, kouw mete’u, kaa e noras ra’ar en tawi mouw. ³³ Tuanakan kangkasi, sa kouw lumoo’ em baya nyi’a yi’i, kete’uanola, kaa e nedona en tawi mouw, witu mouw en tawi em pepalen. ³⁴ Niaku lumila’me wia nikoo: Kaulitna se angkatan yi’i se reiy’ laa lumangkoiy, nu reiy’pe’ em baya nyi’a yi’i mamuali. ³⁵ Langit wo em bumi e laa lumangkoiy, ta’an e lelila’an-Ku e reiy’ laa lumangkoiy. ³⁶ Ta’an tanume e nendo wo e nedo ni’itu reiy’ siesa tou tu’u si mete’u, malaikat-malaikat waki sorga reiy’, wo si Oki’ tu’u reiy’, si Ama’ i te nuesa.” ³⁷ “Karengan sakumura eng kapualitanna witu en zaman ni Nuh, tuana mouw kangkasi eng kapualitanna ee sangari eng ke’e eiy ni Oki’ ni Tou. ³⁸ Karengan eng kumura nisea nu witu en zaman nu reiy’pe’ e rano ampuan i ti’i kumaan wo kumoo’, kaweng wo kumawengla, i ka’ayo witu e nendo si Nuh nu ghumorem witu eng gorem em bahtera, ³⁹ wo nisea se reiy’ mete’u en sapa-sapa, nu reiy’pe’ e rano ampuan i ti’i meiy wo rume’ila nisea nu waya, tuana mouw kangkasi eng kapualitanna ee sangari eng ke’e eiy ni Oki’ ni Tou. ⁴⁰ Witu en toro ni’itu sa wawean rua tou waki uma, siesa tou si laa alin wo siesa si laa i tele’ula; ⁴¹ sa wawean rua wewene mawiling em batu kilangan, siesa tou si laa alin wo siesa si laa i tele’ula. ⁴² Kaa ni’itu mategha-teghamouw, karengan nikouw kouw reiy’ mete’u witu e nendo wisa si Tuhanmu meiy. ⁴³ Ta’an kete’uanola nyi’i: Sa si mekewale si mete’u witu e nedo wisa witu e nendo wengi si rongkit si laa meiy, tantu mouw sia si timayu-tayur, wo reiy’ laa i wayanala em balena ghogharen. ⁴⁴ Kaa ni’itu, satorona nikouw kangkasi kouw timiro’-tiro’ mouw, karengan si Oki’ ni Tou si meiy witu e nedo wo’o wona’ reiy’ kakete’uan niouw,” ⁴⁵ “Seiy ku’a si hamba lale’ wo bijaksana, si pinopo ni tuangna wia se tou-touna kaa meweweela nisea kumaan witu e nedona? ⁴⁶ Ma’aruiyola si hamba, si niatola ni tuangna matuanala en tugas i ti’i, katoroan si tuangna i ti’i meiy. ⁴⁷ Niaku lumila’me wia nikoo: Kaulitna si tuangna i ti’i si laa mopo nisia mamuali tumetegha’ e reiy’ sa mina’asa kapunya’anna. ⁴⁸ Ta’an sa si hamba i ti’i lewo’ wo lumila’ witu eng gorem natena: ⁴⁹ Tuangku si reiy’ maiy-yai, laa o sia muleiy mewe se hamba-hamba walina, wo kumaan kumoo’ mewali-wali se tetelewen-tetelewen, ⁵⁰ takar si tuang ni hamba i ti’i si laa meiy witu e nendo e reiy’ pa’ara-arapen, wo witu e nedo reiy’ kinakete’uanna, ⁵¹ wo laa munu’ nisia wo sumiwo nisia esa nge nasib ampit se tou-tou munafik, Mana mouw e laa atoan e narip wo eng kare’eket em ba’ang.”